ކެރެލާއަށް ކިޔަވަންދާ ދަރިވަރުން އިތުރު ކުރުމަށް، މިނިސްޓަރު ރާއްޖެއަށް
15 ޑިސެމްބަރު 2019 | އާދީއްތަ 04:09ހުރިހާ ހަރަދެއް ބަލަހައްޓާނީ ކެރެލާ ސަރުކާރުން
ކެރެލާގެ ހަޔަރ އެޑިއުކޭޝަން މިނިސްޓަރު ކޭ.ޓީ ޖަލީލް
އިންޑިއާގެ ކެރެލާ ސްޓޭޓަށް މަތީ ތައުލީމް ހާސިލްކުރަންދާ ދިވެހި ދަރިވަރުން އިތުރުކުރުމަށް، އެ ސްޓޭޓްގެ ހަޔަރ އެޑިއުކޭޝަން މިނިސްޓަރު ކޭ.ޓީ. ޖަލީލް ރާއްޖެއަށް ރަސްމީ ދަތުރުފުޅެއް ކުރައްވާ ގޮތަށް ހަމަޖެހިއްޖެއެވެ.
ކެރެލާގެ މާލީހާލާތު އަޑިއަޅާލާފައިވާއިރު، ސަރުކާރުގެ ހަރަދުގައި ޖަލީލް ބޭރު ގައުމުތަކަށް ރަސްމީ ދަތުރުތައް ކުރައްވަމުން ގެންދަވާތީވެ ފާޑުކިޔުންތައް އަމާޒުވެފައިވެއެވެ.
ކެރެލާގެ ނޫހުން ރިޕޯޓްކޮށްފައިވާ ގޮތުން ހަޔަރ އެޑިއުކޭޝަން މިނިސްޓަރު ރާއްޖެއަށް ކުރައްވާ ދަތުރުފުޅުގައި އޭނާއާއެކު، ހަޔަރ އެޑިއުކޭޝަން ޑިޕާޓްމެންޓުގެ ޕްރިންސިޕަލް ސެކެރެޓަރީ އާއި ޓެކްނިކަލް ޔުނިވަސިޓީގެ ޕްރޯ - ވައިސް ޗާންސެލަރ އަދި އައިއޭސީޓީއީގެ ޑިރެކްޓަރގެ އިތުރުން އޭސްއޭޕީގެ މަންދޫބުން ބައިވެރިވެ ވަޑައިގަންނަވާނެއެވެ.
ޖަލީލްގެ ދަތުރުފުޅުގެ ފްލައިޓުގެ ހަރަދާއި، އެކޮމޮޑޭޝަނާއި، ޓްރާންސްޕޯޓްގެ ހުރިހާ ހަރަދެއް ބަލަހައްޓާނީ ކެރެލާ ސަރުކާރުންނެވެ.
ކެރެލާ ސަރުކާރުން ބުނީ، މިނިސްޓަރުގެ ވަފުުދުގެ ބޭފުޅުން ރާއްޖޭގެ ދަރިވަރުންނަށް އިންޖިނިއަރިން، އާޓްސްގެ އިތުުރުން ސައިންސްގެ ކޮލެޖްތަކާއި ބެހޭގޮތުން މައުލޫމާތު ދިނުމަށް ހަމަޖެހިފައިވާ ކަމަށެވެ.
މިނިސްޓަރު ރާއްޖެއަށް ކުރައްވާ ދަތުރުފުޅާއި ބެހޭގޮތުން ރާއްޖޭގެ ހަޔަރ އެޑިއުކޭޝަން މިނިސްޓްރީ އަށް ގުޅާލުމުން ބުނީ، އެ މައުލޫމާތުތައް ފަހުން ހާމަކުރާނެ ކަމަށެވެ.
