އެމްއާރްއެމްއިން ފުރުސަތު ދިނުމުގައި އާއިލީ މަސްލަހަތަކަށް ނުބަލާނެ: ނާދިރާ
28 ނޮވެމްބަރު 2019 | ބުރާސްފަތި 19:24އެމްއާރްއެމްގެ އެކްޒެކެޓިވް ކޮމެޓީގައި އާއިލީ ބޭފުޅެއް ނުހުންނާނެ
އެމްއާރްއެމްގެ ނައިބް ރައީސް އައިމިނަތު ނާދިރާ
މޯލްޑިވްސް ރިފޯރމް މޫވްމަންޓް (އެމްއާރްއެމް) އިން ކުރީގެ ރައީސް މައުމޫން އަބްދުލްޤައްޔޫމްގެ ޢާއިލާ ބޭފުޅުންނަށް ވަކިން ޚާއްސަކޮށް ފުރުޞަތުތައް ނުދޭ ކަމަށާއި، ހަމަހަމަ އުސޫލަކުން ޕާޓީގެ ހުރިހާ މެމްބަރުން ކުރިއަށްދިއުމަށް މަގު ދައްކައިދޭ ކަމަށް އެޕާޓީގެ ނައިބު ރައީސް އައިމިނަތު ނާދިރާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގުރާމުގައި ނާދިރާ ވިދާޅުވީ އެމްއާރްއެމްގެ އުޞޫލުތަކާއި ޤަވާއިދުގައި ޕާޓީގެ ކަންކަން ކުރިއަށް ގެންދަންވާ ގޮތާއި ޢަމަލު ކުރަންވީ ގޮތް ވަރަށް ތަފުޞީލުކޮށް ލިޔެފައިވާ ކަމަށާއި، އެޤަވާއިދާ އުޞޫލުން ބޭރުން އެއްވެސް ކަމެއް ނުހިނގާނެ ކަމަށެވެ.
ޕާޓީގައި ރައީސް މައުމޫންގެ ޢާއިލީ މަޞްލަޙަތު ވަރަށް ބޮޑަށް ގެންގުޅުއްވާ ކަމަށް ދެކެވޭ ވާހަކަތަކަށް ރައްދުދެއްވައި ނާދިރާ ވިދާޅުވީ އެމްއާރްއެމްގެ އެކްޒެކެޓިވް ކޮމެޓީއަށް ބަލާފިނަމަ ޙަޤީޤަތް ހާމަވާނެ ކަމަށާއި، އެކޮމެޓީގައި ވެސް ރައީސް މައުމޫންގެ ޢާއިލީ ބޭފުޅެއް ނުހުންނަވާނެ ކަމަށް ނާދިރާ ވިދާޅުވިއެވެ.
ނާދިރާ ވިދާޅުވީ އެމްއާރްއެމުން މަސައްކަތް ކުރަނީ ތަންދޮރު އޮޅުން ފިލާފައި ތިބި ޒުވާނުންނަށް ފުރުޞަތު ދިނުމަށް ކަމަށާއި، ރައްޔިތުންނަށްޓަކައި މަސައްކަތް ކުރާ ދަރިންނަށް މަގު ދައްކައިދިނުމަށް ކަމަށެވެ. ނަމަވެސް ރާއްޖެއަކީ ކުޑަތަނަކަށްވެފައި ޢާއިލީ ގޮތުން ކޮންމެވެސް ހިސާބަކުން ގުޅިފައި އޮތް ނަމަވެސް ޕާޓީގެ ކަންކަމުގައި ޢާއިލާއަށް ނުބަލާ ކަމަށް ނާދިރާ ވިދާޅުވިއެވެ.
އެމްއާރްއެމްއާ ގުޅުމުގެ ފުރުޞަތު ދިވެހި ރައްޔިތުންނަށް ހުޅުވާލެވިފައިވާކަން ފާހަގަކުރައްވައި ނާދިރާ ވިދާޅުވީ މިހާރު ޕީޕީއެމްގައި ތިބި މެމްބަރުން ވެސް އެމްއާރްއެމްއާ ގުޅެން ބޭނުންވާނަމަ އެފުރުޞަތު ވެސް ލިބޭނެ ކަމަށެވެ.
އެމްއާރްއެމްގެ ސެކްރެޓްރީ ޖެރަނަލް އަބްދުލް ޢަލީމް ވިދާޅުވީ ރައީސް އިބްރާހިމް މުޙައްމަދު ޞާލިޙުގެ މިސަރުކާރު ގެނައީ ވަރަށް ބުރަ މަސައްކަތްތައް ކޮށްގެން ކަމަށެވެ.
އެގޮތުން މިސަރުކާރުގެ ތެރެއިން ޙިއްސާއެއް ލިބުނު ކަމަށާއި، އެމަޤާމުތަކަށް ނަން ފޮނުވިއިރު، ރައީސް މައުމޫންގެ ޢާއިލީ ބޭފުޅުންގެ ނަންފުޅުތައް ފޮނުވުމަށް އަންގާފައިނުވާ ކަމަށެވެ. އެކަން ވެސް ކުރެއްވީ މެމްބަރުންގެ މެދުގައި މަޝްވަރާ ކުރެވި، ވަރަށް ހަރުދަނާ އުޞޫލެއްގެ ތެރެއިން ކަމަށް އަލީމް ވިދާޅުވިއެވެ. އަދި ރައީސް މައުމޫނަކީ ސިޔާސީ ލީޑަރުން އުފައްދާ މަގުދައްކުވައިދޭ ލީޑަރެއް ކަމަށް ވެސް ޢަލީމް ވިދާޅުވިއެވެ.
