ގިނަ އަހަރުތަކަކަށް ފަހު ޖަޕާނުން އެހެން ޤައުމެއްގެ ރައްޔިތެއްގެ މައްޗަށް މަރުގެ ހުކުމް ތަންފީޒުކޮށްފި އެވެ.

ބުރާސްފަތި ދުވަހު ޖަޕާނުން މަރުގެ ހުކުމް ތަންފީޒު ކޮށްފައިވަނީ ޗައިނާއަށް ނިސްބަތްވާ ރައްޔިތެއްގެ މައްޗަށެވެ. އެގޮތުން އުމުރުން 40 އަހަރުގެ ވީވީގެ މައްޗަށް މަރުގެ ހުކުމް ތަންފީޒު ކޮށްފައިވަނީ އޭނާ ޖަޕާނުގެ އާއިލާއެއްގެ 4 މެމްބަރަކު މަރާލާފައިވާތީއެވެ.

މީޑިއާ ރިޕޯރޓްތައް ބުނާ ގޮތުގައި 2003 ވަނަ އަހަރުގެ މެދު ތެރޭގައި ވީވީ މި ކުށުގެ އަމަލު ހިންގާފައިވަނީ ޗައިނާއަށް ނިސްބަތްވާ އިތުރު ދެ މީހެއްގެ އެހީއާވެސް އެކުގައެވެ. އެގޮތުން އެ ދެ މީހުން ފިލައިގެން ޗައިނާއަށް ގޮސް އުޅެނިކޮށް ވަނީ ހައްޔަރު ކޮށްފައެވެ. އަދި އޭގެތެރެއިން އެކެއްގެ މައްޗަށް 2005 ވަނަ އަހަރު ޗައިނާގައި މަރުގެ ހުކުމް ތަންފީޒު ކޮށްފައިވާއިރު، ދެން ހުރި މީހާއަށް އުމުރު ދުވަހުގެ ޖަލު ހުކުމެއް އިއްވާފައިވާކަމަށް ރިޕޯރޓްތައް ބުނެއެވެ.

ޖަޕާނުގެ ޖަސްޓިސް މިނިސްޓްރީ ބުނާގޮތުން ވީވީގެ މައްޗަށް ތަންފީޒުކުރި މި ހުކުމަކީ ޖަޕާނުގެ ބޮޑުވަޒީރު ޝިންޒޯ އާބޭ 2012 ވަނަ އަހަރު މަޤާމާއި އަލުން ހަވާލުވެވަޑައިގަތް ފަހުން ތަންފީޒު ކުރި 39 ވަނަ މަރުގެ ހުކުމެވެ.

ޖަޕާނުގައި މަރުގެ ހުކުމް ތަންފީޒު ކުރަނީ ދަން ޖައްސައިގެންނެވެ. އެގޮތުން މިހާރުވެސް މަރަށް ހުކުމް ކޮށްފައިވާ 120 މީހުން އެ ޤައުމުގައި ތިބިއިރު، ފާއިތުވި އަހަރު އެކަނިވެސް 15 މީހެއްގެ މައްޗަށް ވަނީ މަރުގެ ހުކުމް ތަންފީޒު ކޮށްފައެވެ.

އޭގެއިތުރުން، ޖަޕާނުގައި މަރުގެ ހުކުމް ތަންފީޒު ކުރެވޭ މީހުންގެ ވަނަވަރު ހާމަކުރަން ފެށީ 2007 ވަނަ އަހަރުން ފެށިގެންނެވެ.