ގައުމީ ވޮލީ ލީގު: ފުރަތަމަ މެޗުން ގުޑީސް އަށް މޮޅެއް

އެއް އަހަރުގެ މެދުކެނޑުމަކަށްފަހު ފެށި ގައުމީ ވޮލީބޯޅަ ލީގުގެ ފިރިހެން ޑިވިޝަނުގެ ފުރަތަމަ މެޗު ގުޑީސް ސްޕޯޓްސް ކްލަބުން ފަސޭހަކަމާއެކު، ކާމިޔާބުކޮށްފިއެވެ.

ޒުވާނުންގެ މަރުކަޒު ވޮލީ ކޯޓުގައި ކުޅުނު މި މެޗު ގުޑީސްއިން ކާމިޔާބުކުރީ ކްލަބް ހޯވކްސްގެ މައްޗަށް ސީދާ ތިން ސެޓުން ކުރި ހޯދައިގެންނެނެވެ.

މެޗުގެ ސެޓުތައް ގުޑީސްއިން ގެންދިޔައީ 25-15، 25-10 އަދި 25-13 އިންނެވެ. މެޗުގެ މޮޅު ކުޅުންތެރިޔަކީ ގުޑީސްގެ މުހައްމަދު އަހުސަނތވެ.

ގުޑީސް ގައުމީ ވޮލީ ލީގުގައި ކުޅޭއިރު، އެޓީމުން ވަނީ އެޓީމުގެ ސްކޮޑް ވަރުގަދަކޮށްފައެވެ. އެގޮތުން އެޓީމުގައި ޤައުމީ ޓީމަށް ކުޅޭ ގިނަ ކުޅުންތެރިންތަކެއް ހިމެނެއެވެ. އޭގެ ތެރޭގައި އަހުސަން، ކެޕްޓަން ހުސެއިން ވިޝާމް (ބުޅިކެ)، ހަސަން ނިލާމް (ޕާޓޭ)، ޖަވާމް އަލީ (ދަނގަޑޭ)، އާދަމް ފައިރޫޒް އަދި އުންމީދީ ކުޅުންތެރިޔާ ޝަމާއިލް ހުސެއިން ހިމެނެއެވެ. މީގެ އިތުރުން ނޭޕާލުގެ މަން ބަހާދުރު ޝްރެސްތާ އެޓީމުގެ ސްކޮޑުގައި ހިމެނެއެވެ.

2017 ވަނަ އަހަރު ބޭއްވި ވޮލީބޯޅަ ލީގުގެ ފިރިހެން ޑިވިޝަނުގެ ޗެމްޕިއަންކަން ދިވެހި ސިފައިންގެ ކްލަބާއި ވާދަކޮށް ހޯދައިފައިވަނީ މޯލްޑިވިއަނުންނެވެ.