ސަރުކާރުގެ ވިސްނުމަކީ ރައްޔިތުންނަށް ބޭނުންވާ އަސާސީ ހިދުމަތް އަވަހަށް ފުރިހަމަކުރުން: ސައީދު
29 ނޮވެމްބަރު 2019 | ހުކުރު 07:57ސަރުކާރުން ވައުދު ފުއްދުމުގައި ރަށުގެ އާބާދީއަކަށް ނުބަލާނެ
ހއ.އުލިގަމުގައި ބޭއްވުނު ރަސްމިއްޔާތުގައި ފެނަކައިގެ އެމްޑީ ސައީދު ވާހަކަ ދައްކަވަނީ
ރައީސް ސޯލިހުގެ ސަރުކާރުގެ ވިސްނުމަކީ ކުޑަ އާބާދީއެއްތޯ ނުވަތަ ބޮޑު އާބާދީއެއްތޯ ބެލުމެއްނެތި އެއްވެސް ރަށެއް އިސްތިސްނުވާގޮތަށް ރައްޔިތުންނަށް ބޭނުންވާ އަސާސީ ހިދުމަތް ވީހާވެސް އަވަހަކަށް ފުރިހަމަކުރުންކަމަށް ފެނަކަ ކޯޕަރޭޝަންގެ މެނޭޖިންގް ޑިރެކްޓަރ އަހުމަދު ސައީދު މުހައްމަދު ވިދާޅުވެއްޖެއެވެ.
ހއ.އުލިގަމު އަލަށް އިމާރާތްކުރެވޭ އިންޖީނުގޭގެ ބިންގާ އެޅުމުގެ ރަސްމިއްޔާތުގައި ވާހަކަދައްކަވަމުން ފެނަކަ ކޯޕަރޭޝަންގެ މެނޭޖިންގް ޑިރެކްޓަރ އަހުމަދު ސައީދު މުހައްމަދު ވިދާޅުވީ މި ސަރުކާރަކީ، ރައްޔިތުންނާއި ވަރަށް ގާތުން ރައްޔިތުންގެ އިހްސާސްތަކާއެއްގޮތަށް ހިދުމަތް ދޭން އައި ސަރުކާރެއްކަމަށެވެ.
ހަފްލާގައި ވާހަކަދައްކަވަމުން ސައީދު އިތުރަށް ވިދާޅުވީ ރައީސްގެ ވައުދުފުޅު ފުރިހަމަކުރަން ފެނަކަ ކޯޕަރޭޝަންގެ މަސްއޫލިއްޔަތަކީ ރަށްރަށަށް ދިމާވެފައިވާ ކަރަންޓުގެ މައްސަލަ ހައްލުކުރުންކަމަށާއި އެ މަސައްކަތް ކާމިޔާބުކުރުމަށް ފެނަކަ ކޯޕަރޭޝަނުން ރެޔާއި ދުވާލު މަސައްކަތް ކުރަމުންގެންދާކަމަށެވެ.
އުލިގައުމުގެ ރައްޔިތުންނާއި މުހާތަބްކުރައްވާ ވާހަކަ ދައްކަވަމުން ސައީދު ވިދާޅުވީ، އުލިގަމުގެ އިންޖީނުގެއާއި ބޭހޭ ތަފްސީލުތަށް ސަމާލުކަމަށް ގެނެވުނު ހިސާބުން ފެށިގެން ދާއިރާގެ މެމްބަރު އަރިހުގައި ރަށުގެ ރައްޔިތުން ބޭނުންވާ ގޮތް ހޯދުމަށް އެދިފައިވާނެކަމަށާއި ބިންގާ އެޅިގެން މިދިޔައީ ރައްޔިތުންގެ މަޝްވަރާއާއެކު، ރައްޔިތުން ބޭނުންވާ ތަނެއްގައިކަމަށެވެ.
މި ބިންގާ އެޅުނު އިންޖީނުގެ ރައްޔިތުން ދިރިއުޅޭ ހިސާބާއި ކިތަންމެ ދުރުގައި އިމާރާތް ކުރެވިފައި ހުރި ނަމަވެސް އޮފީހަށް އަންނަން ޖެހޭ މާބޮޑު ބޭނުމެއް ނޯންނާނެ ކަން ފާހަގަކޮށް ސައީދު ވިދާޅުވީ، ކުރިޔަށް އޮތް ޑިސެމްބަރު މަހުގެ ތެރޭގައި ގޭތެރޭ ތިބެގެން ކަރަންޓް ބިލް ދެއްކުމުގެ ނިޒާމް ހަމަޖެހިގެންދާނެ ކަމަށެވެ. މީގެއިތުރުން މިފެށޭ އަހަރުގެ ޖެނުއަރީ މަހުގައި ލިބޭ ބިލަކީ، ގޭ ދޮރުމަތީ ހުރެގެން ޕްރިންޓް ކުރެވިގެން ނުކުންނަ ކުޑަކުޑަ ބިލަކަށް ވެގެންދާނެ ކަމަށްވެސް ސައީދު ވަނީ ވިދާޅުވެފައެވެ.
އުލިގައުމުގައި އަލަށް އިމާތް ކުރާ މި އިންޖީނުގޭގެ މަސައްކަތް ފެނަކަ ކޯޕަރެޝަނުން ހަވާލު ކޮށްފައިވަނީ 2 އެލް ކޮންސްޓަރަކްޝަން ޕްރައިވެޓް ލިމިޓެޑާ މި މަސައްކަތް 170 ދުވަހުގެ ތެރޭގައި މަސައްކަތް ނިންމާގޮތަށެވެ. މިއީ 5.5 މިލިއަން ރުފިޔާގެ މަޝްރޫއެކެވެ.
