ރާއްޖެ އަށް މި އަހަރު އައި ޓޫރިސްޓުންގެ އަދަދު 1.5 މިލިއަނަށް އަރައިފި
1.5 މިލިއަން ވަނަ ފަތުރުވެރިޔާ އަށް މަރުހަބާ ކިޔުމަށް ހާއްސަ ހަރަކާތްތައް ހިންގާފައިވޭ
1.5 މިލިއަން ވަނަ ފަތުރުވެރިޔާ އަކީ ރަޝިއާ ރައްޔިތެއް
މިސަރުކާރުން މިއަހަރު ރާއްޖެއަށް ފަތުރުވެރިން ގެންނަން ކަނޑައެޅި އަމާޒު ހާސިލުކޮށްފިއެވެ.
ރައީސުލް ޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުން އަމާޒު ހިފީ މި އަހަރު ނިމޭއިރު 1.5 މިލިއަން ފަތުރުވެރިން ރާއްޖެ ގެނައުމަށެވެ. މިއަަހަރު ނިމުމުގެ ކުރިން އެ އަމާޒު ސަރުކާރުން ހާސިލުކޮށްފައިވާއިރު އާދިއްތަ ދުވަހުގެ ހެނދުނު 1.5 މިލިއަން ވަނަ ފަތުރުވެރިޔާ ވަނީ ރާއްޖެ އައިސްފައެވެ.
ރާއްޖެއަށް އައި 1.5 މިލިއަން ވަނަ ފަތުރުވެރިޔާއަކީ ރަޝިއާގެ، މަރިޔާނާ ކަސަޚޯވާއެވެ. ވެލާނާ އިންޓަރނޭޝަނަލް އެއަރޕޯޓުގައި މަރިޔާނާ އަށް މަރުހަބާ ކިޔާފައިވަނީ ޓޫރިޒަމް މިނިސްޓަރ އަލީ ވަހީދުއެވެ. މީގެ އިތުރުން އެމްއެމްޕީއާރުސީ އާއި ޓޫރިޒަމް މިނިސްޓްރީ ގުޅިގެން ވަނީ މަރިޔާނާ މަރުހަބާ ކިޔުމަށް ޚާއްސަ ހަރަކާތެއް ވެސް ބާއްވާފައެވެ.
މަރިޔާނާ އަށް މަރުހާބާ ކިޔުމުން އޭނާ ވަނީ ސަރުކާރަށް ޝުކުރު އަދާކޮށް، މިއަދަކީ ވަރަށް އުފާވެރި ދުވަހެއްގެ ގޮތުގައި ސިފަކޮށްފައެވެ. މަރިޔާނާ ބުނީ ރާއްޖެއަކީ ފަތުރުވެރިން ޗުއްޓީ ހޭދަކުރުމަށް އެންމެ ގަޔާވާ މަޤުބޫލް މަންޒިލްކަމުގައެވެ.
ރާއްޖެއަށް އައި 1.5 މިލިއަން ފަތުރުވެރިއާގެ ޝަރަފު ލިބުނު މަރިޔާނާ އަށް ޚާއްސަ ހަދިޔާތަކުގެ ގޮތުގައި، މިރިހި އައިލެންޑް ރިސޯޓުން ޗުއްޓީ ދަތުރެއް ދީފައިވާއިރު، މި ދަތުރުގެ ސްޕޮންސަރ ކޮށްފައިވަނީ އެމްއެމްޕީއާރުސީންނެވެ. އަދި ޚާއްސަ ސެޓްފިކެޓެއް ވެސް އޭނާއަށް ސަރުކާރުގެ ފަރާތުން ދީފައިވެއެވެ. މީގެ އިތުރުން ރާއްޖޭގެ އަތްތެރި މަސައްކަތް ދައްކުވައިދޭ ލިޔެލާ ޖެހި އުފެއްދުންތައް ވެސް މަރިއާނާ އަށް ހަދިޔާކޮށްފައިވެއެވެ.
