ޓެކްނޮލޮޖީއާއި އެއްވަރަށް ތަރައްގީވެފައި ނެތީ ވުޒާރާތަކުގެ މެދުގައި ބަދަހި ގުޅުމެއް ނެތުމުން: މަލީހު
17 ނޮވެމްބަރު 2019 | އާދީއްތަ 14:55މިނިސްޓަރ ވިދާޅުވީ ސަރުކާރުގެ އެއްވުޒާރާއާއި އަނެއް ވުޒާރާއާއި ދެމެދު އޮންނަ ގުޅުން އިތުރަށް ރަނގަޅުވާން ޖެހޭ ކަމަށް
މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މަލީހު ޖަމާލް
ދިވެހި ރާއްޖެ ޓެކްނޮލޮޖީއާއި އެއްވަރަށް ތަރައްޤީ ނުވެ އޮތް އެންމެ މައި ސަބަބަކީ ވުޒާރާތަކުގެ މެދުގައި އޮންނަން ޖެހޭ މިންވަރަށް ބަދަހި ގުޅުމެއް ނެތުމުގެ ސަބަބުން ކަމަށް ޤަބޫލުފުޅުކުރަވާކަމަށް މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މަލީހު ޖަމާލް ވިދާޅުވެއްޖެއެވެ.
ރައިސުލްޖުމްހޫރިއްޔާ އިބްރާހިމް މުހައްމައްދު ޞާލިހުގެ ސަރުކާރަށް އެއް އަހަރު ފުރުމާއި ގުޅިގެން "ރާއްޖެ އެމްވީ" އަށް ދެއްވި ޚާއްސަ އިންޓަވިއުއެއްގައި މިނިސްޓަރ ވިދާޅުވީ ސަރުކާރުގެ ވުޒާރާތަކުގެ މެދުގައި އޮންނަ ގުޅުން އިތުރަށް ރަނގަޅު ކުރަންޖެހޭ ކަމަށެވެ.
މިނިސްޓަރ ވިދާޅުވީ ޓެކްނޮލޮޖީ އާއި ގުޅުން ހުރި ދާއިރާތަކުން އަދިވެސް ވަކި ވަކިން މަަސައްކަތްކުރުމުގެ ރޫހު ސަރުކާރުގެ އެކި ވުޒާރާތަކުގައި އަށަގަނެފައި ހުރުމަކީ މި ދާއިރާއިން ކުރިއެރުމަށް ހުރި ގޮންޖެހުމެއްގެ ގޮތުގައި މިނިސްޓަރ ފާހަގަކުރެއްވިއެވެ.
މީގެ 15 ވަރަކަށް އަހަރު ކުރިންވެެސް އެ ނަމުގައި ވުޒާރާއެއް އުފެއްދި ކަމަށާއި އެ މިނިސްޓްރީ އޭރުގައި އުވާލުމަކީ ހެދުނު ވަރަށް ބޮޑު ގޯހެއްގެ ގޮތުގައި މިނިސްޓަރ ސިފަކުރެއްވިއެވެ. 15 އަހަރު ކުރިން އެއައި ސްޕީޑުގައި މަސައްކަތްތައް ކުރިއަށް ގެންދެވުނު ނަމަ މި ސަރަހައްދުގައި ވެސް އެންމެ ޓެކްނޮލޮޖީއާއި އެންމެ ރަށްޓެހި ގައުމަށް ދިވެހި ރާއްޖެ ވެގެންދާނެ ކަމަށް މިނިސްޓަރ ވިދާޅުވިއެވެ. އެގޮތަށް ކުރިއެރުވުނުނަމަ ރައްޔިތުންނަށް ފޯރުކޮށްދޭ ޚިދުމަތްތައް އޮންލައިންކޮށް ދިނުމަށް ބޮޑު ބާރަކަށް ވެގެންދިޔައީސްކަން ފާހަގަކުރައްވައި، މިއަދާ ހަމަޔަށް މި ފެނިގެންދިޔައީ މިނިސްޓްރީ އުވި، އެންސީއައިޓީގެ ނަމުގައި މުއައްސަސާއަކުން ކުރަމުން އައި މަސައްކަތްކަމަށް މިނިސްޓަރ ވިދާޅުވިއެވެ.
މީގެއިތުރުން ސަރުކާރުގެ ހުރިހާ އޮފީހަކުން ފޯރުކޮށްދޭ ޚިދުމަތްތަކެއް އޮންލައިންކޮށް ދެވެން ޖެހޭ ކަމަށާއި، އެކަމަށްޓަކައި އެޕްލިކޭޝަންތަކެއް އަންނަން ޖެހޭ ކަމަށް މިނިސްޓަރ ވިދާޅުވިއެވެ. އަދި ސަރުކާރު އެކި އިދާރާތަކުގެ "ފްރޮންޓްއާއި އަދި ބެކްއެންޑް" ގައި ހުރިހާ ކަމެއް އޮޓޮމޭޓް ކުރެވިފައި ހުންނަން ޖެހޭއިރު، އޭގެ މަސައްކަތްތައް މިހާރުވެސް އެމިނިސްޓްރީން ކުރަމުން އަންނަކަން މިނިސްޓަރ ފާހަގަކުރެއްވިއެވެ.
