ލިވަޕޫލަށް ކުޅެމުން އަންނަ މިސްރުގެ ކެޕްޓަން މުހައްމަދު ސަލާހުގެ ސޮއި ހޯދަން ބަޔާން މިއުނިކް އާއި ޕެރިސް ސެއިންޓް ޖާމަން (ޕީއެސްޖީ) އިން މަސައްކަތް ފަށައިފިއެވެ.
ޑޮން ބަލޮން އިން ބުނީ، ކުރިޔަށް އޮތް ސީޒަނުގައި ސަލާހު ހޯދަން ބަޔާން އާއި ޕީއެސްޖީން މަސައްކަތް ކުރަމުން އަންނަ ކަމަށާއި، އެ ދެ ކްލަބުންވެސް ލިވަޕޫލާއެކު މަޝްވަރާ ކުރަން ތައްޔާރަށް އޮތް ކަމަށެވެ.
ދުނިޔޭގެ ނަން މަޝްހޫރު ގިނަ ކްލަބުތަކުން އަންނަނީ ސަލާހު ހޯދުމަށް މަސައްކަތް ކުރަމުންނެވެ. އޭގެ ތެރޭގައި ބާސެލޯނާ އާއި ރެއާލް މެޑްރިޑްވެސް ހިމެނެއެވެ.
ރިޕޯޓްތައް ބުނާގޮތުން ސަލާހުގެ ޓްރާންސްފާއާ ބެހޭގޮތުން ލިވަޕޫލްއިން ހަމައެކަނި މަޝްވަރާކުރާނީ 200 މިލިއަން ޔޫރޯއަށްވުރެ ބޮޑު އަގެއް ހުށަހަޅާ ކްލަބަކާ އެވެ.
މީގެ ކުރިން ބަސެލް އާއި ޗެލްސީއަށް ކުޅެފައިވާ ސަލާހު ވަނީ ފިއޮރެންޓީނާ އަދި ރޯމާއަށްވެސް ކުޅެފައެވެ. އޭނާ ލިވަޕޫލަށް ބަދަލުވީ 2017 ވަނަ އަހަރުގެ ސީޒަނުގައެވެ.
އެގޮތުން ސަލާހު ވަނީ ލިވަޕޫލަށް މިހާތަނަށް ކުޅުނު ތިން ސީޒަނުގައި 122 މެޗުން 80 ލަނޑު ކާމިޔާބުކޮށް، އެޓީމާއެކު ޗެމްޕިއަންސް ލީގު އެއްފަހަރު، ޗެމްޕިއަންސް ލީގުގެ ދެވަނަ އެއްފަހަރު އަދި ޔުއެފާ ސުޕަކަޕް ކާމިޔާބުކޮށްފައެވެ.
ބަސެލްއާއެކު ދެ ސްވިސް ސުޕަ ލީގު ކާމިޔާބުކޮށްފައިވާ ސަލާހު ވަނީ ސްވިސް ސުޕަ ލީގުގެ އެންމެ މޮޅު ކުޅުންތެރިޔާގެ މަގާމު 2013 ވަނަ އަހަރު ހޯދާފައެވެ.
މިސްރުގެ 20 އަހަރުން ދަށުގެ ޓީމު އަދި 23 އަހަރުން ދަށުގެ ޓީމާއެކު ކާމިޔާބީ ހޯދާފައިވާ ސަލާހު ވަނީ 2017 ވަނަ އަހަރު މިސްރުގެ ސީނިއަރ ޓީމާއެކު އެފްރިކަން ކަޕް އޮފް ނޭޝަންސްގެ ދެވަނަ ހޯދާފައެވެ.
ސަލާހު ވަނީ މިހާތަނަށް މިސްރު ގައުމީ ޓީމަށް ކުޅުނު 67 މެޗުގައި 41 ލަނޑު ކާމިޔާބުކޮށްފައެވެ.
