ފުލުހުންގެ ތެރޭ ހަރުކަށި ފިކުރެއް ނެތް، އެކަން ހުއްޓުވުމަށް ފުލުހުން ފެއިލްވެފައިވާކަމަށް ގަބޫލެއް ނުކުރަން: އިމްރާން

ހައްދުފަހަނައަޅާ ދިޔުމާއި ދީނީ ހަރުކަށި ފިކުރުގެ މީހުން ފުލުހުންގެ ތެރޭގައި ފާހަގަކުރެވިގެން ނޫޅޭކަމަށް ހޯމް މިނިސްޓަރ އައްޝައިޚް އިމްރާން އަބްދުﷲ ވިދާޅުވެއްޖެ އެވެ.

އަންގާރަ ދުވަހުގެ ޖަލްސާގައި ރައްޔިތުންގެ މަޖިލީހުގެ މެމްބަރުންވަނީ ފުލުހުންގެ ތެރޭގައި ހައްދުފަހަނައަޅާ ދިޔުމާއި ދީނީ ހަރުކަށި ފިކުރު އޮތްތޯ އާއި އެކަން ހުއްޓުވުމަށް ފުލުހުން ފެއިލްވެފައިވޭތޯ ތަކުރާރުކޮށް އައްސަވާފައެވެ. މެމްބަރުންގެ ސުވާލުތަކަށް ޖަވާބުދެއްވަމުން މިނިސްޓަރ ވިދާޅުވީ ފުލުހުންގެ ތެރޭގައި ހަރުކަށި ފިކުރުގެ ބަޔަކު ތިބިތޯ ބެލުމުގެ މަސައްކަތް އަބަދުވެސް ކުރުމަށް ފުލުހުންގެ އިސްވެރިންނަށް އަބަދުވެސް ހަނދާންކޮށްދެމުން ދާކަމަށެވެ. އަދި އެފަދަ ބަޔަކު އުޅޭނަމަ އެކަމަށް ޖާގަ ނުދެއްވާނެކަމަށް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ ޓެރަރިޒަމާއި ގުޅުންހުރި ކަންކަން ރާއްޖޭގައި 2007 ވަނަ އަހަރުން ފެށިގެން ހިނގަމުން އަންނަކަަމަށެވެ. އަދި މިހިސާބަށް މިކަން އައިސްފައިވަނީ އެކަމާގުޅުންހުރި ފިޔަވަޅުތައް އެޅިފައިނުވާތީ ކަމަށް މިނިސްޓަރ ވިދާޅުވި އެވެ. މިނިސްޓަރ ވިދާޅުވީ މިސަރުކާރުން އަންނަނީ ޓެރަރިޒަމްގެ އަމަލުތައް ހުއްޓުވުމަށް މަސައްކަތް ކުރަމުން ކަމަށާއި އެގޮތުން ޓެރަރިޒަމްގެ ޤާނޫނަށް ބޮޑެތި އިސްލާހުތަކެއް ރައްޔިތުންގެ މަޖިލީސް ޗުއްޓީގައި އޮވެގެން ގެނެސްފައިވާކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ ޓެރަރިޒަމް ހުއްޓުވުމަށް ގިނަ މަސައްކަތްތަކެއް ކުރެވި، ޓެރަރިޒަމަށް ހިތްވަރުދޭ ޖަމާޢަތްތަކުގެ ބަޔަކު ހައްޔަރުކޮށްފައި ވެއެވެ.

މިނިސްޓަރ ވިދާޅުވީ މިކަން ހައްލުކުރުމަށް ފުލުހުން އެކަނި މަސައްކަތް ކުރަންޖެހޭ ކަމަށް ޤަބޫލުނުކުރައްވާކަމަށާއި ހުރިހާ މުއައްސަސާތަކެއް ގުޅިގެން ބޮޑެތި މަސައްކަތްތަކެއް ކުރަންޖެހޭ ކަމަށް ޤަބޫލުކުރައްވާކަމަށެވެ.