ކުލަ ގަދަ ރަސްމިއްޔާތަކާއި އެކު 13 ވަނަ ސައުތް އޭޝިއަން ގޭމްސް ފަށައިފި
2 ޑިސެމްބަރު 2019 | ހޯމަ 04:12ގޭމްސްގައި ދިވެހި 213 ޑެލިގޭޓްސް ބައިވެރިވޭ
ހުޅުވުމުުގެ ރަސްމިއްޔާތުގެ ތެރެއިން ދިވެހި ކޮންޓިޖެންޓް
ކުލަ ގަދަ ރަސްމިއްޔާތަކާއި އެކު 13 ވަނަ ސައުތް އޭޝިއަން ގޭމްސް ނޭޕާލުގައި ފަށައިފިއެވެ.
ނޭޕާލުގެ ކަތަމަންޑޫ އަދި ޕޮކާރާ ސިޓީގައި ކުރިޔަށްދާ މި މުބާރާތް އާދީއްތަ ދުވަހު ކުލަގަދަ ރަސްމިއްޔާތަކާއި އެކު ފަށައިފައިވާއިރު މި އަހަރުގެ ސައުތް އޭޝިއަން ގޭމްސްގައި ރާއްޖެއިން ވަނީ 13 ކުޅިވަރެއްގައި ބައިވެރިވެފައެވެ. އެގޮތުން ރާއްޖެއިން ބައިވެރިވި ކުޅިވަރުތަކަކީ އެތްލެޓިކްސް، ބާސްކެޓް ބޯޅަ، ކްރިކެޓް، ފުޓުބޯޅަ، ސްވިމިންގ، ސޫޓިންގް، ޓޭބަލް ޓެނިސް، ޓެނިސް، ވޮލީ ބޯޅަ، ބެޑްމިންޓަން، ހޭންޑް ބޯޅަ އަދި ތްރީ އޮން ތްރީ ބާސްކެޓް ބޯޅައެވެ.
މިފަހަރުގެ ސާފް ގޭމްސްގައި ރާއްޖޭގެ ކޮންޓިޖެންޓްގެ އަދަދަކީ 213 އެވެ. ރާއްޖޭގެ ކޮންޓިޖެންޓްގެ ދިދަ މިއަހަރު އުފުލައިލާފައިވަނީ އަންހެން ވޮލީ ޓީމު ކެޕްޓަން ހައްވާ ރާޝިދާއެވެ.
ސާކްގެ 7 ގައުމަކުން ބައިވެރިވާ ސައުތް އޭޝިއަން ގޭމްސް އާދީއްތަ ދުވަހު ނޭޕާލުގެ ދަޝްރަތް ސްޓޭޑިއަމްގައި ރަސްމީކޮށް ހުޅުވައި ދެއްވީ ނޭޕާލުގެ ރައީސް ބިދްޔާ ދާވީއެވެ. މި ރަސްމިއްޔާތުގައި ނޭޕާލުގެ ސަގާފަތް ދައްކައިލައިފައިވާއިރު ހަވާ އެރުވުމުގެ ހަރަކާތްތަކަކާއި އެކު ގޭމްސްގެ ރަސްމީ ލަވަ ވަނީ ކިޔައިފައެވެ.
މިއަހަރުގެ ގޭމްސްގައި 8000 އަށްވުރެ ގިނަ އެތްލީޓުން ވާދަކުރާއިރު މިއީ ނޭޕާލުގައި ސައުތް އޭޝިއަން ގޭމްސް ބޭއްވޭ ތިންވަނަ ފަހަރެވެ.
