އެމްއެންޑީއެފް ސެންޓްރަލް އޭރިއާގައި ސަރވިސް ސަޕޯޓް ކޮމްޕޯނަންޓް 3 އުފައްދައިފި

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ސެންޓްރަލް އޭރިއާގައި "ސާރވިސް ސަޕޯރޓް ކޮމްޕޮނަންޓް 3" އިފްތިތާޙު ކޮށްފިއެވެ.

ސެންޓްރަލް އޭރިއާ ހެޑްކުއޯޓަރޒްގައި ބުރާސްފަތި ދުވަހު ބޭއްވި ރަސްމިއްޔާތުގައި، ސަރވިސް ސަޕޯޓް ކޮމްޕޯނަންޓް – 3 އިފްތިތާހުކޮށްދެއްވީ އެމްއެންޑީއެފް ސަރވިސްކޯގެ ކޮމަޑާންޓް ބްރިގޭޑިއަރ ޖެނެރަލް ހާމިދު ޝަފީޤެވެ.

އެމްއެންޑީއެފުން ބުނީ، މި ކޮމްޕޮނަންޓް އުފެއްދުމާއެކު އެ އޭރިއާގައި އެމްއެންޑީއެފް މިލިޓަރީ އިންޖިނިއަރސް، އިލެކްޓްރިކަލް އެންޑް މެކޭނިކަލް އިންޖިނިއަރސް، ސިގްނަލްސް، އަދި ކުއޯޓަރމާސްޓަރ ސަރވިސް އިން ދެމުންގެންދާ ލޮޖިސްޓިކްސްގެ ހިދުމަތްތައް ފުޅާ ކުރެވިގެންދާނެ ކަމަށެވެ.

އެމްއެންޑީއެފުން އިތުރަށް ބުނީ، މިއީ ރައީސް ސޯލިހު ނެރެދެއްވާފައިވާ "އެމްއެންޑީއެފް ކެޕްސްޓޯން ޑޮކްޓަރިން" ގެ ދަށުން ގެންނަމުންދާ ބަދަލެއް ކަމަށާއި، އޭގެ ސަބަބުން ރައްޔިތުންނާއި ގާތުން ޚިދުމަތް ފޯރުކޮށްދިނުމުގައި އެމްއެންޑީއެފް އޭރިއާ ކޮމާންޑްތަކުގެ އޮޕަރޭޝަނަލް ޤާބިލުކަން އިތުރުވެ އިންތިޒާމުތައް އިތުރަށް ފުރިހަމަ ވެގެންދާނެ ކަމަށެވެ.

މި ރަސްމިއްޔާތުގައި އެމްއެންޑީއެފް ސެންޓްރަލް އޭރިއާ ކޮމާންޑަރ ކާނަލް މުޙައްމަދު އިބްރާހީމާއި އޭރިއާގެ އިސް އޮފިސަރުންގެ އިތުރުން އެހެނިހެން ރޭންކުތަކުގެ ސިފައިން ބައިވެރިވެ ވަޑައިގެންފައިވެއެވެ.