އެމްޑީޕީން ވޯޓުލި މީހުންގެ އަދަދު މަދޭ ބުނާތީ ނަޝީދުގެ ހޫނު ރައްދެއް އިދިކޮޅަށް
23 ނޮވެމްބަރު 2019 | ހޮނިހިރު 08:02ޕާޓީގެ މެމްބަރުން އެމަނިކުފާނަށް ކުރައްވާ އިތުބާރަށް ޝުކުރު އަދާކުރެއްވި
ރައީސް ނަޝީދު
ހުކުރު ދުވަހު ބޭއްވި މޯލްޑިވިއަން ޑިމިކްރެޓިކް ޕާޓީ (އެމްޑީޕީ) ގެ އެތެރޭގެ އިންތިޚާބުގައި ވޯޓުލާން ނިކުތް މީހުންގެ ޢަދަދު މަދުކަމަށް އިދިކޮޅުން ބުނަމުންދާތީ އެ ފަރާތްތަކަށް އެމްޑީޕީގެ ރައީސް މުޙައްމަދު ނަޝީދު ރައްދުދެއްވައިފިއެވެ.
އެމްޑީޕީގެ ރައީސާއި، ނައިބު ރައީސް އާ ދައުރަކަށް އިންތިޚާބު ކުރުމަށް ހުކުރު ދުވަހު ބޭއްވި އިންތިޚާބުގައި ނަޝީދު ވަނީ އެމްޑީޕީގެ ރައީސް ކަމުގެ މަޤާމު ދިފާޢުކުރައްވާފައެވެ. އެ ޕާޓީގެ ދަފްތަރުގައި 88،000 އަށް ވުރެ ގިނަ މެމްބަރުން ތިބޭއިރު ވަގުތީ ނަތީޖާ ދައްކާ ގޮތުން ވޯޓުލާފައިވަނީ 25،000 ހާސް ވަރަކަށް މީހުންނެވެ.
ރާއްޖޭގެ އެންމެ ބޮޑު ޕާޓީގައި ވޯޓުލާން ނިކުތް މީހުންގެ ޢަދަދު މަދުވުމުން އިދިކޮޅުގެ ފާޑު ކިޔުންތައް އެމްޑީޕީއަށް ވަނީ އަމާޒުވެފައެވެ.
ހޮނިހިރު ދުވަހު މޯލްޑިވިއަނުން ބޭއްވި ރަސްމީއްޔާތަކަށް އަށް ފަހު މީޑިއާތަކަށް މައުލޫމާތު ދެއްވަމުން ނަޝީދު ވިދާޅުވީ، ތަރައްޤީވެފައިވާ ޤައުމުތަކުގެ ސިޔާސީ ޕާޓީތަކުގައި ޖުމްލަކޮށް އުޅޭނީ ވޯޓު އާބާދީގެ ހަތް ޕަސެންޓް އާއި އަށްޕަސެންޓް ކަމަށެވެ. އެ ހަގީގަތަކީ އެމްޑީޕީ އުފެދިގެން އައިއިރުއްސުރެ ޕާޓީގެ މީހުންނަށް ބުނެދުމުން އަންނަ ކަމެއް ކަމަށް ވިދާޅުވިއެވެ. އެމަނިކުފާނު ވިދާޅުވީ، ވޯޓުލާން ނިކުތް 25،000 މީހުންނަކީ އެ ޕާޓީގެ މީހުންގެ ގޮތުގައި އެއްވެސް ބަދަލެއްނައިސް އެ ގޮތުގައި މަސައްކަތް ކުރަމުން އަންނަ މެމްބަރުން ކަމަށެވެ. އެއަށް ފަހު ނަޝީދު ވަނީ އިދިކޮޅުން ދައްކަމުންދާ ވާހަކަ އަށް ހޫނު ރައްދެއް ދެއްވާފައެވެ.
ރައީސް ކަމުގެ އިތުރު ދައުރަކަށް އިންތިޚާބު ކޮށްދެއްވާފައިވާތީ ޕާޓީގެ މެމްބަރުންނަށް ޝުކުރު އަދާކުރައްވަމުން ނަޝީދު ވިދާޅުވީ، އެމްޑީޕީގެ 99 ޕަސެންޓް މެމްބަރުން އެއްވެސް ޚިލާފެއް ނެތި އެމަނިކުފާނާއި މެދު ބާއްވާ އިތުބާރާ ޔަޤީން ކަމަކީ އެކަމާއި މެދު ޝުކުރު އަދާކުރައްވާ ކަމެއް ކަމަށެވެ.
ޕާޓީގެ މެމްބަރުން ބޭނުންވާ ގޮތަށް ޕާޓީގެ ރައީސްގެ ގޮތުގައި ދެމިހުންނަވާ ޕާޓީއަށް ކުރިއެރުން ހޯދައިދެއްވުމަށް މަސައްކަތް ކުރައްވާނެ ކަމަށެވެ.
