އެމްބީބީއޭ ނެޝަނަލް ބަނޑުފިލާ ޗެލެންޖް 2019 އަންނަ މަހު 10 ގައި

މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން އިންތިޒާމުކުރާ އެމްބީބީއޭ ނެޝަނަލް ބަނޑުފިލާ ޗެލެންޖް 2019 އަންނަ މަހު 10 ގައި ބާއްވަން ނިންމައިފިއެވެ.

އެމްބީބީއޭ އިން ބުނީ، މި މުބާރާތް އޮންނާނީ ޑިސެމްބަރ 10 އިން ފެށިގެން ޑިސެމްބަރ 19 ގެ ނިޔަލަށް ކަމަށާއި، މުބާރާތް ބާއްވާނީ ވަރުނުލާ ރާޅުގަނޑު ސަރަހައްދުގައި ކަމަށެވެ.

މުބާރާތުގައި ބައިވެރިވުމުގެ ފުރުސަތު ބުރާސްފަތި ދުވަހުގެ ރޭ ހުޅުވާލާފައިވާއިރު، އަންނަ ޑިސެމްބަރ މަހުގެ ނުވަ ވަނަ ދުވަހުގެ ހަވީރު 4 ޖަހަންދެން ރަޖިސްޓްރޭޝަންގެ ކަންތައް ކުރިޔަށްދާނެ ކަމަށް އެމްބީބީއޭ އިން ބުނެއެވެ.

މިއީ އެމްބީބީއޭ އިން ބާއްވާ ފުރަތަމަ ގައުމީ މުބާރާތެވެ. މީގެ ކުރިން އެމްބީބީއޭއިން ވަނީ މާލޭގެ އިތުރުން އަތޮޅު ތެރޭގައި ގިނަ މުބާރާތްތަކެއް ބާއްވާފައެވެ.