މަސްވެރިންނަށް ދިމާވެފައިވާ މައްސަލަތައް ހައްލު ކޮށްދެއްވާނެ ކަމުގެ ޔަޤީންކަން ރައީސް ދެއްވައިފި
21 ޑިސެމްބަރު 2019 | ހޮނިހިރު 07:27ރައީސް ޞާލިހުގެ ސަރުކާރުން ގެންދަވަނީ މަސްވެރިންނަށް ދިމާވެފައިވާ މައްސަލަތައް ހައްލުކޮށްދެއްވުމަށް ބުރަ މަސައްކަތްތަކެއް ކުރަމުން
ރައީސް ޞާލިހު، ލ. ހިތަދޫ މަސްވެރިންނާ ބައްދަލު ކުރައްވަނީ
މަސްވެރިންނަށް ދިމާވެފައިވާ މައްސަލަތައް ވީހާ އަވަހަކަށް ޙައްލުކޮށްދެއްވުމަށް މަސައްކަތްޕުޅު ކޮށްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ދެއްވައިފި އެވެ.
މަސްވެރިންނަށް ދިމާވެފައިވާ މައްސަލަތައް ވީހާ ވެސް އަވަހަކަށް ޙައްލު ކޮށްދެއްވާނެ ކަމުގެ ޔަޤީންކަން ރައީސް ޞާލިހު ދެއްވާފައި މިވަނީ، މިދިޔަ ބުރާސްފަތި ދުވަހު ރައީސުލްޖުމްހޫރިއްޔާ ލ އަތޮޅުގެ ބައެއް ރަށްތަކަށް ކުރެއްވި ރަސްމީ ދަތުރުފުޅުގެ ތެރެއިން، ހިތަދޫ މަސްވެރިންނާއެކު އެރަށު ސްކޫލްގައި ބޭއްވި ބައްދަލުވުމުގައެވެ.
އެ ބައްދަލުކުރެއްވުމުގައި މަސްވެރިންގެ ދިރިއުޅުމުގެ ޙާލަތު ބަޔާންކޮށް މަސްވެރިކަންކުރުމުގައި ދަތިވާ ކަންކަމުގެ މަޢުލޫމާތު ރައީސުލްޖުމްހޫރިއްޔާއާ ޙިއްޞާކުރައްވައި އެކަންކަން ޙައްލުކުރެވޭނެގޮތްތަކާމެދު ފުޅާ ދާއިރާއެއްގައި މަޝްވަރާކުރައްވާފައިވެއެވެ.
މިގޮތުން މަސްވެރިންނަށް އެންމެ ދަތިވާ ކަންކަމުގެ ތެރޭގައި ހިމެނޭ އައިސް ލިބުމުގައި ދިމާވާ އުނދަގޫތަކާއި، ނުއަގުގައި މަސްކިރުވަންޖެހުމާއި، ފަހި ޑީސަލް ހަކަތަ އެޕް ބޭނުންކުރުމުގައި ދިމާވާ ދަތިތަކާއި، ބޭންކިންގގައި ދިމާވާ ދަތިތައް މަސްވެރިން ވަނީ ރައީސުލްޖުމްހޫރިއްޔާއާއި ޙިއްޞާ ކުރައްވާފައެވެ.
މި ބައްދަލުކޮށްލެއްވުމުގައި. ރައީސުލްޖުމްހޫރިއްޔާގެ އަރިހުގައި ބައިވެރިވެ ވަޑައިގެންނެވި ސަރުކާރުގެ އިސް ވެރިން ވަނީ މަސްވެރިންނަށް ދިމާވެފައިވާ ދަތިތައް ޙައްލުކުރުމަށް ސަރުކާރުން ކުރައްވަމުންގެންދަވާ މަސައްކަތްތަކުގެ ތަފުޞީލު މަސްވެރިންނާ ޙިއްޞާކުރައްވާފައެވެ.
ލ. އަތޮޅަށް ރައީސް ޞާލިހު ކުރެއްވި ރަސްމީ ދަތުރުފުޅު ނިންމަވާލެއްވުމަށް ހުކުރު ދުވަހު ވަނީ މާލެ ވަޑައިގަންނަވާފައެވެ.
ރައީސް ޞާލިހުގެ މިދަތުރުފުޅުގައި ވަޑައިގެންނެވި ރަށްރަށުގެ ކައުންސިލްތަކާއި މުއައްސަސާތަކުގެ އިސްވެރިންނާ ބައްދަލުކުރައްވައި އެބޭފުޅުންގެ މަސައްކަތްތައް ކުރިޔަށް ގެންދިޔުމުގައި ދިމާވާ ދަތިތަކުގެ މަޢުލޫމާތާއި ރަށުގެ ތަރައްޤީއަށްޓަކައި ރައްޔިތުން ބޭނުންވާ ކަންކަމާ ބެހޭގޮތުން އެމަނިކުފާނު ވަނީ މަޢުލޫމާތު އޮޅުންފިލުއްވާފައެވެ.
ރައީސުލްޖުމްހޫރިއްޔާ ހިތަދުއަށް ކުރެއްވި މި ޒިޔާރަތުގައި، ހިތަދޫ ޞިއްޙީ މަރުކަޒުގައި ޚިދުމަތް ދޭންފެށިތާ 50 އަހަރު ފުރުމާއި ގުޅިގެން ބޭއްވި ޚާއްޞަ ޖަލްސާ ޝަރަފުވެރިކޮށްދެއްވައި ވާހަކަފުޅު ދައްކަވާފައިވެއެވެ.
