އެމްއާރުޑީސީ އުވާލުމުން ސިވިލް ސަރވިސްގެ ވަޒީފާތަކަށް ބަދަލުކުރި މުވައްޒަފުންގެ މުސާރަ ކުޑަވި މައްސަލަ ކޮމެޓީއަށް!
18 ނޮވެމްބަރު 2019 | ހޯމަ 12:46ހުރިހާ މުވައްޒިފުންނަށްވެސް ރަނގަޅު ގޮތްތަކެއް ހޯދައިދިނުމަށް ސަރުކާރުން މަސައްކަތްކުރޭ
ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން
މޯލްޑިވްސް ރޯޑްސް ޑިވެލޮޕްމަންޓް ކޯޕަރޭޝަން (އެމްއާރުޑީސީ) އުވާލުމަށްފަހު ސިވިލް ސަރވިސް ކޮމިޝަނުގެ ދަށުން ޕަބްލިކް ވަރކްސް އަށް ބަދަލުކުރި މުވައްޒަފުންގެ މުސާރަ ކުޑަވި މައްސަލަ ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމެޓީން ބަލަން ފަށައިފި އެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމެޓީން ހޯމަ ދުވަހު ބޭއްވި ބައްދަލުވުމަށް އެމައްސަލައާ ގުޅިގެން، މިނިސްޓްރީ އޮފް ނެޝަނަލް ޕްލޭނިންގ އެންޑް އިންފްރާސްޓަކްޗަރ (ޕްލޭނިންގ މިނިސްޓްރީ)ގެ އިސްވެރިންނާއި ސިވިލް ސަރވިސް ކޮމިޝަން (ސީއެސްސީ) މެމްބަރުން ހާޒިރުކޮށް އެކަމުގެ މައުލޫމާތު އޮޅުން ފިލުވާފައިވެއެވެ.
މިނިވަން މުއައްސާސާތަކާބެހޭ ކޮމެޓީގެ އެ ބައްދަލުވުމުގައި ބައިވެރިވެވަޑައިގެން، ޕްލޭނިން މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ، ރޯޑް ކޯޕަރޭޝަން އުވާލުމާ ގުޅިގެން އެ ކުންފުނީގައި މަސައްކަތް ކުރި ފަރާތްތައް، ޕަބްލިކް ވާރކްސްއަށް ބަދަލުކޮށް، ކުރީގެ ސަރުކާރުން ހަ މަސްދުވަހުގެ ނޯޓިސްއެއް ދީފައިވާ ކަމަށެވެ. ނަމަވެސް ރައީސް އިބްރާހީމް މުޙައްމަދު ޞާލިޙު ސަރުކާރާ ޙަވާލުވެވަޑައިގެންނެވިއިރު، އެނޯޓިހުގެ މުއްދަތު ހަމަވާން އޮތީ ދެތިން މަސްދުވަސް ކަމަށެވެ.
އަކްރަމް ވިދާޅުވީ، އެމްއާރުޑީސީގެ މުވައްޒަފުންގެ ތެރެއިން ސިވިލް ސަރވިސްއަށް ނެގެނީ ވަރަށް މަދު މުވައްޒަފުން ކަމަށްވާތީ، ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އުފެއްދުމުގެ ވިސްނުން ސަރުކާރުގެ ތެރޭގައި އޮތުމުން، އެމީހުންގެ ނޯޓިހުގެ މުއްދަތު މި ސަރުކާރުން އިތުރުކުރި ކަމަށެވެ. އަދި އާރުޑީސީ އުފެދުމުން، އެ ކުންފުންޏަށް ވެސް މުވައްޒަފުން ނެގި ކަމަށާއި، ނަމަވެސް އަދި ޞަރަޙަދީ އޮފީސްތައް ޤާއިމުވެފައި ނުވާތީ ހުރިހާ އެންމެންނަށް އެކުންފުނިން ވަޒީފާ ހަމަޖައްސާދެވިފައި ނުވާ ކަމަށެވެ.
