އަތްމަތި ދަތިވެ، އަޟްޙާ ޢީދުގެ ފުރިހަމަ އުފަލުން ޕާކިސްތާން މަޙްރޫމު ވަނީ

އުޟްޙިޔާ އަކީ ﷲ އަށް ކުއްތަންވުމުގެ ގޮތުން ޢީދުގެ ދުވަސްތަކުގެ ތެރޭގައި ނަޢަމް ޞޫފީގެ ތެރެއިން ޖަނަވާރެއް ކަތިލުމެވެ. އުޟްޙިޔާ ކަތިލުމަކީ ކީރިތި ޤުރުއާނާއި ސުންނަތާއި އިޖުމާޢުން ޘާބިތުވެފައިވާ އަޅުކަމެކެވެ. އުޟްޙިޔާ ކަތިލުމަކީ އަޟްޙާ ޢީދުގެ އެންމެ ހާއްސަ އެއް ކަންތަކެވެ. ނަމަވެސް މި ދަނޑިވަޅަކީ ދުނިޔޭގެ އެކި ކަންކޮޅުތަކަށް، އިންތިހާއަށް މާލީ ހީނަރުކަން ކުރިމަތިވެ، އެކަމުގެ ތަކުލީފުތައް، އާންމު ރައްޔިތުން އުފުލަމުންދާ ދަނޑިވަޅެކެވެ. އެފަދަ އެއް ގައުމަކީ އަވަށްޓެރި އިސްލާމީ ގައުމެއް ކަމުގައިވާ ޕާކިސްތާންއެވެ.

ޕާކިސްތާނުގެ ބާޒާރު މަތީ ސަރަހައްދުގައި ކޮޅުކޮޅު މައްޗަށް ހޭލަމޭލަ ވަމުންދާ ކަސްޓަމަރުންނާ ވާހަކަދައްކާލުމުން، ކުރިއަށް އޮތް، ބަރަކާތްތެރި އަޟްޙާ ޢީދުގައި އުޟްޙިޔާ ކަތިލުމަށް ދަތިތަކެއް ކުރިމަތިވެފައިވާ ކަން ފާހަގަކުރިއެވެ. މި ދަނޑިވަޅަކީ ފާއިތުވީ 13 އަހަރު ދުވަހުގެ ތެރޭގައިވެސް ނުދާހާ މައްޗަށް، ޕާކިސްތާނުގެ ބާޒާރުގައި ތަކެތީގެ އަގު އުފުލޭ ނިސްބަތް ނުވަތަ އިންފްލޭޝަން ރޭޓް މައްޗަށް ގޮސްފައިވާ ދަނޑިވަޅެކެވެ.

ކަރާޗީގެ ބާޒާރު މައްޗަށް ބަލާއިރުވެސް އަޟްޙާ ޢީދަށް ނަޢަމް ސޫފީގެ ތެރެއިން ޖަނަވާރެއް ގަނެވޭތޯ މަސައްކަތް ކުރާ މީހުން ފެނެއެވެ. ކަސްޓަމަރުންގެ އަތުގައި ނަޞީބު ހިފަނީ މަދު ފަހަރަކު ކަމުގައިވެސް ދެންނެވިދާނެއެވެ.

ދިރޭ، ނަޢަމް ސޫފީގެ ޖަނަވާރު ވިއްކުމުގައި އުޅޭ ޢުމަރު ފާރޫޤު ބުނި ގޮތުގައި ދަތުރުފަތުރުގެ އަގު ބޮޑުވުމުގެ ސަބަބުން، ނަޢަމް ސޫފި ޖަނަވާރުގެ އަގު އަދި ވަކިން ބޮޑުވެއެވެ.

އިނދަޖެހެމުންދާ އިގުތިސާދު ހެޔޮ ފާލަކަށް އެޅުވުމަށް، ބައިނަލްއަގުވާމީ މާލީ އިދާރާ (އައިއެމްއެފް)ގެ އެހީ ކަށަވަރު ކުރުމަށްޓަކައި، ޕާކިސްތާނުގެ ސަރުކާރުން ވަނީ ތެލަށް ދެމުންދިޔަ ސަބްސިޑީޒް ކަނޑާލާފައެވެ. ނަތީޖާއެއްގެ ގޮތުން މެއި މަހުގެ މެދަކާ ހިސާބުން ފެށިގެން، ތެލުގެ އަގުތައް މިހާރު ވަނީ 90 ޕަސެންޓް ބޮޑުވެފައެވެ.

ކުޅަދާނަވެގެންވާ ކޮންމެ މީހެއްގެ މައްޗަށް އުޟްޙިޔާ ކަތިލުމަކީ ވާޖިބެކެވެ. ޙައްޖުމަހުގެ 10 ވަނަދުވަހު، ޢީދު ނަމާދު ނިމުނީއްސުރެ ޙައްޖުމަހުގެ 13 ވަނަ ދުވަހުގެ އިރުއޮއްސިއްޖެއުމަށް ދާންދެން އުޟްޙިޔާ ކަތިލެވިދާނެއެވެ.

އުޟްޙިޔާ ކަތިލަން ޤަސްތު ކުރާ މީހާ، ޙައްޖުމަހުގެ ފުރަތަމަ ދިހަދުވަހު، މަޖުބޫރީ ޙާލަތެއް މެދުވެރިވެގެން މެނުވީ، އެކަންކަމުން ދުރުވެ، ރައްކާތެރިވާންޖެހޭ ކަންތައްތަކެއްވެސް ހުރެއެވެ. އެގޮތުން، ގައިން އެއްވެސް އިސްތަށްޓެއް ވަކި ކުރުން، ގައިން ހަން ނެއްޓުން އަދި ނިޔަފަތި ކެނޑުމުން ދުރުވާންޖެހެއެވެ. އެހެންމީހެއްގެ ފަރާތުން އުޟްޙިޔާ ކަތިލާމީހާ، މިކަންތައްތަކުން ދުރުވެ ހުންނާކަށް ނުޖެހޭނެއެވެ.