ސީރިޔާގެ އުތުރު ދެކުނު ޞަރަޙައްދުގައި މިހާރު ހިނގަމުންދާ ޙަމަލާ ބަދަލުކުރުންތަކާއެކު އެޞަރަޙައްދު ދޫކޮށް ދާ ރެފިޔުޖީންނަށް ތުރުކީން ޙިމާޔަތް ނުދެވޭނެ ކަމަށް ތުރުކީވިލާތުގެ ރައީސް ރަޖަބް ޠައްޔިބު އުރުދުޣާން ވިދާޅުވެއްޖެ އެވެ.

އުރުދުޣާން ވަނީ އެޞަރަޙައްދުގައި ހިނގަމުންދާ ހަމަނުޖެހުން ނުހުއްޓުވައިފިނަމަ ގިނަ ޢަދަދެއްގެ ސީރިޔާގެ ރައްޔިތުން ރެފިޔުޖީންނަށް ވެގެންދާނެ ކަމުގެ އިންޒާރު ޔޫރަޕުގެ ޤައުމުތަކަށް ދެއްވާފަ އެވެ. ތުރުކީ އަކީ އެންމެ ގިނަ ޢަދަދެއްގެ ރެފިޔުޖީންނަށް ޙިމާޔަތް ދޭ ގައުމެވެ. އެގޮތުން ސީރިޔާގެ 3.7 މިލިއަން ރެފިޔުޖީންނަށް ތުރުކީން ޙިމާޔަތްދެއެވެ. މިހާރު ސީރިޔާގައި އެންމެ ބޮޑަށް ހަމަނުޖެހުން ހިނގަމުންދާ އިދްލީބް ޕްރޮވިންސްގައި 3 މިލިއަން މީހުން އުޅޭއިރު އެޞަރަޙައްދު ދޫކޮށް ގިނަ ޢަދަދެއްގެ ބަޔަކުވަނީ ހިޖުރަކުރަން ފަށާފައެވެ.

އެޞަރަޙައްދުގައި ސީރިޔާ އާއި ރަޝިޔާ އާ ދެމެދު ހަމަލާ ބަދަލުކުރަމުންދާއިރު، މިހާތަނަށް އިދްލީބުން 80،000 އަށް ވުރެ ގިނަ މީހުން ތުރުކީ އަށް އައުމުގެ މަގުމަތީގައިވާ ކަމަށް އުރުދުޣާން ވިދާޅުވި އެވެ.

އުރުދުޣާން ވިދާޅުވީ ހަމަނުޖެހުން ދިގުލައިގެންދާނަމަ މި ޢަދަދު އިތުރުވަމުންދާނެ ކަމަށާއި އޭގެ އަސަރު ޔޫރަޕުގެ ޤައުމުތަކަށްވެސް ކުރާނެ ކަމަށެވެ. އަދި ރަޝިޔާއިން ސީރިޔާއަށް ދެމުންގެންދާ ޙަމަލާތައް ހުއްޓުވުމަށްޓަކައި ހޯމަ ދުވަހު ތުރުކީގެ ވަފްދެއް ރަޝިޔާގެ ވެރިރަށް މޮސްކޯއަށް ދާނެކަމަށްވެސް އުރުދުޣާން ވިދާޅުވި އެވެ.

ރެފިޔުޖީން ބެލެހެއްޓުމުގައި އިތުރު ސަޕޯޓް ތުރުކީއަށް ލިބެމުންނުދާތީ އުރުދުޢާން ވަނީ ޔޫރަޕަށް ރެފިޔުޖީން އެތެރެކުރުމަށް ގޮވާލާފަ އެވެ. ތުރުކީން މިހާރުވެސް އަންނަނީ ބައިނަލްއަޤުވާމީ އެހީތެރިކަމަށް އެދެމުންނެވެ. އެގޮތުން ސީރިޔާގެ 1 މިލިއަން ރެފިޔުޖީން ބޭއްތިއްބުމަށް ބޭނުންވާ އެހީތެރިކަން އެޤައުމުން މިހާރުވެސް އަންނަނީ ހޯދަމުންނެވެ.

ނޮވެންބަރ މަހުން ފެށިގެން އިދްލީބް ޕްރޮވިންސްގަ ހިނގަމުންދާ ހަމަނުޖެހުންތަކުގައި މިހާތަނަށް ދެލައްކަ ފަސްހާސް މީހުންނަށް ވަނީ ގެދޮރު ދޫކޮށްދާން މަޖުބޫރުވެފައެވެ.