އެމްއާރުޑީސީ އުވާލުމުން 326 މީހެއްގެ ވަޒީފާއަށް ބަދަލުއައިސް، މުސާރައަށް ވެސް ބަދަކުތަކެއް އައުމުން، މިމައްސަލަ މަޖިލީހުގެ ސްޓޭޓް އޯވންޑް އެންޓަރޕްރައިސަސް (އެސްއޯއީ) ކޮމެޓީންވެސް ބަލާފައިވެއެވެ.
ސަރުކާރުގެ ކުންފުނިތަކުގައި އޮންނަ ޓެކްނިކަލް ނުވަތަ ހެވީ ވެހިކަލް ދުއްވާ ފަރަތާތްކަށް ބޮޑެތި މުސާރަ ލިބުނުނަމަވެސް، އެފަދަ ފަރާތްތައް ސިވިލް ސަރވިސްއަށް ބަދަލު ކުރުމުގައި މަޤާމާއި މުސާރައިގެ އޮނިގަނޑެއް ސިވިލް ސަރވިސްގައި އަދި ޤާއިމު ކުރެވިފައެއް ނުވެއެވެ. އަދި ސިވިލް ސަރވިސްއިން ލިބޭ މުސާރައަށްވުރެ ބޮޑު މުސާރައެއް ސަރުކާރުން ކުންފުނިތަކުން ދެމުންދެ އެވެ.
އެމްއާރުޑީސީ އަކީ ކުރީގެ ރައީސް މުޙައްމަދު ނަޝީދުގެ ވެރިކަމުގައި އުފެއްދި ކުންފުންޏެކެވެ. މިކުންފުނި ރައީސް ޢަބްދުﷲ ޔާމީނުގެ ވެރިކަމުގައިވެސް ސަރުކާރުން ހިންގި އެވެ. ރާއްޖޭގެ އެކި ރަށްރަށުގައި މަގު ހެދުމުގެ އިތުރުން ފުޓުބޯޅަ ދަނޑާއި ނަރުދަމާ އެޅުމުގެ މަސައްކަތް ކުރަމުންދިޔަ އެމްއާރުޑީސީ، ޔާމީނުގެ ވެރިކަމުގައި 2018 ވަނަ އަހަރުގެ ކުރީކޮޅު ވަނީ އުވާލާފަ އެވެ. އެމްއާރުޑީސީ އުވާލިއިރު، އެއީ ކޮރަޕްޝަނުގެ ބޮޑެތި ތުހުމަތުތަކެއް ކުރެވިފައިވާ އޮތް ކުންފުންޏެކެވެ. އަދި އެއީ ކުރު މުއްދަތެއްގެ ތެރޭގައި އެންމެ ގިނަ މެނޭޖިންގ ޑިރެކްޓަރުން ޢައްޔަންކުރި ކުންފުނިވެސް މެއެވެ.
އެމްއާރުޑީސީ އުވާލުމަށްފަހު އެތަނުގެ މުވައްޒަފުން އޭރު ބަދަލުކުރީ ހައުސިންގް މިނިސްޓްރީގެ ދަށަށެވެ. ހައުސިން މިނިސްޓްރީގެ ޕަބްލިކް ވާރކްސް ސެކްޝަނުގެ ދަށަށް އެމްއާރްޑީސީގައި މަސައްކަތް ކުރި ގިނަ މުވައްޒަފުންތަކެއް ބަދަލުކުރިއެވެ.
މިއަހަރުގެ ޖޫން މަހުގެ 9 ވަނަ ދުވަހު ވަނީ މަގުތައް ހަދައި، ބެލެހެއްޓުމަށްޓަކައި ރޯޑް ޑިވެލޮޕްމަންޓް ކޯޕަރޭޝަން ލިމިޓެޑްގެ ނަމުގައި ސަރުކާރުގެ ކުންފުންޏެއް ރައީސް އިބްރާހިމް މުޙައްމަދު ޞާލިޙު އުފައްދަވާފައެވެ.
