200 މީޓަރު ދުވުމުން ސާއިދު ފައިނަލަށް

ނޭޕާލުގައި މިހާރު ކުރިޔަށްދާ ސައުތް އޭޝިއަން ގޭމްސްގެ 200 މީޓަރު ދުވުމުން ރާއްޖޭގެ ހަސަން ސާއިދު ފައިނަލަށް ދަތުރުކޮށްފިއެވެ.

ޝާއިދު ފައިނަލަށް ދަތުރު ކޮށްފައިވަނީ އޭނާ ދުވި ހީޓުގެ ތިންވަނަ ހޯދައިގެންނެވެ. ސާއިދު ރޭސް ނިންމީ 21.83 ސިކުންތުންނެވެ. މި ހީޓުގެ އެއްވަނަ ހޯދި ދުވުންތެރިޔާ ޕާކިސްތާނުގެ މުހައްމަދު ޝަހްބާ ރޭސް ނިންމައިފައިވަނީ 21.64 ސިކުންތުންނެވެ. އަދި މި ހީޓުގެ ދެވަނަ އަށް ދިޔަ ދުވުންތެރިޔާ ސްރީލަންކާގެ ވިނޯޖް ރޭސް ނިންމައިފައިވަނީ 21.70 ސިކުންތުންނެވެ.

އަންގާރަ ދުވަހު ބޭއްވި 100 މީޓަރު ދުވުމުން ސާއިދު ވަނީ ރަން މެޑަލް ހޯދައިފައެވެ. މި ރޭސް ސާއިދު ކާމިޔާބުކުރީ 10.49 އިން ރޭސް ނިންމައިގެންނެވެ. ސާއިދު އާއި އެންމެ ގާތުން ވާދަކުރީ ސްރީލަންކާގެ ދުވުންތެރިޔެކެވެ. އޭނާއަށް ރޭސް ނިންމާލެވުނީ 10.50 އިންނެވެ.

މިއީ 2015 ވަނަ އަހަރު ބޭއްވި އިންޑިއަން އޯޝަން އައިލެންޑް ގޭމްސްއިން ހޯދި ރަން މެޑަލްއަށްފަހު ބައިނަލްއަގްވާމީ މަލްޓި ގޭމްސްއަކުން ރާއްޖެ ލިބުނު އެންމެ ބޮޑު ޝަރަފެވެ. ރަން މެޑަލްއެވެ. މި ކާމިޔާބިއާއެކު ސާއިދު ވެގެންގޮސްފައިވަނީ ރާއްޖޭގެ ކުޅިވަރު ތާރީހުގައި އެންމެ ކާމިޔާބު އެތްލީޓުގެ ގޮތުގައެވެ.