ޓުއަރިޒަމް ސިނާއަތަށް ރައްޔިތުންގެ އިތުބާރު އަލުން ލިބިއްޖެ: ޓޫރިޒަމް މިނިސްޓަރ
24 ނޮވެމްބަރު 2019 | އާދީއްތަ 08:36ރާއްޖެ ކުރިއެރުވުމަށް ރާއްޖެ ސުލްހަމަސްލަސްކަން މަތީ ބާއްވަން ކޮންމެ ރައްޔިތަކުވެސް މަސައްކަތްކުރަން ޖެހޭ
ޓޫރިޒަމް މިނިސްޓަރ އަލީ ވަހީދު
ފަތުރުވެރިކަމުގެ ސިނާއަތަށް ރައްޔިތުންގެ އިތުބާރު އަނބުރާ ލިބިއްޖެކަމަށް ޓޫރިޒަމް މިިނިސްޓަރ އަލީ ވަހީދު ވިދާޅުވެއްޖެއެވެ.
އާދިއްތަ ދުވަހުގެ ހެނދުނު ވެލާނާ އިންޓަރނޭޝަނަލް އެއަރޕޯޓުގައި، ޓޫރިޒަމް މިނިސްޓްރީން 2019 ވަނަ އަހަރަށް ކަނޑައަޅާފައިވާ ޓާގެޓް 1.5 މިލިއަން ވަނަ ފަތުރުވެރިޔާ ރާއްޖެއައުމާއި ގުޅިގެން އެކަން ފާހަގަކުރުމަށް ބޭއްވި ހަފުލާއަށް ފަހު މީޑިއާތަކަށް މައުލޫމާތު ދެއްވަމުން ޓޫރިޒަމް މިނިސްޓަރ އަލީ ވަހީދު ވިދާޅުވީ، މީގެކުރިން ޓޫރިޒަމް މިނިސްޓްރީއާއި އެމްއެމްޕީއާރުސީ އަކީ ރައްޔިތުންގެ ކުރިމަތީގައި އަގުވެއްޓިފައިވާ މުއައްސަސާތައްކަމަށާއި، މި ސަރުކާރު ވުޖޫދަށް އައުމަށް ފަހު ކުރެވުނު މަސައްކަތުން ދެތަނަކީވެސް ރައްޔިތުންގެ އިތުބާރު ލިބިފައިވާ ތަނެއްގެ ގޮތުގައި ހެދިފައިވާކަމަށެވެ.
ރައީސް އިބްރާހިމް މުހައްމަދު ސާލިހުގެ މެނިފެސްޓޯގައި ރިސޯޓު މުއައްޒަފުންނަށް ވަޒީފާ އަދާކުރުމަށްފަހު ދިރިއުޅޭ އަމިއްލަ ރަށަށް ދެވޭ ގޮތް ހެދުމަށް ވައުދުވެފައިވާކަން ފާހަގަކޮށް މިނިސްޓަރ ވިދާޅުވީ 2020 ވަނަ އަހަރު ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންނާއި އިންވެސްޓަރުންގެ އިތުބާރު ސަރުކާރަށް ލިބިގެންދާނެކަމަށް ގަބޫލުކުރާކަމަށެވެ. އެގޮތުން، ކުރަންޖެހޭ ހުރިހާ ތަހުލީލުުތަކެއް ނިމިފައިވާކަމަށާއި އަންނަ އަހަރަކީ ރާއްޖެއަކި އެންމެ ރީތި، ފަތުރުވެރިންގެ މެދުގައި އެންމެ މަގުބޫލު އަދި އެންމެ ރައްކައުތެރި މާހައުލަށް ހެދޭނެކަމާމެދު އެއްވެސް ޝައްކެއް ނެތްކަމަށެވެ.
އަންނަ އަހަރު ނިމުމުގެ ކުރިން ރާއްޖެއަށް 2 މިލިއަން ފަތުރުވެރިން ގެނައުމަކީ ޓުއަރިޒަމް މިނިސްޓްރީގެ އެންމެ ބޮޑު އެއް އަމާޒުކަމުގައި ފާހަގަކޮށް މިނިސްޓަރ އަލީ ވަހީދު ވިދާޅުވީ އެކަން ހާސިލު ކުރެވޭނެކަމާމެދު އެއްވެސް ޝައްކެއް ނުކުރާކަމަށެވެ. އެގޮތުން މިންސްޓަރ ވިދާޅުވީ މިދިޔަ އަހަރު ރާއްޖެ ޒިޔާރަތްކުރެއްވީ 1.4 މިލިއަން ފަތުރުވެރިންކަމަށާއި ސަރުކާރާއި ހަވާލުވި ފުރަތަމަ ފަހަރު ކަނޑައެޅި 1.5 މިލިއަން ހަމަވެއްޖެކަމަށެވެ. މިހާރު އަހަރު ނިމުމުގެ ކުރިން 1.6 މިލިއަނަށް ވުރެ ގިނަ ފަތުރުވެރިން ރާއްޖެ އަންނާކެމަށް އަންދާޒާކުރެވޭކަމަށް މިނިސްޓަރ ވިދާޅުވިއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ މިއަހރުގެ ރިޔާސީ ބަޔާނުގައި، މިއަހަރު ނިމޭއިރު 1.5 މިލިއަން ޓޫރިސްޓުން ރާއްޖެއަށް ޒިޔާރާތް ކުރުމަކީ ސަރުކާރުގެ ޓާގެޓެއް ކަމަށް ވިދާޅުވެފައިވާއިރު، އެކަން މިހާރު މިވަނީ ހާސިލުވެފައިވާކަން މިނިސްޓަރ ފާހަގަކުރެއްވިއެވެ. މިނިސްޓަރ ވިދާޅުވީ އެމްޑީޕީގެ މެނިފެސްޓޯއަކީ ވަރަށް ބޮޑަށް އިންތިޒާމުވެގެންވާ ސިޔާސީ ހަރަކާތެއްކަމަށާއި ދައުރު ނިމޭއިރު 2.5 މިލިއަން ފަތުރުވެރިން ރާއްޖެ އައުމަކީ ސަރުކާރުގެ ވަރަށްބޮޑު އަމާޒެއްކަަމަށެވެ.
ދިވެހިރާއްޖޭގެ ރައްޔިތުންގެ އާމްދަނީއާއި އުމްރާނީ ތަރައްގީގެ އެންމެ ބޮޑު އެއް ސިނާއަތަކީ ފަތުރުވެރިކަންކަން ފާހަގަކޮށް މިނިސްޓަރ އަލީ ވަހީދު ވިދާޅުވީ ރާއްޖެ ކުރިއެރުވުމަށް ރާއްޖެ ސުލްހަމަސްލަސްކަން މަތީ ބާއްވަން ކޮންމެ ރައްޔިތަކުވެސް މަސައްކަތްކުރުމަށް އިލްތިމާސްކޮށްފައެވެ.
