ދިރާގު ދިވެހި ޕްރިމިއާ ލީގުގައި މާޒިޔާއިން އެންމެ ފަހުގެ ލީގު ޗެމްޕިއަން ޓީސީ ސްޕޯޓްސް ކްލަބް ބަލިކޮށްފިއެވެ.

ގަލޮޅު ރަސްމީ ބޯޅަ ދަނޑުގައި ބުރާސްފަތި ދުވަހުގެރޭ ކުޅުނު މި މެޗު މާޒިޔާއިން ކާމިޔާބުކުރީ 4-1 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު ދެޓީމުން ވެސް ވަނީ ލަނޑު ޖަހަން ފުރުސަތު ތަނަވަސްކޮށްފައެވެ. އެގޮތުން މެޗުގެ ފުރަތަމަ ހާފުގައި ލަނޑު ޖަހަން އެންމެ ރަނގަޅު ފުރުސަތެއް ލިބިގެންދިޔައީ މާޒިޔާއަށެވެ. މެޗުގެ 42 ވަނަ މިނެޓުގައި އަސައްދުﷲ އަބްދުﷲ އަށްވަނީ ރަނުގެ ފުރުސަތެއްލިބި ބޭކާރުވެފައެވެ.

މެޗުގެ ދެވަނަ ހާފު ފަށައިގެން ޓީސީ އިން އެޓީމުގެ ކުޅުން ރަނގަޅުކޮށް މާޒިޔާގެ ގޯލަށް ނުރައްކާ ކޮށްފައިވެއެވެ. އެގޮތުން މެޗުގެ 49 ވަނަ މިނެޓުގައި ޓީސީގެ މުހައްމަދު ސާދު ނިޒާރުވަނީ ނުރައްކާތެރި ހަމަލާއެއް މާޒިޔާގެ ގޯލާ އަމާޒުކޮށް ފޮނުވައިލައިފައެވެ. ނަމަވެސް މާޒިޔާގެ ކީޕަރުވަނީ މި ހަމަލާ ހުށިޔާރުކަމާއިއެކު ދިފާއުކޮށްފައެވެ. މެޗުގެ 51 ވަނަ މިނެޓުގައި މާޒިޔާއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ބިދޭސީ ފޯވާޑް ސްޓެވާޓްއެވެ. މެޗުގެ 58 ވަނަ މިނެޓުގައި އަސައްދުﷲ އަބްދުﷲ ވަނީ އިތުރު ލަނޑެއްޖަހާ މާޒިޔާގެ ލީޑު ފުޅާ ކޮށްދީފައެވެ. މި ލަނޑާއެކު ޓީސީއިން އެޓީމުގެ ކުޅުން ރަނގަޅުކޮށް މާޒިޔާގެ ގޯލަށް ނުރައްކާކުރިއެވެ. އެގޮތުން މެޗުގެ 71 ވަނަ މިނެޓުގައި ޓީސީގެ އިބްރާހީމް އަތީޤް ހަސަން ފޮނުވާލި ބޯޅަ އަމާޒުވީ ގޯލުގެ ދަނޑިއަށެވެ. މެޗުގެ 75

ވަނަ މިނެޓުގައި ޓީސީއިން ވަނީ ލަނޑު ޖަހައިފަރަގު ކުޑަކޮށްފައެވެ. މިލަނޑު ލިބުނު ހިލޭ ޖެހުމަކުން އެޓީމަށް ކާމިޔާބުކޮށްދިނީ އިސްމާއީލް އީސަ (މެސީ) އެވެ. މެޗުގެ 84 ވަނަ މިނެޓުގައި ޓީސީގެ ޑިފެންޑަރުންނަށް ހެދުނު ގޯހެއްގެ ފައިދާ ނަގާ އަސައްދުﷲ އަބްދުﷲ ވަނީ ލަނޑު ޖަހައިފައެވެ. މި ލަނޑާއި އެކު މާޒިޔާއިން އިތުރަށް އެޓީމުގެ އެޓޭކްތައް ވަނީ ވަރުގަދަކޮށްފައެވެ. މާޒިޔާގެ ފަހު ލަނޑު މެޗުގެ އިތުރު ވަގުތުގައި އެޓީމަށް ކާމިޔާބުކޮށްދިނީ އިބްރާހީމް ވަހީދު (އިއްބެ) އެވެ.

މެޗަށްފަހު ވާހަކަދައްކަމުން ޓީސީގެ ކޯޗު މުހައްމަދު ޝާޒްލީ ބުނީ މިމެޗަށް ޓީސީއިން ނިކުތީ މޮޅުވާން ކަމަށާއި ނަމަވެސް ކަންދިމާވި ގޮތުން އެކަން ނުވި ކަމަށެވެ. އޭނާ އިތުރަށްބުނީ މެޗުގެ ފުރަތަމަ ހާފުގައި ޓީސީއިން ރަނގަޅަށް ކުޅުންކަމަށާއި ދެވަނަ ހާފު ފެށުން ދިޔައީ ގޯސްކޮށް ކަމަށެވެ. މާޒިޔާގެ ކޯޗު މަރުޖާން ސެކުލޮސްކީ ބުނީ އޭނާގެ ޓީމުން އެންމެ ފަހުގެ ޗެމްޕިއަން ޓީސީ ބަލިކުރީ ކުޅުންތެރިން މޮޅަށް ކުޅެގެންކަމަށާއި މި މެޗުގައި ޓީސީއިން ރަނގަޅު ފައިޓްއެއް ދިންކަމަށެވެ.