އިޓާލިއަން ލީގުގައި ޔުވެންޓަސް އަދި އުދިނޭޒީ ބައްދަލުކުރި މެޗު ޔުވެންޓަސް އިން ކާމިޔާބުކޮށް އިޓާލިއަން ލީގުގެ އެއްވަނަ އަށް ޔުވެންޓަސް ޖެހިލައިފިއެވެ.

ޔުވެންޓަސްގެ އަމިއްލަ ދަނޑުގައި ކުޅުނު މި މެޗު ޔުވެންޓަސް އިން ކާމިޔާބުކުރީ 3-1 ގެ ނަތީޖާ އަކުންނެވެ.

މި މެޗު ފަށައިގެން ޔުވެންޓަސް އިން ތަފާތު މޮޅު އެޓޭކިންގ ގޭމެއް ކުޅެމުން ގެންދިޔައިރު މެޗުގެ ކުރީ ކޮޅު ޔުވެންޓަސް އިން ވަނީ ލަނޑު ޖަހައި ލީޑު ނަގައިފައެވެ. މި ލަނޑު މެޗުގެ 9 ވަނަ މިނެޓުގައި އެޓީމަށް ކާމިޔާބު ކޮށްދިނީ ޔުވެންޓަސްގެ ތަރި ކްރިސްޓިއާނޯ ރޮނާލްޑޯ އެވެ. މި ލަނޑަށް ފަހު ވެސް ޔުވެންޓަސް އިން ވަނީ ފުލުފުލުގައި އުދިނޭޒީގެ ގޯލަށް ހަމަލާތައް ފޮނުވައިލައިފައެވެ. އެގޮތުން މެޗުގެ 37 ވަނަ މިނެޓުގައި ރޮނާލްޑޯ ވަނީ އިތުރު ލަނޑެއް ޖަހައި ޔުވެންޓަސް އަށް ލީޑު ފުޅާ ކޮށްދީފައެވެ. މި ލަނޑަށް ފަހު ވެސް ޔުވެންޓަސް އިން ވަނީ މޮޅު އެޓޭކިންގ ގޭމެއް ކުޅެފައެވެ. އެގޮތުން މެޗުގެ ފުރަތަމަ ހާފު ނިމުމުގެ ކުރިން ޔުވެންޓަސް އިން ވަނީ އިތުރު ލަނޑެއް ޖަހާ ނަތީޖާ 3-0 ކަށް ބަދަލު ކޮށްލައިފައެވެ. މި ލަނޑު އެޓީމަށް ކާމިޔާބު ކޮށްދިނީ ޑިފެންޑަރ ބޮނާޗީއެވެ.

މެޗުގެ ދެވަނަ ހާފުގައި އުދިނޭޒީން ވަނީ އެޓީމުގެ ކުޅުން ރަނގަޅު ކޮށްފައެވެ. އެގޮތުން ޔުވެންޓަސްގެ އިތުބާރު ފޯވާޑުން ފޮނުވާލި ގިނަ ހަމަލާތަކެއް އުދިނޭޒީގެ ޑިފެންޑަރުން ވަނީ ދިފާއު ކޮށްފައެވެ. އަދި އުދިނޭޒީން ވަނީ މި ހާފުގައި ޔުވެންޓަސްގެ ގޯލަށް ނުރައްކާ ކޮށްފައެވެ. މެޗުގައި އުދިނޭޒީ އިން ޖެހި ހަމަ އެކަނި ލަނޑު މެޗުގެ ފަހު މިނެޓުގައި އެޓީމަށް ކާމިޔާބުކޮށްދިނީ ޕުސެއްޓޯ އެވެ.

މި ނަތީޖާ އާއި އެކު ޔުވެންޓަސް އިން ތާވަލުގެ އެއް ވަނައިގައި އޮތީ 39 ޕޮއިންޓާއެކުގައެވެ. ތާވަލުގެ ދެވަނައިގައި އޮތް އިންޓަ މިލާނަށް ވެސް ވަނީ ހަމަ މި އަދަދަށް ޕޮއިންޓް ލިބިފައެވެ. އަދި ތިން ވަނައިގައި އޮތް ލާޒިއޯ އަށް ލިބިފައިވަނީ 33 ޕޮއިންޓެވެ.