ޝިފާއާއި ޝަމާއު ކައުންސިލުގެ މާރުކޭޓު ކޮމެޓީގެ ވައިބަރ ގްރޫޕަކުން ބޭރުކުރި ވާހަކައިން މުޅި ކޮމެޓީ ހޫނުވެއްޖެ
ގްރޫޕްއިން ބޭރުކޮށްލަން ޖެހުނު އެއް ސަބަބަކީ މަސްވެރިންގެ ޕާކުގައި ހުރި ގާޑިއާތައް ނެގުމުގައި ދިމާވި މައްސަލައެއްގައި ކަމަށް
މާލެ ސިޓީ ކައުންސިލްގެ މޭޔަރ ޝިފާ މުހައްމަދު
މާލެ ސިޓީ ކައުންސިލްގެ މޭޔަރ ޝިފާ މުޙައްމަދާއި، ޑެޕިއުޓީ މޭޔަރ ޝަމާއު ޝަރީފް މާރުކޭޓު ކޮމެޓީގެ ވައިބަރ ގްރޫޕަކުން ބޭރުކުރި ވާހަކައިން ލާމަރުކަޒީ ކޮމެޓީގެ ބައްދަލުވުން ހޫނުވެއްޖެއެވެ.
ޝިފާ ވިދާޅުވީ މުޅި ކައުންސިލުގައި ހިނގާ ހުރިހާ ކަމަކަށް ހަދާފައި އޮންނަ ވައިބަރ ގްރޫޕުތަކުގައި ޝިފާއާއި ޝަމާއު އާއި ދެބޭފުޅުން އަބަދުވެސް ތިބޭ ކަމަށެވެ. ނަމަވެސް މާރުކޭޓު ކޮމެޓީ ހިންގުމަށްޓަކައި ހެދި ވައިބަރ ގްރޫޕުން އެ ދެބޭފުޅުންވެސް ބޭރުކޮށްލީ ކަމަށެވެ. އަދި ބޭރުކޮށްލަން ޖެހޭ އެއްވެސް ސަބަބެއް އޮތް ކަމަށް ޤާބޫލުފުޅު ނުކުރައްވާ ކަމަށް ޝިފާ ވިދާޅުވިއެވެ.
ވައިބަރ ގްރޫޕުން ބޭރުކޮށްލި ވާހަކައަށް ރައްދުދެއްވަމުން މާލެ ސިޓީ ކައުންސިލަރ މުޙައްމަދު ފަޒީން ވިދާޅުވީ މޭޔަރ ޝިފާ ވައިބަރ ގްރޫޕުން ބޭރުކޮށްލަން ޖެހުނު އެއް ސަބަބަކީ މަސްވެރިންގެ ޕާކުގައި ހުރި ގާޑިއާތައް ނެގުމުގައި ދިމާވި މައްސަލައެއްގައި ކަމަށެވެ.
ފަޒީން ވިދާޅުވީ އެގޮތަށް ކަންތައްތައް ވެގެން ނުވާނެ ކަމަށް ވިދާޅުވި ކަމަށާއި އެގޮތަށް ކަންތައްތައް ކުރައްވާނަމަ ގާޑިއާ ނެގުމުގެ މައްސަލައާއި ދުރަށް ޖެހިލައްވާނެ ކަމަށެވެ. ގާޑިއާތައް ނުނެގި ވަރަށް ގިނަ ދުވަސްވެއްޖެކަން ފާހަގަކޮށް ފަޒީން ވިދާޅުވީ މޭޔަރ ޝިފާ ވައިބަރ ގްރޫޕުން ބޭރުކޮށްލަން ދިމާވި ދެވަނަ މައްސަލައަކީ މާރުކޭޓު ބަންދުކުރަން އެންގުމުން ދިމާވި މައްސަލައެއްގައި ކަމަށެވެ.
