އަންހެނަކަށްވީތީ އެއްވެސް ހައްގެއް މަސައްކަތްކުރުމުގެ މާހައުލުގައި އުނިވެގެން ނުވާނެ ކަމަށް ވިދާޅުވި
ޓުއަރިޒަމް މިނިސްޓަރ އަލީ ވަހީދު
ދިވެހިރާއްޖެއަށް ބާރަށް ދުއްވައިގަނެވޭނީ އަންހެނުންނާއި ފިރިހެނުން އެއްސަފެއްގައި ނިކުމެ މި ޤައުމު ކުރިއަރުވަން މަސައްކަތްކޮށްގެން ކަމަށް ޓުއަރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ"ގައި ވާހަކަދައްކަވަމުން އަލީ ވަހީދު ވިދާޅުވީ މުޅި ފަތުރުވެރިކަމުގެ ސިނާޢަތުގައިވެސް މަސައްކަތް ކުރަނީ އަންހެނުންގެ 7 ޕަސެންޓް ކަމަށާއި އެއީ ވަރަށް ހިތާމަ ކުރައްވާ ކަމެއް ކަމަށެވެ. ނަމަވެސް މިހާރު ޓުއަރިޒަމް މިނިސްޓްރީގައި 75 ޕަސެންޓަކީ އަންހެނުން ކަމަށާއި އެ މިނިސްޓްރީއަކީ ކާމިޔާބު މިނިސްޓްރީއެއް ކަމަށެވެ.
މިނިސްޓަރ ވިދާޅުވީ ޒާމަން ބަދަލުވެ ދިވެހިރާއްޖެ މިއޮތީ ބާރު ދުވެލީގައި ދާ ގައުމަކަށް ބަދަލުވެފައި ކަމަށެވެ. އަދި އަންހެނަކަށް ވީތީ އެއްވެސް ހައްގެއް މަސައްކަތް ކުރުމުގެ މާހައުލުގައި އުނިވެގެން ނުވަތަ ގެއްލުމެއް އޮވެގެން ނުވާނެ ކަމަށާއި އެކަން އެގޮތަށް އޮތީކަމަށް ވަނީނަމަ ސަރުކާރުގެ ވިސްނުމަކީ އެ އުސޫލެއް ބަދަލުކުރުން ކަމަށެވެ.
މިނިސްޓަރ ވިދާޅުވީ ރާއްޖޭގެ ރިސޯޓްތަކާއި، ގެސްޓްހައުސް އަދި ސަފާރީތަކުގައި އަންހެނުންނަށް މަސައްކަތް ނުކުރެވެންވީ އެއްވެސް ސަބަބެއް ނެތް ކަމަށެވެ. މި ސިނާޢަތުގައި އަންހެނުން މަދުވާ ސަބަބުތައް ދެނެގަތުމަށްފަހު ސިޔާސަތުތަކަށް ބަދަލުގެންނަން ނިންމާފއިވާ ކަމަށާއި މި ފެށޭ އަހަރު ތެރޭގައި ރާއްޖޭގެ ހުރިހާ ރިސޯޓެއްގައި ހެރޭސްމަންޓް ކޮމިޓީތައްވެސް ހެދިގެންދާނެ ކަމަށް މިނިސްޓަރ ވިދާޅުވިއެވެ.
މީގެ އިތުރުން ފެރީގެ ނިޒާމް އައުމާއިއެކު އަންހެނުންނަށް ރިސޯޓްތަކުގައި މަސައްކަތް ކުރުމުގެ ހިތްވަރުލިބިގެންދާނެ ކަމަށް މިނިސްޓަރ ވިދާޅުވި އެވެ. އަދި ސިޔާސަތަށް ގެންނަ ބަދަލާއިއެކު ޓޫރިޒަމް ސިނާއަތަށް އިންގިލާބީ ބަދަލެއް އަންނާނެ ކަމަށްވެސް މިނިސްޓަރ ވިދާޅުވިއެވެ.
