"ލާމު ގޮޅަ ރިހަ ކޭންތަ" އިވެންޓުން މުޅި ލ. އަތޮޅު އިޝްތިހާރު ކޮށްލައިފި

ކޮންމެ އަތޮޅަކަށް ވެސް ތަފާތު ކެއުމެއް ޚާއްޞަވެއެވެ. އައްޑޫ ބޮނޑި، ދިއްގަރު ރިހާކުރު ފަދައިން ލ. އަތޮޅަށް ޚާއްޞަ އެއްޗަކީ "ގޮޅަ ރިހަ" އެވެ.

އެ އަތޮޅުގެ ޒުވާނުންތަކެއް އިސްނަގައިގެން ލ. އަތޮޅު ޕްރޮމޯޓް ކުރުމަށް ހޮނިހިރު ދުވަހު ވަނީ މުޅި އަތޮޅުގެ އެކި ރަށްރަށުގައި ގޮޅަ ރިހަ ކެއްކުމުގެ ޚާއްޞަ ޙަރަކާތެއް ބާއްވާފައެވެ. ލާމު ޓުއަރޒް އިން ބުނީ މި އިޙަރަކާތަކީ އެ އަތޮޅުގެ އާދަ ކާދައާއި ޘަޤާފަތް ދިރުވާ އާލާކުރުމުގެ ގޮތުންނާއި، އެ އަތޮޅު ފަތުރުވެރިންނަށް އިޝްތިހާރު ކުރުމުގެ ގޮތުން ބޭއްވި ޚާއްޞަ ޙަރަކާތެއް ކަމަށެވެ.

މި ޙަރަކާތް ކުރިއަށް ގެންގޮސްފައިވަނީ ކޮންމެ ރަށެއްގެ ވެސް އަންހެނުން ކުރިއަރުވާ ކޮމިޓީއާއި ރަށު ކައުންސިލުތަކާއި އަދި ސިކްސް ސެންސަސް ލާމު ރިސޯޓާއި ގުޅިގެންނެވެ. މި ޙަރަކާތުގައި ކޮންމެ ރަށެއްގައި ވެސް ވަނީ ގޮޅަ ރިހަ ކައްކާ ޚާއްޞަ ކެއުމެއް ވެސް ބާއްވާފައެވެ.

ދިވެހިންގެ މެދުގައި މަޤުބޫލުކަމެއް ހޯދާފައި މި ރިހަ އަކީ ފަރުމަހާއި، ދިވެހި ހަވާދާއި، ހަވާދުގެ އެކި ބާވަތްތައް ބޭނުންކޮށްގެން ތައްޔާރު ކުރާ ރިހައެކެވެ. ޚާއްޞަ ޙަފުލާތަކުން ފެށިގެން ކައިވެނި ޕާޓީތަކުގައި ވެސް ބޭނުން ކުރާ މި ރިހަ އަކީ އެ އަތޮޅަށް އަންނަ ފަތުރުވެރިންގެ މެދުގައި ވެސް މަޤުބޫލު ރިހައެކެވެ.

ފޭސް ބުކް މެދުވެރިކޮށް ލައިވްކޮށް ހުރިހާ ރަށެއްގައި ކުރިއަށް ގެންދިޔަ މި ޙަރަކާތަކީ ވަރަށް ކާމިޔާބު ޙަރަކާތެއް ކަމަށް ލާމު ޓުއަރޒް އިން ބުނެއެވެ. އަދި މި ޙަރަކާތް ބޭއްވި މަޤުޞަދު ޙާޞިލުވެފައިވާ ކަމަށާއި، ބައެއް ރަށްރަށުން ކެއްކި ވީޑިއޯތަކަށް މިހާތަނަށް 20،000 އަށްވުރެ ގިނަ ވިއުސް އަދި އެތައް ބަޔަކު ސޯޝަލް މީޑީއާ ޕްލެޓްފޯރމްތަކުގައި ޝެއަރކޮށްފައިވާ ކަމަށް ލާމު ޓުއަރޒް އިން ބުނެއެވެ.

ވާދަވެރިކަމާއެކު ކުުރިއަށް ގެންދިޔަ މި ޙަރަކާތުގެ ތެރެއިން ފޭސްބުކް ވީޑިއޯތަކުގެ ތެރެއިން އެންމެ ގިނަ ވިއުސް މިހާތަނަށް ލިބިފައިވަނީ ލ. ހިތަދޫގެ ކެއްކުމަށެވެ.