ކުޅުދުއްފުށީގައި ފެންބޮޑުވެ ބައެއް ގެތަކުން މީހުން ހުސްކުރަނީ
1 ޑިސެމްބަރު 2019 | އާދީއްތަ 08:35ރަށުގެ 20 ގެއަކަށް ފެނުގެ އަސަރު ކޮށްފައިވާ ކަމަށް ވިދާޅުވި
ހދ. ކުޅުދުއްފުށީގެ މަގުތަކުގައި ފެންބޮޑުވެފައި
ރާއްޖެއަށް މިހާރު ކުރަމުންދާ ވިއްސާރައިގައި ހދ. ކުޅުދުއްފުށީ މަގުތަކުގައި ފެންބޮޑުވެ ބައެއް ގެތަކަށް ފެންވަނުމާއި ގުޅިގެން ތިން ގެއަކުން މީހުން ހުސްކުރުމުގެ މަސައްކަތް ކުރަމުންދާ ކަމަށް އެރަށު ކައުންސިލުން ބުނެފިއެވެ.
ރާއްޖެއެމްވީއަށް މައުލޫމާތުދެއްވަމުން ކުޅުދިއްފުށީ ކައުންސިލްގެ ރައީސް އަބްދުލް ލަތީފް ވިދާޅުވީ ބޯކޮށް ވާރޭވެހި ފެން ބޮޑުވުމުގެ ސަބަބުން ރަށުގެ 20 ގެއަކަށް ފެނުގެ އަސަރު ކޮށްފައިވާ ކަމަށެވެ. އަދި ތިން ގެއެއްގައި ބޭނުންކުރާ ތަކެއްޗަށް ފެނުގެ އަސަރު ކުރުމާއި ގުޅިގެން އެމީހުންގެ އާއިލާގެ ބައެއް ގެތަކަށް ބަދަލުކުރުމުގެ މަސައްކަތް ކުރަމުންދާ ކަމަށެވެ.
ނަރުދަމާ ނިޒާމުގައި ފެންބޮޑުވުމުގެ ސަބަބުން ބައެއް ގެތަކުގައި ފާޚާނާ ބޭނުން ކުރުމަށް ދަތިތަކާއި ކުރިމަލާން ޖެހިފައިވާ ކަމަށް ލަތީފް ވިދާޅުވިއެވެ.
ފެންހިނދުމުގެ މަސައްކަތުގައި ސަރުކާރުގެ ވުޒާރާތަކުން އެހީތެރިވަމުންދާކަން ލަތީފް ވަނީ ފާހަގަ ކުރައްވާފައެވެ.
ހއ. އަތޮޅުން ފެށިގެން ނ. އަތޮޅަށް މޫސުން ގޯސްވުމާއި ގުޅިގެން އާދިއްތަ ދުވަހު ހެނދުނު މޫސުމާއި ބެހޭ ގައުމީ އިދާރާއިން ވަނީ ވައިޓް އެލާރޓްވެސް ނެރެފައެވެ.
މި ދުވަސްވަރަކީ މޫސުން ގޯސް ދުވަސްވަރަކަށްވުމުން މެޓް އޮފީހުން ވަނީ މޫސުމަށް ސަމާލުވުމަށްވެސް އިލްތިމާސް ކޮށްފައެވެ.