މުދާ ނެގުމަށް ބާކީ 7 ދުވަސް އޮތް އިރު، އެ 7 ދުވަހުވެސް އެތަން ހުޅުވާފައި ބޭއްވުމަށް މަޝްވަރާ ކުރެވުނު ކަމަށެވެ. ނަމަވެސް އެކަންތައްތައް ކުރިއަށް ނުގޮސް ފެނުނީ ތަޅު އެޅުވިތަން ކަމަށެވެ. އެގޮތުން އިދާރީ ގޮތުން ޝީފާ އަންގަން ޖެހޭ ކަންކަން އެންގުމަށް ފަހު ތަޅު އެޅުވުމުން އެތާގައި ތިބި މީހުން އިހުތިޖާޖަށް ނުކުތުމުން ކުރިމަތިލުމަކަށް ނުދިއުމަށް ޝިފާގެ މެސެޖެއް އައި ކަމަށެވެ.
ދަތުރުވެރިންގެ މާރުކޭޓު މާލެ ސިޓީ ކައުންސިލުން އޮގަސްޓް 31 ވަނަ ދުވަހު ބަންދުކޮށްފައިވަނީ މަރާމާތަށް ކަމަށް ބުނެއެވެ. އަދި މަރާމަތަށްފަހު ގިނަވެގެން އެއް މަސްދުވަހުގެ ތެރޭގައި މާރުކޭޓު ހުޅުވާނެ ކަމަށް އޭރު ކައުންސިލުން ވަނީ ބުނެފައެވެ. އަލުން މާރުކޭޓު ހުޅުވާއިރު 176 ގޮޅީގެ ބަދަލުގައި ހުންނާނީ 63 ގޮޅި ކަމަށާއި އެ ގޮޅިތަކުގައި 8 ފޫޓް 10 ފޫޓް ހުންނާނެ ކަމަށް އޭރު ސިޓީ ކައުންސިލުން ބުންޏެވެ. އެހެންނަމަވެސް މިހާރު މި ވަނީ މާލެ ސިޓީ ކައުންސިލްގެ ކައުންސިލަރުންގެ މެދުގައި ޚިޔާލު ތަފާތުވެ މާރުކޭޓު ގޮޅިތައް ކަނޑަނޭޅި ކައުންސިލަރުންގެ މެދުގައި ބޮޑު ކޯޅުންގަނޑެއް އުފެދިފައެވެ. ދެ މަސް ދުވަހަށްވުރެ ގިނަ ދުވަސްވީއިރުވެސް ކައުންސިލަރުންނަށް ގޮޅިތަކުގެ ޢަދަދެއް ކަނޑައެއް ނޭޅެއެވެ.
މާލެ ސިޓީ ކައުންސިލްގެ މޭޔަރު ޝިފާ މުޙައްމަދު ވިދާޅުވީ އެކި ފަހަރު މަތިން ކައުންސިލް ބައްދަލުވުންތައް ބާއްވައިގެން ވެސް މާރުކޭޓުގެ ޢަދަދު ކަނޑައެޅޭ ގޮތް ނުވި ކަމަށެވެ. އެކަމުގައި ކައުންސިލަރުންގެ މެދުގައި ޚިޔާލު ތަފާތުވެފައިވާ ކަމަށެވެ. އަދި ކައުންސިލުގެ ފަރާތުން އުޞޫލު އަވަހަށް ކަނޑައަޅަން ބޭނުންވާ ކަމަށާއި، އެކި ފަހަރު ބައްދަލުވުން ތަވާލު ކުރެއްވި ކަމަށް ޝިފާ ވިދާޅުވިއެވެ. ބައެއް ބައްދަލުވުންތަކުގައި 117 ގޮޅި ކަނޑައެޅުމަށް ވާހަކަ ދައްކާފައިވާ ކަމަށާއި މިނިސްޓްރީ އޮފް ނެޝަނަލް ޕްލޭނިންގ އެންޑް އިންފްރާސްޓްރަކްޗަރ އިން ވެސް ގޮޅިތައް ހުރި ވަރަށް ބަހައްޓައިދިނުމަށް އެދިފައިވާ ކަން ޝިފާ ފާހަގަކުރެއްވިއެވެ.
