އޯ.އައި.ސީ ރަންޔޫބިލްގައި ބައިވެރިވުމުގެ ފުރުސަތު ދިވެހި ފަންނާނުންނަށް
ސަގާފީ ހަރަކާތްތައް ހުށައެޅޭނީ ގިނަވެގެން 10 ފަންނާނުގެ ގްރޫޕަކަށް
ސަގާފީ ހަރަކާތްތައް ހުށައެޅޭނެ
އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) ގެ ރަންޔޫބީލް ފާހަގަކުރުމުގެ ގޮތުން ސައޫދީ އަރަބިއްޔާ ޖިއްދާގައި ބާއްވާ ހަރަކާތްތަކުގައި ބައިވެރިވުމުގެ ފުުރުސަތު ދިވެހި ފަންނާނުނަށް ލިބިއްޖެއެވެ.
ނޭޝަނަލް ސެންޓަރ ފޮރ ދި އާޓްސް (އެންސީއޭ) އިން އަންގާރަ ދުވަހު ގެޒެޓް ކޮށްފައިވާ އިއުލާނެއްގައި ބުނީ، މި މަހުގެ 25 އިން 28 އަށް ބޭއްވުމަށް ހަމަޖެހިފައިވާ ހަރަކާތްތަކުގައި ބައިވެރިވުމުގެ ފުރުސަތު ދިވެހި ފަންނާނުނަށް ލިބިފައިވާ ކަމަށެވެ.
ހަރަކާތްތަކުގައި ބައިވެރިކުރެވެނީ ސަގާފީ ހަރަކާތްތަކެއް ހުށަހަޅާދެވޭނެ ގިނަވެގެން 10 ފަންނާނުންގެ ގްރޫޕަކަށް ކަމަށާއި، ބައިވެރިވާ ފަންނާނުންގެ ހުރިހާ ހަރަދެއް އޯ.އައި.ސީ. އިން ހަމަޖައްސާ ގޮތަށް ވަނީ ހަމަޖެހިފައެވެ.
ބައިވެރިވުމަށް އެދޭ ފަރާތްތަކުން ބުރާސްފަތި ދުވަހުގެ 12:00 ގެ ކުރިން ޕާޓިސިޕޭޝަން ފޯމް އާއި، ޕާސްޕޯޓު ކޮޕީ އަދި ކަލްޗަރަލް އިވެންޓް އެއްގައި ބައިވެރިވެ ނަގާފައިވާ ގްރޫޕް ފޮޓޯއެއް ހުށަހެޅުމަށް އެންސީއޭއިން ވަނީ އެދިފައެވެ.
1969 ގައި އުފެއްދި އޯއައިސީ އެޖަމާއަތް ވެގެން ގޮސްފައި ވަނީ މުޅި މުސްލިމް އުންމަތުގެ އަޑު އިއްވައިދޭ ފަރާތްކަމުގައެވެ. ބިލިޔަނަކަށްވުރެ ގިނަ މުސްލިމުން ތަމްސީލުކުރުމަށް އޯއައިސީގައި މިހާރު 57 މެންބަރު ގައުމު ބައިވެރިވެއެވެ. މުސްލިމް އުންމަތަށް އެންމެ މުހިންމު ކަންކަމާމެދު މަޝްވަރާކުރުމަށް ކޮންމެ ތިން އަހަރަކު އެއް އަހަރު އޯއައިސީގެ ބައްދަލުވުމެއް ބާއްވާއެވެ.
