ޑރ. އަފްރާޝީމްގެ މަރާއި ގުޅިގެން ޑރ. ޝަހީމު ކޮމިޝަނަށް ދެއްވީ ދޮގު މައުލޫމާތު: ކޮމިޝަން ރިޕޯޓު
17 ނޮވެމްބަރު 2019 | އާދީއްތަ 06:39ރިޕޯޓުގައި ވާގޮތުގައި ޑރ. އަފްރާމްޝީމް މަރާލާފައިވަނީ ވަކި ޚާއްސަ ވާހަކަތަކެއް ދައްކާތީ
ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު
ޑރ. އަފްރާޝީމް އަލީގެ މަރާ ގުޅިގެން މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނަށް ކުރީގެ އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ދީފައިވަނީ ތެދުނޫން މައުލޫމާތެއް ކަން އެ ކޮމިޝަނުން އެކުލަވާލި ރިޕޯޓުން ހާމަވެއްޖެއެވެ.
އާދީއްތަ ދުވަހުގެ ރައްޔިތުންގެ މަޖިލީހުގެ ޖަލްސާގައި ޑރ. އަފްރާޝީމް އަލީގެ މަރުގެ ރިޕޯޓުގެ ހުލާސާ އިއްވާފައިވާއިރު ރައްޔިތުންގެ މަޖިލީހުގެ ރައީސް ވިދާޅުވީ ޑރ. އަފްރާޝީމް މަރާލާފައިވަނީ ވަކި ޚާއްސަ ވާހަކަތަކެއް ދައްކާތީ ކަމުގައި ރިޕޯޓުގައި ފާހަގަކޮށްފައިވާކަމަށެވެ.
ރައްޔިތުންގެ މަޖިލީހުގެ ރައީސް ވިދާޅުވީ މަރު ކޮމިޝަނަށް ފޮނުއްވެވި ސިޓީގައި ޑރ.އަފްރާޝީމް އެ ދުވަހު އިސްލާމިކް މިނިސްޓްރީއަށް ވަޑައިގެންނެވީ އެމަނިކުފާނަށް އެނގިވަޑައިގެން ނޫންކަމަށް ވިދާޅުވިޔަސް، އެ ދެ ބޭފުޅުންގެ ތެރޭގައި ބަދަލުކުރެވުނު އެސްއެމްއެސްތަކުން ހާމަވެގެންދާ ކަމަށެވެ. ޑރ. ޝަހީމަކީ އަފްރާޝީމް މަރާލި ދުވަސްވަރު، އޭރުގެ ސަރުކާރުގެ އިސްލާމިކް މިނިސްޓަރގެ މަގާމުގައި ހުންނެވި ބޭފުޅާއެވެ.
ޑރ. އަފްރާޝީމް އަނބުރާ ދީނަށް ރުޖޫއަވެ، މީޑިއާގައި އިއުލާނު ކޮށްފިއްޔާމުން ކިތަންމެހާވެސް ރަނގަޅުކަމަށް ބުނެ ޑރ. ޝަހީމަށް ލިބިފައިވާއިރު، އެ މެސެޖު ޑރ. ޝަހީމް ވަނީ ޑރ. އަފްރާޝިމަށް ފޯވަރޑުކޮށްފައެވެ. މި މެސެޖު ފޮނުވާފައިވަނީ ކޮންފަރާތަކުންތޯ ކޮމިޝަނުން ސުވާލު ކުރުމުން އެ މެސެޖު ޑރ. ޝަހީމަށް ފޮނުވީ ކާކުކަން ހަނދުމަފުޅުގައި ނެތް ކަމަށް ޑރ. ޝަހީމް ވަނީ ކޮމިޝަނަށް މައުލޫމާތު ދީފައެވެ.
އޭގެ އިތުރުން ޑރ. އަފްރާޝީމް އެންމެ ފަހުން ބައިވެރިވެވަޑައިގެންނެވި ޓީވީ ޕްރޮގްރާމްގައި ބައިވެރުވުމަށް ހުށައެޅުއްވީ ޑރ. ޝަހީމް ކަމަށް ރިޕޯޓުގައިވެއެވެ. އަދި ޑރ. އަފްރާޝީމަށް އެ ޕްރޮގްރާމްގައި ބައިވެރިނުވެވިއްޖެ ހާލަތެއްގައި، އިސްލާމިކް މިނިސްޓްރީން އިންތިޒާމުކުރާ ނޫސްވެރިންގެ ބައްދަލުވުމެއްގައި ތައުބާވެވަޑައިގަތުމުގެ ފުރުސަތު މަގުފަހި ކޮށްދެއްވުމަށްވެސް ޑރ. ޝަހީމު ހުށައެޅުއްވިއެވެ. ޑރ. ޝަހީމް މަރު ކޮމިޝަނަށް ދެއްވީ ތެދު ނޫން މައުލޫމާތު ކަމަށް އެ ކޮމިޝަންގެ ރިޕޯޓުގައި ފާހަގަކޮށްފައިވަނީ، ޑރ. އަފްރާޝީމް އެރޭ ޓީވީއަށް އަރަން ބޭނުންފުޅުވެލެއްވީ ކީއްވެގެންކަން ޑރ. ޝަހީމަށް ނޭނގޭ ކަމަށް ވިދާޅުވެފައި އޮތުމުންނެވެ.
2012 ވަނަ އަހަރުގެ އޮކްޓޯބަރު މަހުގެ 1 ވަނަ ދުވަހުގެ ދަންވަރު ޑރ. އަފްރާޝީމް މަރާލުމަށްފަހު ޖިހާދީ ފިކުރުގެ ޖަމާއަތުން ތަމްރީނުކޮށް، އެ ޖަމާއަތުން މާލޭގައި ހިންގާފައިވާ އެކި އެކި ހަރަކާތްތަކުގައި ބައިވެރިވެފައިވާ މީހުން އޮކްޓޯބަރު މަހުގެ 2 ވަނަ ދުވަހުގެ ހެނދުނު މާލެއިން ގަތަރަށް ފުރި ފްލައިޓުން ސީރިއާއާއި ސޫދާނަށް ފުރާފައިވާކަމަށް ކޮމިޝަންގެ ރިޕޯޓުގައި ވެއެވެ. އަދި ހަމަ އެދުވަހު ޑރ. ޝަހީމްވެސް ފުރާވަޑައިގެންނެވި ކަމަށް ވެއެވެ.
ޑރ. އަފްރާޝީމް މަރާލާފައިވަނީ، 2012 ވަނަ އަހަރުގެ އޮކްޓޯބަރު މަހުގެ އެއް ވަނަ ދުވަހުގެ ރޭ ދަންވަރުގެ ވަގުތެއްގައި، ސްޓެލްކޯ ސަރަހައްދުގައި ހުންނަ ހ. ފުންވިލު ސިޑި ގޮޅި ސަރަހައްދުގައެވެ. އަފްރާޝީމް މަރާލުމުގެ ދައުވާ ސާބިތުވެފައި ވަނީ ހ. ލޮބީ ހުސައިން ހުމާމްގެ މައްޗަށެވެ. އަދި އެ މައްސަލައިގާ ހައްޔަރުކުރި އެހެން މީހުންގެ މައްޗަށް އެކަމުގެ އެއްވެސް ކަމެއް ސާބިތު ނުވެ އެ މީހުން ވަނީ މިނިވަންވެފައެވެ.
