ސައްތަ ކިލޯގެ ވަނަތަކަށް ހޮވުނު ފަރާތްތަކަށް އިނާމު ދީފި

ރަމަޟާން މަހު ރާއްޖެޓީވީން ގެނެސްދިން "ސައްތަކިލޯ" ޕްރޮގްރާމުގެ ވަނަތަކަށް ހޮވުނު ފަރާތްތަކަށް އިނާމު ދީފިއެވެ.

ރާއްޖެޓީވީ އާއި ހުޅުމާލެ ފިޓްޒޯން ޖިމާއެކު ކުރިއަށް ގެންދިޔަ ސައްތަކިލޯ ޕްރޮގުރާމުގައި ބައިވެރިވެ އެންމެ ބޮޑު ބަދަލެއް އައިސްފައިވާ 3 ފަރާތަކަށް އިނާމު ދީފައިވާއިރު، ތިން މަސްދުވަހަށް ކުރިއަށްގެންދިޔަ މިޕްރޮގުރާމުގައި ބައިވެރިވި ހުރިހާ ބައިވެރިން ވެސް ވަނީ ވަރަށް ބޮޑަށް ބަރުދަން ލުއިކޮށްފައެވެ.

ތިން މަސް ދުވަހުގެ މި ޕްރޮގުރާމުން 28 ކިލޯ ލުއިކޮށްގެން އޭގެ ތެރެއިން 1 ވަނައަށް ހޮވިފައިވަނީ ޒިޔަމް އަބްދުﷲ ހާދީއެވެ. އެގޮތުން ޒިޔަމް ބުނީ، މި ޕްރޮގުރާމުގެ ސަބަބުން ދިރިއުޅުމަށް ރަނގަޅު ބަދަލުތަކެއް އައި ކަމަށާއި، މިހާރު ކުރިއަށްދަނީވެސް "ފިޓްނަސް" ގެ ދާއިރާއިން ކަމަަށެވެ.

މި ޕްރޮގުރާމުގެ 2 ވަނައަށް ގޮސްފައިވަނީ މުހައްމަދު ތަސްނީމްއެވެ. އެގޮތުން ތަސްނީމު ވަނީ 22 ކިލޯ ލުއިކޮށްފައެވެ. އަދި ޕްރޮގުރާމުގައި 3 ވަނައަށް ހޮވުނު ފާތިމަތު އިރުޒާނާ ވަނީ 92 ކިލޯއިން 73 ކިލޯއަށް ބަރުދަން ލުއިކޮށް، 18 ކިލޯ ލުއިކޮށްފައެވެ.

މި ޕްރޮގުރާމުގައި ލިބުނު ކާމިޔާބީއާއި ގުޅޭގޮތުން ޕްރޮގުރާމުން 3 ވަނައަށް ހޮވުނު ފާތިމަތު އިރުޒާނާ ބުނީ، މިފަދަ ޕްރޮގުރާމުތަކުގެ ސަބަބުން ވަރަށް ފައިދާވާ ކަމަށާއި، ގޮންޖެހުންތަކާއެކުވެސް 3 ވަނައަށް ހޮވުމުން އުފާވާ ކަމަށެވެ.

މި ޕްރޮގްރާމާއި ގުޅޭގޮތުން ރާއްޖެޓީވީއަށް މައުލޫމާތު ދެއްވަމުން ފިޓްޒޯންގެ މޭނޭޖިންގ ޑިރެކްޓަރ އަހުމަދު ރިޔާޒް (ރިޔާ) ވިދާޅުވީ، 3 މަހުގެ މުއްދަތަކަށް ބަލާއިރު ބައިވެރިންގެ ފަރާތުން ލިބުނު އެއްބާރުލެއްވުން ފާހަގަކުރެވޭ ކަމަށާއި، ޕްރޮގްރާމް ދިޔަ ގޮތާއިމެދު ވަރަށް ހިތްހަމަޖެހޭ ކަމަށެވެ.

ރިޔާ އިތުރަށް ވިދާޅުވީ، ދުޅަހެއު ސިއްހަތެއްގައި ހުރުމަށް ބޭނުންވާ ނުވަތަ ހިކެން ބޭނުންވާ ފަރާތެއް ހުރި ނަމަވެސް ފިޓްޒޯން ޖިމްއިން އެ ފުރުސަތު ހުޅުވާލެވިފައިވާ ކަމަށާއި، އެފަދަ ފަރާތްތަކަށް އެ ޖިމްއިން އަބަދުވެސް މަރުހަބާ ކިޔާނެ ކަމަށެވެ.

މުޅިން ހިލޭ ބައިވެރިވެވޭގޮތަށް ރާއްޖެޓީވީން ކުރިއަށް ގެންދިޔަ މި ޕްރޮގުރާމް ފާއިތުވި 2 އަހަރުވެސް ކުރިއަށް ގެންގޮސްފައިވެއެވެ. އެގޮތުން މި ޕްރޮގުރާމުގައި ބައިވެރިވާ ގިނަ ފަރާތްތަކަކީ ސައްތަ ކިލޯއަށް ވުރެ ބަރު ފަރާތްތަކެކެވެ.