ރިޔާސަތުގައި ދެމިހުރިހައި ދުވަހަކު އިސްލާމް ދީން ނޫން އެހެން ދީނަކަށް ޖާގާއެެއް ނުދޭނަން: ރައީސް ނަޝީދު

ރައްޔިތުންގެ މަޖިލީހުގެ ރައީސް ކަމުގައި ހުންނެވިހާ ހިނދަކު އިސްލާމްދީން ނޫން އެހެން ދީނަކަށް ޖާގަ ނުދެއްވާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މަޖިލީހުގެ ރައީސް އެހެން ވިދާޅުވީ، ބުދަ ދުވަހު ބޭއްވި ރައްޔިތުންގެ މަޖިިލީހުގައި ނައިފަރު ދާއިރާގެ މެމްބަރު އަހުމަދު ޝިޔާމް ދެއްކެވި ވާހަކައަކާއި ގުޅިގެންނެވެ. ޝިޔާމް ތުހުމަތު ކުރެއްވީ އިސްލާމްދީން ފޮހެލަން މަސައްކަތްކުރާ ބަޔަކަށް ނަޝީދު ޖާގަދެއްވައިގެން ހުންނަވާ ކަމަށެވެ.

Advertisement

ޝިޔާމް އަށް ޖަވާބު އަރުވަމުން އެމްޑީޕީގެ ރައީސް ވިދާޅުވީ، ދިވެހިރާއްޖޭގައި ފުރަތަމަ އިސްލާމިކް މިނިސްޓްރީއެއް އުފެއްދީ އެމަނިކުފާނުގެ ވެރިކަމުގައި ކަމަށެވެ. އަދި ހަމައެއާއި އެކު ސަލަފް ޖަމާޢަތް ރަޖިސްޓްރީކޮށް ދިނީ ވެސް ހަމަ އެމްޑީޕީގެ ވެރިކަމުގައިކަން އެމަނިކުފާނު ފާހަގަކުރެއްވިއެވެ.

އެއަށް ފަހު ނަޝީދު ވިދާޅުވީ ދިވެހިރާއްޖޭގައި އިސްލާމްދީން ނޫން ދީނަކަށް ޖާގަދޭކަށް މަޖިލީހުން އެއްވެސް ކަމެއް ކުރުމުގެ އެއްވެސް ފުރުސަތެއް އެއްވެސް މެމްބަރަކަށް އެމަނިކުފާނުގެ ރިޔާސަތުގައި ނުދެއްވާނެ ކަމަށެވެ.

ރައީސް ނަޝީދު ވިދާޅުވި ގޮތުން އެމަނިކުފާނު، ކަންބޮޑުވެގެން އުޅެނީ، ހަނގުރާމައަށް މީހުން ފޮނުވާތީ ކަމަށެވެ.

ސަލަފް ޖަމްއިއްޔާ ރަޖިސްޓްރީ ކޮށްފައިވަނީ އެމަނިކުފާނުގެ ވެރިކަމުގައި ކަމަށް ނަޝީދު ވިދާޅުވެފައިވާއިރު، ސަލަފްގެ ރަޖިސްޓްރީ ދައްކާ ގޮތުން އެ ޖަމްއިއްޔާ ރަޖިސްޓްރީ ކޮށްފައިވަނީ 2006 ވަނަ އަހަރު ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައިކަން ވަނީ ހާމަވެފައެވެ.