ދަފްތަރުގައި ހިމެނޭ ފަރާތްތައް ބަހާނީ ދާއިރާތަކަށް މަދުވާ މިންވަރުން އަދަދު ހަމަކުރުމަށް: އަކްރަމް
ލޯކަލް ކައުންސިލް އިންތިހާބުގައި ދަފްތަރުގައި ހިމެނޭ ފަރާތްތަކަށް ފަސޭހަތަކެއް ހަމަޖެއްސުމަށް ދަނީ މަސައްކަތްތަކެއް ކުރެވެމުން
އިލެކްޝަންސް ކޮމިޝަންގެ ނައިބު ރައީސް އަހުމަދު އަކްރަމް
މާލޭގެ ދަފްތަރުގައި ހިމެނޭ ފަރާތްތައް ކުރިއަށް އޮތް ލޯކަލް ކައުންސިލް އިންތިޚާބުގައި ވޯޓުލާން ބަހާނީ، ދާއިރާތަކުން މަދުވާ ބައި ހަމަކުރުމަށް ނަންބަރު ތަރުތީބުން ކަމަށް އިލެކްޝަންސް ކޮމިޝަންގެ ނައިބު ރައީސް އަޙްމަދު އަކްރަމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީގައި ވާހަކަ ދައްކަވަމުން އަކްރަމް ވިދާޅުވީ ދަފްތަރަކީ އެންމެންގެ ކަންބޮޑުވުންވެސް އޮތްކަމެއް ކަމަށާއި، އިލެކްޝަންސް ކޮމިޝަނުން ކޮންމެ އިންތިޚާބެއްގަ ވެސް ކަންކުރާ އުޞޫލުން މި އިންތިޚާބާމެދުވެސް ދަފްތަރާއި މެދު އަމަލުކުރާނެ ގޮތަކާވެސް މަޝްވަރާކޮށްފައިވާކަމަށެވެ.
އެގޮތުން ދަފްތަރުގައި ހިމެނޭ 9500 ބޭފުޅުން ދެ ދާއިރާއަކަށް ބަހާލުމަށްފަހު ހުޅުމާލެއަށް އެ 2 ސީޓް އިތުރުކޮށް ހުޅުމާލޭގައި ޖުމްލަ 3 ސީޓް ހިމެނޭގޮތަށް ކުރިއަށް ގެންދަންވެސް ކޮމިޝަނުގައި ކޮންމެވެސް ވަރަކަށް މަޝްވަރާ ކުރެވުނު ކަމަށް އަކްރަމް ވިދާޅުވިއެވެ. އެހެންނަމަވެސް ޤާނޫނަށް ބަލާއިރު އެއީ ކުރެވޭނެކަމަކަށް ނުފެންނާތީ އެކޮމިޝަނުން އެގޮތައް ޢަމަލުނުކުރާ ކަމަށް އަކްރަމް ވިދާޅުވިއެވެ.
އަކްރަމް ވިދާޅުވީ ދަފްތަރު ބަހާލުމުގައި ދެން ޢަމަލު ކުރައްވާނީ ކުރިން އަމަލުކުރި ރެންޑަމް ކައުންޓިންގ ސިސްޓަމެއްގެ ގޮތަށް އޮޓަމެޓިކުން ނަންބަރުތަކެއް ނެގޭގޮތަށް ކަމަށެވެ. މިކަމާ ގުޅޭގޮތުން މިހާތަނަށް ގޮތެއް ކަނޑައަޅާފަ ނުވިނަމަވެސް، މިފަހަރު ކޮމިޝަންގެ ވިސްނުން ހުރީ ނަންބަރު ތަރުތީބުން ބަހާލުމާ ދޭތެރޭގައި ކަމަށެވެ. އެހެންކަމުން ދަފްތަރުގައި މިހާރު ތިބި ބޭފުޅުން ވޯޓުލާނެތަނެއް އަދި ދަންނަވަން ނޭނގޭ ކަމަށް އަކްރަމް ވިދާޅުވިއެވެ.
ދަފްތަރުގައި ހިމެނޭ ފަރާތްތައް ވޯޓްލާން ދާއިރާތަކަށް ބަހާލާއިރު ކޮންމެ އިންތިޚާބެއްގައި ވެސް މައްސަލަ ޖެހޭތީ އެކަމަށް ލުއިފަސޭހަ ގޮތެއް ހެދުމަށް މަސައްކަތް ކުރަމުންދާ ކަމަށް އިލެކްޝަނުން ވަނީ ބުނެފައެވެ.
