އިނގިރޭސި ޕްރިމިއާ ލީގުގައި ލެސްޓާ ސިޓީ އަތުން މޮޅުވެ ލިވަރޕޫލުން, ތާވަލުގެ އެއްވަނައިގައި 13 ޕޮއިންޓްގެ ލީޑެއް ނަގައިފިއެވެ.
ލެސްޓަރގެ ދަނޑުގައި ކުޅުނު މި މެޗުން ލިވަރޕޫލް މޮޅުވީ 4-0 ގެ ތަފާތު ބޮޑު ނަތީޖާ އަކުންނެވެ.
މެޗުފަށައިގެން ލިވަރޕޫލުން ލެސްޓަރގެ ގޯލަށްވަނީ ފުލުފުލުގައި ނުރައްކާކޮށްފައެވެ. އެގޮތުން މެޗުގެ 11 ވަނަ މިނެޓުގައި ލިވަރޕޫލްގެ ފޯވާޑް މުހައްމަދު ސަލާހް ވަނީ ނުރައްކާތެރި ބޯޅައެއް ގޯލާ އަމާޒުކޮށް ފޮނުވައިލައިފައެވެ. ނަމަވެސް އޭނާ ފޮނުވައިލި ބޯޅަ ލެސްޓަރގެ ކީޕަރުވަނީ ދިފާއު ކޮށްފައެވެ. މި މެޗުގެ ލީޑު ލިވަރޕޫލުން ނެގީ މެޗުގެ 31 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ބްރެޒިލްގެ ހުނަރުވެރި ފޯވާޑް ފިރްމީނިއޯއެވެ. މި ލަނޑަށްފަހު ވެސް ލިވަރޕޫލުން ގެންދިޔައީ ފުލުފުލުގައި ލެސްޓަރގެ ގޯލަށް ނުރައްކާ ކުރަމުންނެވެ.
މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާ އަކުން ލިވަރޕޫލް ކުރީގައި އޮވެގެންނެވެ.
މެޗުގެ ދެވަނަ ހާފު ލެސްޓަރއިން ވަނީ އެޓީމުގެ ކުޅުން ރަނގަޅު ކޮށްފައެވެ. އެގޮތުން މެޗުގެ 48 ވަނަ މިނެޓުގައި ލެސްޓަރގެ ޔޫރީ ވަނީ ނުރައްކާތެރި ހަމަލާއެއް ލިވަރޕޫލްގެ ގޯލަށް ފޮނުވައިލައިފައެވެ. އޭގެ ފަހުން މެޗުގެ ތެރެއަށް ލިވަރޕޫލުން ވަދެ ގިނަ ހަމަލާތަކެއް ލެސްޓަރގެ ގޯލަށް ފޮނުވާލައިފައިވެއެވެ. އެގޮތުން ލިވަރޕޫލްގެ ސަލާހް އަދި މާނޭ އަށް ވަނީ ލަނޑު ޖަހަން ރަނުގެ ފުރުސަތުތަކެއް ލިބި ބޭކާރުވެފައެވެ.
ލިވަރޕޫލުން އެޓީމުގެ ލީޑު ފުޅާކުރީ މެޗުގެ 71 ވަނަ މިނެޓުގައި ލިބުނު ޕެނަލްޓީއަކުންނެވެ. މި ލަނޑު އެޓީމަށް ކާމިޔާބުކޮށްދިނީ ޖޭމްސް މިލްނާއެވެ. އޭގެ ފަހުން މެޗުގެ 74 ވަނަ މިނެޓުގައި ފިރްމީނިއޯ ވަނީ އިތުރު ލަނޑެއްޖަހައިފައެވެ. އަދި މެޗުގެ 78 ވަނަ މިނެޓުގައި ލިވަރޕޫލްގެ އެލެކްސެންޑަރ ވަނީ އިތުރު ލަނޑެއް އެޓީމަށް ޖަހައިދީ މެޗުން ތިން ޕޮއިންޓް ހޯދައިދީފައެވެ.
މި ނަތީޖާ އާއި އެކު ލިވަރޕޫލުން ތާވަލުގެ އެއްވަނައިގައި އޮތީ ލިބުނު 52 ޕޮއިންޓާއިއެކުގައެވެ. މެޗުން ބަލިވި ލެސްޓަރ ލީގު ތާވަލުގެ ދެވަނައިގައި 39 ޕޮއިންޓާއިއެކު އޮތްއިރު، އެންމެ ފަހުގެ ލީގު ޗެމްޕިއަން ސިޓީ އޮތީ ލިބުނު 38 ޕޮއިންޓާއެކު ލީގު ތާވަލުގެ ތިންވަނައިގައެވެ.