ސަރުކާރުން ބަދަލު ދޭން ނިންމާފައިވާ 9 މައްސަލައެއް އޭސީސީން ތަހުޤީޤު ކުރަން ފަށައިފި
އޭސީސީން އެމައްސަަލަތައް ތަހުގީގު ކުރަނީ އެކޮމިޝަނުގެ އަމިއްލަ އިސްނެގުމުގެ މަތީން
އޭސީސީގެ މެމްބަރުން ރައީސް ސޯލިހް އާއެކު
އެއްބަސްވުމާއި ހިލާފަށް ސަރުކާރުން އުވާލި ކަމަށްބުނެ، ބަދަލުގެ ގޮތުގައި ސަރުކާރުން ދީފައިވާ ބޮޑެތި ބަދަލުތަކާ ގުޅޭ 9 މައްސަލައެއް އެންޓި ކޮރަޕްޝަން ކޮމިޝަން (އޭސީސީ) ބަލަން ފަށައިފި އެވެ.
އޭސީސީގެ މީޑިއާ އޮފިޝަލް "ރާއްޖެއެމްވީ"އަށް އާދިއްތަ ދުވަހު ވިދާޅުވީ ސަރުކާރުން ބަދަލު ދޭން ނިންމާފައިވާ، ނުވަ މައްސަލަ އެކޮމިޝަނުން ބަލަނީ އެކޮމިޝަނުގެ އަމިއްލަ އިސްނެގުމުގެ މަތީން ކަމަށެވެ. އަދި އެ މައްސަލަތަކަކީ، ރައްޔިތުންގެ މަޖިލީހުގެ ބައެއް މެމްބަރުންނާއި އާންމު ރައްޔިތުންގެ އެތައް ކަންބޮޑުވުންތަކެއް ފާޅު ކުރަމުންދާ މައްސަލަތަކެއް ކަމަށްވާތީ، އެކޮމިޝަނުން އަމިއްލަ އިސްނެގުމުގެ މަތީން އެ 9 މައްސަލަ ބަލަން މިހާރު ފަށާފައިވާ ކަމަށާއި މިހާރު ކުރިއަށްދަނީ ކަމާބެހޭ ޑޮކިއުމަންޓްތައް ހޯދުމާއި ލިބިފައިވާ ޑޮކިއުމަންޓްތައް ދިރާސާ ކުރުމުގެ މަސައްކަތް ކަމަށްވެސް އޭސީސީގެ މީޑިއާ އޮފިޝަލް ވިދާޅުވި އެވެ.
އޭސީސީގެ މީީޑިއާ އޮފިޝަލް ވިދާޅުވީ މިވަގުތު ހާމަ ކުރެވެން އޮތް މައުލޫމާތަކީ އެއީ ކަމަށާއި އެމައްސަލަތަކުގެ ތަހުގީގު ނިމުމުން އިތުރު މައުލޫމާތު ހާމަކުރާނެ ކަމަށެވެ.
ނިމިދިޔަ ރައީސް ޔާމީންގެ ސަރުކާރުން ބާތިލް ކުރި ގިނަ އެއްބަސްވުންތަކާއި ގުޅިގެން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ވެރިކަމުގައި ވަނީ ބޮޑެތި ބަދަލުތަކެއް އެކުންފުނިތަކަށް ދޭންޖެހިފަ އެވެ.
އެއްބަސްވުމާއި ހިލާފަށް، އެއްބަސްވުންތައް ބާތިލް ކުރުމުން، ރައީސް ސޯލިހުގެ ސަރުކާރަށް ވަނީ ބޮޑެތި ބަދަލުތަކެއް އެކުންފުނިތަކަށް ދޭންޖެހިފައިވާއިރު، ރައީސް އޮފީހުން އެ ބަދަލުތައް ދެމުންދަނީ ރައީސް އޮފީހުގައި އޮންނަ ސްޓެލްމަންޓް ކޮމެޓީން އެމައްސަލަ ބެލުމަށްފަހު، އެކޮޮމެޓީން ނިންމާ ގޮތެއްގެ މަތީން ނެވެ.
ރައީސް ސޯލިހުގެ ސަރުކާރުން ލަފާކޮށްފައިވާ ގޮތުގައި، އެއްބަސްވުންތަކާ ހިލާފަށް އެ އެއްބަސްވުންތައް ބާތިލް ކުރުމުގެ ސަބަބުން ދައުލަތުން 6.8 ބިލިއަން ރުފިޔާ ބަދަލުގެ ގޮތުގައި ދައްކަން ޖެހޭނެ ކަމަށް ބެލެވެ އެވެ. މިހާރު ވެސް ބަދަލުގެ ގޮތުގައި އެއް ބިލިއަނަށްވުރެ ގިނަ ރުފިޔާ ސަރުކާރުން އެކި ފަރާތްތަކަށް ދައްކާފައި ވެއެވެ.
މީގެއިތުރުން، ކުރީގެ ރައީސް ޑރ. މުހައްމަދު ވަހީދު ހަސަންމަނިކުގެ ސަރުކާރުން ވެލާނާ އިންޓަނޭޝަނަލް އެއާރޕޯޓް ތަރައްގީ ކުރުމަށް އިންޑިއާގެ ޖީއެމްއާރާއެކު ވި އެއްބަސްވުން އުވާލުމާއި ގުޅިގެން 400 މިލިއަން ޑޮލަރު ރައީސް ޔާމީންގެ ވެރިކަމުގައި ދައްކާފައިވެއެވެ.
މީގެއިތުރުން، މީގެ ހަތް އަހަރު ކުރިން ތިލަފުށި ފަޅުތެރޭގައި އޮތް "އެމްވީ ސީ ހޯމް ސެފަޔާ" ނަމަކަށް ކިޔާ ބޯޓު އެތަނުން ނަގަން ގްރޭޓަރ މާލެ އިންޑަސްޓްރިއަލް ޒޯން (ޖީއެމްއައިޒެޑް) އިން ހަވާލުކުރި، ޕާކަވަންއާ އެކު އެފައިވާ އެއްވަސްވުމާއެއްގޮތަށް ކަންތައްތައްކުރިއަށް ނުގޮސް، އަދި ގްރޭޓަރ މާލޭ ކުންފުނިން އޮޅުވާލި ކަމަށްބުނެ، ގެއްލުމުގެ ބަދަލުގެ ގޮތުގައި، 708،511 ޑޮލަރު (10.9 މިލިއަން ރުފިޔާ) ހޯދަން ޕާކަވަން އިން ވަނީ ސިވިލް ކޯޓުގައި ދަޢުވާކޮށްފަ އެވެ.
ސަރުކާރުން އެކި ކުންފުނިތަކާއެކު ވެފައިވާ އެއްބަސްވުންތަކާއި، އަދި އެ އެއްބަސްވުންތަކާ ހިލާފަށް އެ އެއްބަސްވުންތައް އުވާލުމާ ގުޅިގެން ބޮޑެތި ބަދަލުތަކެއް ދައުލަތުން ދައްކަން ޖެހިފައިވާއިރު، ރައްޔިތުން ގެންދަނީ ވަރަށް ބޮޑަށް ނުރުހުން ފާޅު ކުރަމުން ނެވެ.
