ކަންގަނާގެ މޭކަޕަށް ފާޑުކިޔަސް "ތަލައިވީ"ގެ ޓީޒާއަށް ބޮޑު ތަރުހީބެއް!

އިންޑިއާގެ ދެކުނު ޓެމިލްނާޑޫ ސްޓޭޓްގެ ކުރީގެ ޗީފް މިނިސްޓަރު ޖަޔަލަލީތާގެ ވާހަކަ ކިޔައިދޭ ފިލްމު "ތަލައިވީ" ގެ ޓީޒާއަށް ބޮޑު ތަރުހީބެއް ލިބިއްޖެއެވެ.

މި ހިނގާ ނޮވެމްބަރު މަހުގެ 23 ވަނަ ދުވަހު ޔޫޓިއުބްގައި އާންމުކުރި އެ ޓީޒަރ މިހާތަނަށް 4،598،560 (ހަތަރު މިލިއަން ފަސް ލައްކަ ނުވަދިހަ އަށް ހާސް ފަސް ސަތޭކަ ފަސްދޮޅަށް) މީހުން ވަނީ ބަލާފައެވެ.

ޓީޒާއިން ފެންނަ އެ ފިލްމުގެ ލީޑު ތަރި ކަންގަނާ ރަނައުތުގެ މޭކަޕަށް ގިނަ ބަޔަކު އަންނަނީ ފާޑު ކިޔަމުންނެވެ. އެހެން ނަމަވެސް އޭނާގެ މޭކަޕް އެ ފިލްމުގައި ކޮށްފައިވަނީ ހޮލީވުޑްގެ "ކެޕްޓަން މާވެލް" ފަދަ ފިލްމުތަކުގެ މޭކަޕް އާޓިސްޓް ޖޭޒަން ކޮލިންއެވެ. ޖޭ ޖަޔާލަލީތާ ގެ ރޯލުން ކަންގަނާ ފެންނަ އިރު އޭނާ އެ ރޯލު ކުޅެދިނީ 24 ކުރޯރު ރުޕީޒް (34,69,687 އެމެރިކާ ޑޮލަރު) އަށް ކަމަށް ޚަބަރުތައް ބުނެއެވެ.

"ތަލައިވީ" އިން ދައްކުވައިދޭނީ ޖަޔަ ޖަޔާލަލީތާ އިންޑިއާގެ ނުފޫޒު ގަދަ ސިޔާސީ ލީޑަރަކަށްވެގެން ދިޔަ ގޮތެވެ.

އެ ފިލްމުގެ ހުރިހާ މަސައްކަތެއް ނިންމާ ބެލުންތެރިންނާ ހަމަޔަށް ގެނެސްދެން ނިންމާފައިވަނީ އަންނަ އަހަރުގެ ޖޫން މަހުގެ 26 ވަނަ ދުވަހުއެވެ.