މިނިމަމް ވޭޖާއި ގުޅޭ ދެ ދިރާސާއެއް ލިބިފައިވޭ: ފައްޔާޒު
17 ޑިސެމްބަރު 2019 | އަންގާރަ 04:32މަޖިލީހުގެ އަންނަ ދައުރަށް ދިރާސާތައް ހުށައަޅުއްވާނެ ކަމަށް ވިދާޅުވި
ދެ ދިރާސާ ލިބިފައިވަނީ ހޯމަ ދުވަހު
އެންމެ ކުޑަ އުޖޫރަ ނުވަތަ ''މިނިމަމްވޭޖް' 'އާއި ގުޅޭ ދެ ދިރާސާއެއް ލިބިފައިވާ ކަމަށް އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވެއްޖެއެވެ.
އިންޓަނޭޝަނަލް ލޭބާ އޯގަނައިޒޭޝަން (އައިއެލްއޯ) އާއި މުސާރައާއި އުޖޫރައާ ގުޅޭގޮތުން ލަފާދޭ ބޯޑުގެ ފަރާތުން ތައްޔާރުކޮށްފައިވާ ދެ ދިރާސާ މިނިސްޓަރު ފައްޔާޒަށް އަރުވާފައިވަނީ ހޯމަ ދުވަހު އެވެ. އެކަން ހާމަކުރައްވައި ފައްޔާޒު ކުރެއްވި ޓްވީޓެއްގައި ވިދާޅުވީ، އެ ދެ ރިޕޯޓް ކެބިނެޓަށް ހުށައެޅުމަށްފަހު ރައްޔިތުންގެ މަޖިލީހުގެ އަންނަ ދައުރަށް ހުށައަޅަން ހަމަޖެހިފައިވާ ކަމަށެވެ.
"މިނިމަމް ވޭޖް" ކަނޑައެޅުމުގެ މަސައްކަތްތައް އަންނަ އަހަރުގެ ކުރީކޮޅު ނިމޭނެ ކަމަށް އުއްމީދު ކުރައްވާ ކަމަށް ފައްޔާޒު ވަނީ މީގެ ކުރިން ވިދާޅުވެފައެވެ. 19 ވަނަ ރައްޔިތުންގެ މަޖިލީހުގެ ދެވަނަ ދައުރުގެ މަސައްކަތްތައް ނިންމަވާލައްވައި މެމްބަރުން ޗުއްޓީ އަށް ވަޑައިގެންނެވިއިރު ނުނިމިއޮތީ މިނިމަމްވޭޖް ބިލުގެ މަސައްކަތް އެކަންޏެވެ. އެ ބިލު ޑްރާފްޓު ކުރުމުގެ މަސައްކަތް ކުރުމަށް އެކުލަވާލާފައިވާ ކޮމެޓީން ދަނީ އެ މަސައްކަތް ކުރަމުންނެވެ.
ދުނިޔޭގެ މަސައްކަތްތެރިންގެ ދުވަހާ ދިމާކޮށް ރައީސް އިބްރާހިމް މުހައްމަދު ސޯލިހު ވަނީ މަސައްކަތްތެރިންނަށް އެންމެ ކުޑަ އުޖޫރަ ކަނޑައަޅާނެ ގޮތާ މެދު ލަފާދޭނެ ކޮމިޓީއެއް އެކުލަވާލާފައެވެ.
މިނިމަމްވޭޖް ކަނޑައެޅުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
