މަރު ކޮމިޝަނަށް މެމްބަރަކު އައްޔަނުކުރުމަށް ދަނީ މަޝްވަރާކުރަމުން: ހޫދު
23 ޑިސެމްބަރު 2019 | ހޯމަ 12:15ކޮމިޝަނުގައި މިހާރު ތިއްބަވަނީ 3 މެމްބަރުން
ރައީސް އޮފީހުގެ ތަރުޖަމާން އިބްރާހިމް ހޫދު
ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަ ބެލުމަށް ރައިސުލްޖުމްހޫރިއްޔާ އެކުލަވާލާފައިވާ ރިޔާސީ ކޮމިޝަނަށް މެމްބަރުން އައްޔަނުކުރުމުގެ މަސައްކަތް އޮތީ "ކޮންސިޑަރޭޝަން" މަރުހަލާގައިކަމަށް ރައީސް އޮފީހުގެ ތަރުޖަމާން އިބްރާހިމް ހޫދު ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ހޫދު ވިދާޅުވީ ހުސްވެފައިވާ މެމްބަރުންގެ މަގާމުތަކަށް މެމްބަރުން އައްޔަނުކުރުމަށް މަޝްވަރާ ކުރަމުން ދާކަމަށާއި އެ މަސައްކަތް ވަރަށް ބާރު ސްޕީޑެއްގައި ކުރަމުންދާކަމަށެވެ.
ކުރިން މަރު ކޮމިޝަނުގެ ރައީސްގެ މަގާމުގައި ހުންނެވި ހުސްނުއް ސުއޫދު ވަނީ ސުޕްރީމްކޯޓުގެ ފަނޑިޔާރުކަަމަށް އައްޔަނުކުރުމާއި ގުޅިގެން އެ ކޮމިޝަންގެ ރައީސް ކަމުން އިސްތިއުފާ ދެއްވާފައެވެ. މީގެއިތުރުން، އެ ކޮމިޝަނުގެ މެންބަރުކަމުގެ މަޤާމުން މި މަހުގެ 8ވަނަ ދުވަހު އާދަމް އިބްރާހީމް ވެސް ވަނީ އިސްތިޢުފާ ދެއްވައިފިއެވެ.
އެ ދެބޭފުޅުން ކޮމިޝަނުން އިސްތިޢުފާ ދެއްވުމާއެކު އެ ކޮމިޝަނުގައި މިހާރު ތިއްބަވަނީ ތިން މެމްބަރުންނެވެ. އެއީ، މިސްބާހް އައްބާސް އާއި ފަރީޝާ ޢަބްދުﷲގެ އިތުރުން އަޙްމަދު ނާޝިދެވެ.
ކޮމިޝަނުގެ މަސައްކަތުގެ އެންމެ ފަހުގެ މައުލޫމާތު ރާއްޖެއެމްވީއާ ހިއްސާކުރައްވަމުން، އެ ކޮމިޝަންގެ މެމްބަރު ފަރީޝާ އަބްދުﷲ ވިދާޅުވީ 2019 އަހަރު ނިމުމުގެ ކުރިންވެސް މަރާލައިފައިވާ މީހުންނާއި ގެއްލުވާލައިފައިވާ މީހުންގެ މަރުތައް ތަހުގީގުކުރާ ކޮމިޝަނުން ތަހުގީގުކުރަމުންދާ ބޮޑެތި މައްސަލަތަކުގެ ފައިނަލް ރިޕޯޓު ހާމަނުކުރެވިދާނެކަމަށް ގަބޫލު ނުކުރައްވާކަމަށެވެ.
ފަރީޝާ ވިދާޅުވީ، އެންމެ ބޮޑު ގޮންޖެހުމަކީ ބައެއް މައްސަލަތައް އެއީ މީގެ އަހަރުތަކެއް ކުރިން ހިނގާފައިހުރި ކަންތައްތަކަށްވުމާއެކު، ފުލުހުން އޭރުގައި ތަހުގީގު ހިންގާ ނުވަތަ ފޮރިންސިކް ރިޕޯޓު ހެދިނަމަވެސް މައްސަލަތަކުގެ ބާވަތުން އިތުރަށް ޔަގީންކުރުމަށް މަރު ކޮމިޝަނުން އިތުރު ޓެސްޓްތަކެއް ހެދުމަށް ކަމާބެހޭ އިދާރާތަކުގައި އެދެންޖެހުންކަމަށެވެ.
