އިސްލާމިކް މިނިސްޓްރީއާއި ހޯމް މިނިސްޓްރީން ބާއްވާ ކުޑަކުދިންގެ ހަވީރު މިއަދު!

މިނިސްޓްރީ އޮފް އިސްލާމިކް އެފެއާޒްއާއި މިނިސްޓްރީ އޮފް ހޯމް އެފެއާޒް ގުޅިގެން ކުރިއަށްގެންދާ ކުޑަކުދިންގެ ހަވީރު ބުދަ ދުވަހު ބޭއްވުމަށް ހަމަޖެހިއްޖެއެވެ.

އެކަމާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން އިސްލާމިކް މިނިސްޓްރީގެ ޑެޕިއުޓީ މިނިސްޓަރ އަޙުމަދުﷲ ޖަމީލް ވިދާޅުވީ، މި އިވެންޓަކީ ރާއްޖެ އިސްލާމްވި ދުވަހާއި ގުޅިގެން ބޭއްވުމަށް ތައްޔާރުވި އިވެންޓެއް ކަމަށާއި، ކުޑަކުދިންނާއި ގުޅުންހުރި ދީނީ ހަރަކާތްތައް އިވެންޓް ތެރެއިން ކުރިއަށްދާނެ ކަމަށެވެ.

އެގޮތުން ކުޑަކުދިންނާއި ގުޅުންހުރި 13 ސްޓޯލެއް ބެހެއްޓިފައިވާނެ ކަމަށާއި، ބުދަ ދުވަހުގެ ހަވީރު 4:00 އިން ފެށިގެން 6:00 އަށް އިސްލާމީ މަރުކަރުގައި މި ހަރަކާތްތައް ކުރިއަށްދާނެ ކަމަށް އޭނާ ވިދާޅުވިއެވެ. އަދި ރޭގަނޑުގެ ހަރަކާތްތައްވެސް 8:00 އިން 10:00 އަށް ކުރިއަށްދާއިރު، ކުޑަކުދިންނާއި ގުޅުންހުރި މާހައުލެއްގައި ދީނީ މައުލޫމާތުތައް ފޯރުކޮށްދެވިގެންދާނެ ކަމަށް އޭނާ ވިދާޅުވިއެވެ.

މިނިސްޓްރީން އިތުރަށް ބުނީ، މިނިސްޓްރީގެ ފަރާތުން ތަފާތު އުމުރުތަކާއި ގުޅޭގޮތަށް ދީނީ ފޮތްތައް ވިއްކަން ހުންނާނެ ކަމަށާއި، ހިލޭވެސް ބައެއް ފޮތްތައް ލިބެން ހުންނާނެ ކަމަށެވެ.

އޭގެ އިތުރުން، ރޭގަނޑުވެސް ތަފާތު ހަރަކާތްތައް ކުރިއަށްގެންދާއިރު، ޚާއްސަ ކަމެއްގެ ގޮތުން ޓެލެސްކޯޕް މެދުވެރިކޮށް ތަރިތައް ބަލާލުމުގެ ފުރުސަތު ސްޓޯލްގެ ބައިވެރިންނަށް ލިބިގެންދާނެ ކަމަށް މިނިސްޓްރީން މައުލޫމާތު ދެއެވެ.

ތަފާތު ހަދިޔާތައް ލިބޭގޮތަށް ރާވާފައިވާ މި ހަރަކާތްތަކުގައި ހިލޭ ބައިވެރިވެވޭއިރު، ހަރަކާތް ކުރިއަށްދާ ވަގުތުގައި އެކި އުމުރުފުރާގެ ކުދިންނަށް ބައިވެރި ވުމުގެ ފުރުސަތު ވަނީ ހުޅުވާލެވިފައެވެ.