އިދިކޮޅު މެމްބަރުން ބޭނުންވީ މަރު ކޮމިޝަން ހާޒިރު ކުރަން، ފާހެއް ނުވި

އަވަހާރަކޮށްލާފައިވާ ދީނީ އިލްމުވެރިޔާ ޑރ. އަފްރާޝީމް އަލީގެ މަރުގެ މައްސަލާގައި ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީން ތައްޔާރު ކުރި ރިޕޯޓަށް އިދިކޮޅުން ހުށައެޅި ހުށައެޅުން ފާސްނުވެ ކޮމިޓީން ފާސްކުރި ގޮތަށް ތަޅުމަށް ފޮނުވަން ނިންމައިފިއެވެ.

ކޮމިޓީގައި ހިމެނިވަޑައިގަންނަވާ ގުރައިދޫ ދާއިރާގެ މެމްބަރު މުހައްމަދު ޣައްސާން މައުމޫން ހުށައެޅުއްވީ ރިޕޯޓުގެ ސައްހަކަން ޔަގީން ކުރުމަށްޓަކައި މަރު ކޮމިޝަންގެ މެމްބަރުން މަޖިލީހަށް ހާޒިރުކޮށް ސުވާލު ކުރުމަށެވެ.

އައްސާންގެ ހުށައެޅުމަށް ތާއިދުކުރެއްވީ ޕީއެންސީ އަށް ނިސްބަތްވެ ވަޑައިގަންނަވާ މަޑުއްވަރި ދާއިރާގެ މެމްބަރު އާދަމް ޝަރީފެވެ. ރިޕޯޓުގެ ސައްހަކަން އިތުރަށް ކަަށަވަރު ކުރަން ޖެހޭ ކަމަށް ޢައްސާން އަށް ރައްދު ދެއްވަމުން ހަނިމާދޫ ދާއިރާގެ މެމްބަރު ޢަބްދުލްޣަފޫރު މޫސާ ވިދާޅުވީ، ރިޕޯޓާއި ބެހޭ ގޮތުން ތިން ފަހަރެއްގެ މަތިން ތިން ބައްދަލުވުން ބާއްވާފައިވާއިރު މިހާރުމީ ރިޕޯޓާއި މެދު ސުވާލު އުފައްދަން ޖެހޭ ވަގުތެއް ނޫން ކަމަށެވެ. ކޮމިޓީގެ ރިޕޯޓަކީ ހުރިހާ މެމްބަރުންވެސް ތިއްބަވައިގެން ކުރިޔަށް ގެންދިޔަ ރިޕޯޓަކަށްވާއިރު ވަކި ބަޔަކާއި މެދު ވަކިގޮތެއް ނިންމަން ޖެހޭ ކަމަށް ނެތް ކަމަށެވެ.

ޢަފޫރު ވިދާޅުވީ ގޮތުގައި، ގަވާއިދާ ހިލާފަށް ހިންގާފައިވާ ކަންތައް ބަލަން ޖެހޭނެ ކަމަށެވެ. އެއަށްވުރެ އިތުރަ ކަމެއް ރިޕޯޓުގައި ނެތް ކަމަށެވެ.

އިދިކޮޅުގެ ހުށައެޅުން ބަލައި ނުގަތުމުން ކޮމިޓީގެ ޢައުލަބިއްޔަތުން ފާސްވީ ސަބްކޮމިޓީން ފާސްކުރި ގޮތަށް ތަޅުމަށް ރިޕޯޓް ފޮނުވުމަށެވެ.