ކޮމާޝަލް ލޯ ޑިވެލޮޕްމަންޓް ޕްރޮގްރާމްގެ ސަބަބުން މަސައްކަތުގެ ފެންވަރު ރަނގަޅުވާނެ ކަމަށް ފިނޭންސް މިނިސްޓްރީގެ ސްޓޭޓް މިނިސްޓަރ އަހުމަދު ޝަރީފް ވިދާޅުވެއްޖެއެވެ.
މި ޕްރޮފްރާމްގެ ހުޅުވުމުގެ ރަސްމިއްޔާތުގައި ވާހަކަދައްކަވަމުން ޝަރީފް ވިދާޅުވީ ފާއިތުވި އަހަރުތަކުގައި ކޮންޓްރެކްޓުތައް އެހާ ރަނގަޅަށް ނުހިންގުމުގެ ސަބަބުން ވަރަށް ބޮޑެތި ގެއްލުންތަކެއް ލިބިފައިވާ ކަމަށް އޭނާ ވިދާޅުވިއެވެ.
އަދި ގިނަ އަދަދެއްގެ އިންފްރާސްޓްރަކްޗަރަލް މަޝްރޫއުތައް ކުރިއަށް ދާއިރު އެ މަޝްރޫއުތައް ހިންގަނީ އެންމެ ރަނގަޅަށްތޯ ކަށަވަރުކުރަން ބޭނުންވާ ކަމަށެވެ. އަދި މަޝްރޫއުތައް ބޮޑުވަމުންދާ ވަރަކަށް އަދި ވިޔަފާރީގެ ދާއިރާ ފުޅާ ވަމުންދާ ވަރަކަށް އެ މަޝްރޫއުތަކުގެ ރިސްކުތަކާއި ގެއްލުންތައް ކުޑަކުރަން ބޭނުންވާ ކަމަށް ވިދާޅުވެ، ޝަރީފް ވިދާޅުވީ ކޮންމެ ކޮންޓްރެކްޓެއްގައި ބޭނުން ކުރާ މޮޑެލްތަކަކީ ބައިނަލްއަގްވާމީ ސްޓޭންޑަރޑްތަކަށް ފެތޭ މޮޑެލްތަކެއް ކަމަށް ރައްޔިތުންނަށް ކަށަވަރުކޮށްދޭން ބޭނުންވާ ކަމަށެވެ.
މި ޕްރޮގްރާމްގެ ސަބަބުން ކޮންޓްރެކްޓުތަކުގެ ފެންވަރު ރަނގަޅުވެގެންދާނެ ކަމަށް އުއްމީދު ކުރައްވާ ކަމަށްވެސް ޝަރީފް ވިދާޅުވިއެވެ.
ކޮމާޝަލް ލޯ ޑިވެލޮޕްމަންޓް ޕްރޮގްރާމް ފަށާފައިވާއިރު ޕްރޮގްރާމްގައި 30 އަށް ވުރެ ގިނަ މުއައްސަސާއިން ބައިވެރިވުމަށް ވަނީ ހަމަޖެހިފައެވެ.
