ވެޓެރިނަރީ ކްލިނިކް ހިންގުމަށް ޝައުޤުވެރި ވާނަމަ މިނިސްޓްރީން އެހީވާނެ: ފިޝަރީޒް މިނިސްޓްރީ

ޖަނަވާރުންނަށް ޚިދުމަތް ދޭ "ވެޓެރިނަރީ ސަރވިސް" ދިނުމަކީ ރަނގަޅު މަސައްކަތެއް ކަމަށާއި، އެކަމަށް ޝައުޤުވެރިވާ ފަރާތްތަކަށް އެހީތެރިކަން ފޯރުކޮށްދޭނެ ކަމަށް ފިޝަރީޒް މިނިސްޓްރީން ބުނެފިއެވެ.

މިނިސްޓްރީގެ މަސައްކަތްތަކާއި ގުޅޭގޮތުން ބުރާސްފަތި ދުވަހު "ނުވަގަޑިމީޑިއާ" ނަމުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓްރީގެ ޑިރެކްޓަރ ޖެނެރަލް އިބްރާހިމް ޝަބާއު ވިދާޅުވީ، ވެޓެރިނަރީ ޚިދުމަތް ދިނުމަށް އެންމެ ތަނެއް ހުރުމުން ރައްޔިތުންގެ ޑިމާންޑް އެކަމަށް ވަރަށް ބޮޑު ކަމަށާއި، ޕްރައިވެޓް ސެކްޓަރ އިން ޝަައުޤުވެރިވާނަމަ އެއީ ކުރަން ރަނގަޅު މަސައްކަތެއް ކަަމަށެވެ.

އެގޮތުން އެ މަސައްކަތަށް ޝައުޤުވެރިވާ ފަރާތްތަކަށް ބޭނުންވާ ގައިޑްލައިންސްއާއި، ކްލިނިކުގެ ލޭއައުޓު ފަދަ ކަންކަމުގެ އިތުރުން، އެފަދަ ހުރިހާ ޚިދުމަތެއް ޤާއިމު ކުރުމުގައި މިނިސްޓްރީގެ އެއްބާރުލުން ދޭނެ ކަމަށް ޝަބާއު ވިދާޅުވިއެވެ.

ރާއްޖޭގައި ފުރަތަމަ ފަހަރަށް ޖަނަވާރަށް ފަރުވާދޭ ކްލިނިކް ހުޅުވާފައި ވަނީ މިއަހަރުގެ ޖެނުއަރީ މަހުގެ 10 ވަނަ ދުވަހުއެވެ. އެގޮތުން ވިލިމާލޭގައި ޤާއިމުކޮށްފައިވާ މި ސެންޓަރުން ހަމައެކަނި ފަރުވާ ދެނީ ބުޅަލަކަށް ނޫނެވެ. އޭގެ އިތުރުން، ރާއްޖޭގައި ގިނަ އަދަދަކަށް ގެންގުޅޭ ގުރާގެ އާއިލާގެ ވައްތަރުތަކާއި ދޫނިސޫފާ ސޫފީގެ އިތުން ބައެއް ޖަނަވާރުތަކަށް ވެސް މި ސެންޓަރުން ފަރުވާ ދެއެވެ.

ނަމަވެސް އެންމެ ސެންޓަރެއް ހުރުމާއެކު ޖާގައިގެ ދަތިކަމާއި، އެޕޮއިންޓްމަންޓް ލިބުމުގެ ދަތިކަމުގެ އިތުރުން ބައެއް ވެކްސިންތައް އަދިވެސް ނުލިބޭ ކަމުގެ ޝަކުވާ ބައެއް ފަރާތްތަކުން ކުރެއެވެ.

އެކަމާ ގުޅޭގޮތުން ޝަބާއު ވިދާޅުވީ، އެކަންކަން ހައްލު ކުރުމަށް މިނިސްޓްރީން މަސައްކަތް ކުރަމުންދާ ކަމަށާއި، ވެޓް ކްލިނިކުގެ ޖާގައިގެ ދަތިކަމަށް ހައްލެއް ގެނައުމަށް މިއަހަރުގެ ސެޕްޓެމްބަރު މަހުގެ ތެރޭގައި މަސައްކަތްތަކެއް ފަށާފައިވާ ކަމަށެވެ.

އޭގެ އިތުުރުން، ކޮންޓްރެކްޓެއްގެ ދަށުން މިއަހަރު އަލަށް ފިލިޕީންސް އިން ވެޓް ޚިދުމަތްދޭ ޑޮކްޓަރެއްވެސް ގެނެސްފައިވާނެކަމަށް އޭނާ ވިދާޅުވިއެވެ.

މިނިސްޓްރީން ޤާއިމު ކޮށްފައިވާ ނޭޝަނަލް ވެޓް ކްލިނިކުން ޖަނަވާރުންނަށް ފަރުވާދޭ ޑޮކްޓަރަށް ދައްކަން 50ރ. ނަގާއިރު އެހެން ހުރިހާ ހިދުމަތަކަށް ނަގަނީ 100ރ. އެވެ. އެގޮތުން ޕްރައިވެޓް ސެކްޓަރ އިން މި މަސައްކަތް ފެށުމަށް މިނިސްޓްރީން ވަރަށް ބޮޑަށް ބާރުއަޅައެވެ.