ގްރެމީ އެވޯޑްސް 2020 ނޮމިނޭޝަންތައް އިއުލާންކޮށްފި؛ ލިޒޯ، ބިލީ އަދި ލިލް ނާސް ތާރީހުގެ ތެރެއަށް!
62 ވަނަ ގްރެމީ އެވޯޑްސް އޮންނާނީ ޖެނުއަރީ މަހުގެ 26 ވަނަ ދުވަހު
(ކ - ވ) ލިލް ނާސް އެކްސް، ލިޒޯ އަދި ބިލީ އައިލިޝް
2020 ވަނަ އަހަރުގެ ގްރެމީ އެވޯޑްސްއަށް ނޮމިނޭޓްވި ފަރާތްތައް އިއުލާންކޮށްފިއެވެ.
62 ވަނަ ގްރެމީ އެވޯޑްސް އޮންނާނީ ޖެނުއަރީ މަހުގެ 26 ވަނަ ދުވަހެވެ. އަދި ޝޯވ ހުށަހަޅާނީ 15 ގްރެމީ އެވޯޑް ހާސިލްކޮށްފައިވާ އެލީޝާ ކީސްއެވެ.
ގްރެމީ އެވޯޑަކީ މިއުޒިކް ދާއިރާގެ އެންމެ ޝަރަފުވެރި އެވޯޑަށްވާއިރު، އަންނަ އަހަރުގެ ހަފްލާގައި 84 ކެޓަގަރީއަކަށް އިނާމް ދެވޭނެއެވެ.
ގްރެމީ އެވޯޑްސްގެ އެންމެ ބޮޑެތި ހަތަރު އެވޯޑްތަކަށް ނޮމިނޭޓްވި ފަރާތްތައް:
ރިކޯޑް އޮފް ދަ ޔިއަރ
އަލްބަމް އޮފް ދަ ޔިއަރ
ސޯންގް އޮފް ދަ ޔިއަރ
ބެސްޓް ނިއު އާޓިސްޓް
މި ނޮމިނޭޝަންތަކާއެކު، ދާއިރާއަށް 2019 ވަނަ އަހަރު އަލަށް ތައާރަފްވި އަދި "ބެސްޓް ނިއު އާޓިސްޓް" އަށް ނޮމިނޭޓްވި ބިލީ އައިލިޝް، ލިޒޯ އަދި ލިލް ނާސް އެކްސް ވަނީ ތާރީހުގެ ތެރެއަށް ވަދެފައެވެ.
އެގޮތުން، ލިޒޯގެ އަށް ނޮމިނޭޝަން އާއި ލިލް ނާސް އެކްސް އާއި ބިލީ އައިލިޝްގެ ހަ އެވޯޑް (ކޮންމެ މީހަކަށް)އާއެކު، މިއީ ނިއު އާޓިސްޓްއަކަށް މިހާ ގިނަ ނޮމިނޭޝަން ލިބުނު ފުރަތަމަ ފަހަރެވެ. އަދި 17 އަހަރުގެ ބިލީ އައިލިޝް އަކީ އެންމެ ބޮޑު ހަތަރު ކެޓަގަރީއަށް ނޮމިނޭޓްވި އެންމެ ހަގު ފަރާތެވެ.
ކޮރިއާއަށް ނިސްބަތްވާ ބޯއި ބޭންޑް "ބީޓީއެސް"އަށް ގްރެމީ ނޮމިނޭޝަނެއް ލިބިފައިނުވާއިރު، މިއީ އެކަޑަމީގައި އަދިވެސް ނަސްލީ ތަފާތުކުރުން އުޅޭކަމުގެ ހެއްކެއްކަމަށް ގިނަ ބައެއް ދެކެއެވެ.
އެ މީހުންގެ "މެޕް އޮފް ދަ ސޯލް" އޭޕްރިލް މަހު ރިލީޒްކޮށްފައިވާއިރު، އެ ލަވަ ފުރަތަމަ ވެސް އަރާފައިވަނީ ބިލްބޯޑް 200ގެ ލިސްޓްގެ އެއްވަނައަށެވެ. އަދި އެއް އަހަރު ތެރޭ ބީޓީއެސްގެ ތިން ލަވަ ޗާޓްތަކުގެ އެއްވަނަ އިން ފެނިފައިވާއިރު، މިކަން އެންމެ ފަހުން ހާސިލްކޮށްފައިވަނީ 1996 ވަނަ އަހަރު މަޝްހޫރެ ބޭންޑް "ބީޓްލްސް"އެވެ. ބީޓީއެސްގެ ޗާޓްގެ އެއްވަނަ އަށް އެރި އަނެއް ދެ ލަވައަކީ 2018 ވަނަ އަހަރު ރިލީޒްކޮށްފައިވާ "ލަވް ޔުއަރސެލްފް: ޓިޔަރ" އަދި "ލަވް ޔުއަރސެލްފް: އާންސަރ" އެވެ.
މީގެ އިތުރުން، ހޭލްސީއާއެކު އެ ބޭންޑް ރިލީޒްކުރި "ބޯއި ވިތް ލަވް" ވެގެންދިޔައީ 24 ގަޑިއިރު ތެރޭ އެންމެ ގިނަ ފަހަރަށް ބެލި ޔޫޓިއުބް ވީޑިއޯއަށެވެ. އެއީ 74.6 މިލިއަން ވިއުއާއެކުއެވެ.
ބީޓީއެސްގެ މި ހުރިހާ ކާމިޔާބާއެކުވެސް "ބެސްޓް ވޯލްޑް އަލްބަމް"ވެސް ހޮވާ، ގްރެމީ އެވޯޑްސްގެ ނޮމިނޭޝަނެއް ލިބިފައެއް ނުވެއެވެ.
