ނޭޕާލްގައި ބަހެއް ފުރޮޅާލައި 14 މީހަކު މަރުވެއްޖެ
16 ޑިސެމްބަރު 2019 | ހޯމަ 04:13ހާދިސާ ހިނގި އިރު ބަހުން 32 ފަސިންޖަރުން ދަތުރުކުރަމުން ދިޔަ
ނޭޕާލްގައި ހައިވޭއެއްގައި ދުއްވަމުންދިޔަ ބަހެއް ފުރޮޅާލުން
ނޭޕާލްގައި ހައިވޭއެއްގައި ދުއްވަމުންދިޔަ ބަހެއް އާދިއްތަ ދުވަހު ފުރޮޅާލައި 14 މީހަކު މަރުވެއްޖެއެވެ.
މި ހާދިސާ ހިނގި އިރު ބަހުން 32 ފަސިންޖަރުން ދަތުރުކުރަމުން ދިޔައެވެ. އެގޮތުން މިއީ ހިމާލިޔާ ސަރަޙައްދުގައި މިފަހުން ހިނގި އެންމެ ނުރައްކާތެރި އެއް ހާދިސާކަމަށް އެޤައުމުގެ ނޫސްތަކުން ރިޕޯރޓް ކޮށްފައިވެއެވެ.
މި ހާދިސާގައި މަރުވި މީހުންގެ ތެރެއިން 12 މީހުންގެ ހަށިގަނޑު ފެނުނުއިރުވެސް އެމީހުން މަރުވެފައިވާ ކަމަށާއި، ދެން ތިބި ދެމީހުން މަރުވެފައިވަނީ ހޮސްޕިޓަލަށް ގޮސް ފަރުވާދެމުން ގެންދަނިކޮށް ކަމަށް އެ ޤައުމުގެ ފުލުހުންނާއި ހަވާލާދީ ނޫސްތަކުން ވަނީ ރިޕޯރޓްކޮށްފައެވެ. އެގޮތުން މަރުވި މީހުންގެ ތެރޭގައި 4 ކުޑަކުދިންވެސް ހިމެނޭ ކަމަށް ފުލުހުން ވަނީ ބުނެފައެވެ.
މި ހާދިސާގައި އެކިވަރުގެ އަނިޔާތައް ލިބުނު 18 މީހަކު ހޮސްޕިޓަލުގައި ފަރުވާ ހޯދަމުންދާއިރު، އޭގެ ތެރޭގައި ބަސް ދުއްވި ޑްރައިވަރު ހިމެނޭކަން ނުވަތަ ނޫންކަން އަދި ކަށަވަރު ކުރެވިފައެއް ނުވެއެވެ.
މި އެކްސިޑެންޓް ހިނގަން މެދުވެރިވި ސަބަބު އަދި ދެނެގަނެވިފައިނުވާއިރު، މިއީ ފަރުވާ ކުޑަކޮށް ދުއްވުމުގެ ސަބަބުން ދިމާވި އެކްސިޑެންޓަކަށް ވުން އެކަށީގެންވާކަމަށް ފުލުހުން ބުނެފައިވެއެވެ.
ނޭޕާލުގެ ފަރުބަދަމަތީ ސަރަހައްދުގެ މަގުތަކުގައި މިކަހަލަ ހާދިސާތައް ހިނގުމަކީ އާއްމު ކަމެކެވެ. އެގޮތުން މިދިޔަ ނޮވެމްބަރު މަހުވެސް އެފަދަ ހާދިސާއެއް ހިނގައި 18 މީހުން މަރުވެފައިވެއެވެ.
