މަގޫދޫގައި އުފައްދާ ކަރަންޓު ފެނަކަ ކޯޕަރޭޝަނަށް ގަންނަނީ!
19 ނޮވެމްބަރު 2019 | އަންގާރަ 14:47މިއީ ފެނަކައިން ސޮއިކުރި މިފަދަ ފުރަތަމަ ޕަވަރ ޕާރޗޭސް އެއްބަސްވުން
އެއްބަސްވުމުގައި ސޮއިކުރި ރަސްމިއްޔާތުގެ ތެރެއިން
އިޓަލީގެ މިލާނޯ ބިކޯކާ ޔުނިވަރސިޓީ މެދުވެރިކޮށް ފ. މަގޫދޫގައި ގާއިމުކޮށްފައިވާ ސޯލަރ ޕެނެލް ސިސްޓަމުން އުފައްދާ ކަރަންޓު ފެނަކަ ކޯޕަރޭޝަނަށް ގަންނަން ނިންމައިފިއެވެ.
މަގޫދޫގައި ގާއިމުކޮށްފައިވާ ސޯލަރ ޕެނެލް ސިސްޓަމުން އުފައްދާ ކަރަންޓު ފެނަކައިން ގަންނަން ނިންމައި އަންގާރަ ދުވަހު ވަނީ އެއްބަސްވުމުގައި ސޮއިކޮށްފައެވެ. މިއެއްބަސްވުމުގައި ފެނަކައިގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު އަހްމަދު ސައީދު މުހައްމަދެވެ. މަގޫދޫ ކައުންސިލުގެ ފަރާތުން ސޮއިކުރެއްވީ ކައުންސިލްގެ ރައީސް އަބްދުﷲ ވަހީދެވެ.
މިއީ ހަކަތަ ގަތުމަށް ފެނަކަ އިން ސޮއިކުރި މިފަދަ ފުރަތަމަ ފަހަރެވެ. އަދި ދިވެހިރާއްޖޭގެ ރަށު ކައުންސިލްއަކާއި ޔުޓިލިޓީ ކުންފުންޏަކާއެކު ވެވުނު ފުރަތަމަ މިފަދަ އެއްބަސްވުންވެސްމެއެވެ.
ފެނަކައިން ބުނީ އެއްބަސްވުމުން މޯލްޑިވްސް އެނަރޖީ އޮތޯރިޓީގެ މިންގަނޑުތަކާއި އުޞޫލުތަކާ އެއްގޮތަށް މިފަދަ އިތުރު އިންޑެޕެންޑެންޓް ޕަވަރ ޕްރޮޑިއުސަރތަކުން (ޔުޓިލިޓީ ނޫން ފަރާތްތަކުން) އިޔާދަކުރަނިވި ހަކަތައިން އުފައްދާ ކަރަންޓު ގަތުމަށް ތައްޔާރު ކަމަށެވެ.
މިއެއްބަސްވުމާއެކު ފެނަކައިން އުފައްދާ ކަރަންޓުގެ ބައެއް މިސޯލަރ ނިޒާމުން ލިބޭ ކަރަންޓުގެ ގޮތުގައި ބޭނުން ކުރަން ފަށާނެއެވެ. މީގެ ސަބަބުން، ފެނަކައިން ތެލަށް ކުރާ ޚަރަދު ކުޑަވެގެންދާނެ ކަމަށް ފެނަކައިން ބުނެއެވެ. އަދި ފެނަކައަށް ކަރަންޓު ވިއްކުމުން ކައުންސިލަށްވެސް އޭގެ މަންފާ ލިބިގެންދާނެއެވެ.
މި އިއާދަކުރަނިވި ހަކަތަ އުފައްދާ ނިޒާމު ސައިޒަކީ 30 ކިލޯވޮޓް ޕީކް ކަމަށް ފެނަކައިން މައުލޫމާތުދެއެވެ.
