ރާއްޖެއަށް މިހާރު ކުރަމުންދާ ވިއްސާރައިގައި ބުދަ ދުވަހުގެރޭ ގދ. ތިނަދޫއަށް ބާރަށް ވައިޖެހި ބޮޑެތި ގެއްލުންތަކެއް ލިބިއްޖެއެވެ.

ތިނަދޫއަށް ނަގޫރޯޅިއެއް އެރި ކަމަށް ޚަބަރު ފެތުރެމުން ދިޔަ ނަމަވެސް، ރާއްޖެޓީވީ އާއި ވާހަކަ ދައްކަވަމުން، މެޓް އޮފީހުގެ އޮފިޝަލަކު ވިދާޅުވީ ތިނަދޫއަށް ނަގޫރޯޅިއެއް އެރިކަން ރިކޯޑް ކުރެވިފައި ނުވާ ކަމަށާ، އެ ރަށަށް ބާރު ސްޕީޑްގައި ވައި ޖެހިފައިވާ ކަމަށެވެ.

ރާއްޖެއެމްވީއަށް މައުލޫމާތު ދެއްވަމުން، ތިނަދޫ ކައުންސިލްގެ އިންފޯމޭޝަން އޮފިސަރ، އާރިފް ޙުސައިން ވިދާޅުވީ، ބުދަ ދުވަހުގެރޭ އައި ކޮޅިގަނޑެއްގައި ތިނަދޫގެ މީހުން އުޅޭ ބައެއް ގެތަކާއި ބައެއް ވިޔަފާރި ގުދަންތަކުގެ ފުރާޅު އެއްލާލައި އެކިވަރުގެ ގެއްލުން ލިބިފައިވާ ކަމަށެވެ. އަދި ބައެއް ގުދަންތަކުގައި ހުރި މުދަލަށްވެސް ގެއްލުން ވެފައިވާއިރު، ބުދަދުވަހުގެރޭ ނުނިދޭ ވަރަށް ބައެއް ގެތަކަށް ގެއްލުން ވެފައިވާ ކަމަށެވެ.

މި ކޮޅިގަނޑުގައި ރަށުގެ އެކި ހިސާބުގައި ހުރި ގެތަކާއި ގުދަންތަކަށް ގެއްލުން ލިބިފައިވާއިރު، މައުލޫމާތު ލިބޭ ގޮތުގައި ބޮޑަށް ގެއްލުން ލިބިފައިވަނީ ރަށުގެ ހުޅަނގު ފަރާތުގައި ހުރި ގެތަކަށެވެ.

ލިބުނު ގެއްލުންތަކާއި ގުޅިގެން، ތިނަދޫ ކައުންސިލާއި، ފުލުހުންނާއި، އެމްއެންޑީއެފްގެ އިތުރުން އެމްއާރްޑީސީއިން ގުޅިގެން ދަނީ ހަރަކާތްތެރިވަމުންނެވެ.