ހުރިހާ މުއައްސަސާއަކަށް އަތްބޭނިދާނެ، ރިޕޯޓު ދޭ ދުވަހެއް އެބަ އާދޭ: ރައީސް ޔާމީން
15 ނޮވެމްބަރު 2019 | ހުކުރު 21:11ޔާމީން ވިދާޅުވީ ސުޕްރީމް ކޯޓުވެސް މި ސަރުކާރުން ފުނޑާލައިފި ކަމަށް
ކުރީގެ ރައީސް އަބްދުﷲ ޔާމީން
ހުރިހާ މުއައްސަސާއަކަށް މި ސަރުކާރުން އަތްބާނައި މުޅި ނިޒާމު ފުނޑާލާފައިވާ ކަމަށާއި ނަމަވެސް ރިޕޯޓުދޭ ދުވަހެއް އެބަ އޮތް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް ޔާމީން މިހެން ވިދާޅުވީ ހުކުރު ދުވަހުގެ ރޭ ޕްރޮގްރެސިވް ކޮންގްރެސްއިން "ފުނޑާލައިފި" ނަމުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.
ރައީސް ޔާމީނު ވިދާޅުވީ ޝަރުޢީ ދާއިރާ "ފުނޑާލަމުން" ދަނީ ކޯޓުތައް މެދުވެރިކޮށް ކުރަން ނުޖެހޭ އެތައް ކަމެއް ކުރުމަށް ފަހު ކަމަށެވެ. ރައީސް ޔާމީނު ވިދާޅުވީ ސުޕްރީމް ކޯޓުވެސް މި ސަރުކާރުން ފުނޑާލައިފި ކަމަށެވެ.
މީގެ އިތުރުން ރައީސް ޔާމީނު ވިދާޅުވީ މި 19 ވަނަ ރައްޔިތުންގެ މަޖިލިސް އިންތިޚާބުގައި ކެމްޕެއިން ދަތުރުތަކަށް ޚަރަދު ކުރީ ދައުލަތުގެ ޚަރަދުގައި ކަމަށެވެ.
ޔާމީން ވިދާޅުވީ އެ ވާހަކަ ދެއްކީ ހަމައެކަނި ދިވެހިންނެއް ނޫން ކަމަށާއި ކޮމަންވެލްތުން ރާއްޖެ ފޮނުވި ޓީމުގެ ރިޕޯޓުގައިވެސް އެވާހަކަ އޮތް ކަމަށެވެ. އަދި އެ މައްސަލަ ކޯޓަށް ވެސް ހުށަހެޅުމަށް މަސައްކަތް ކުރުމުން ހުށަނޭޅުނު ކަމަށް ވިދާޅުވިއެވެ. ޔާމީނު ވިދާޅުވީ މި ސަރުކާރުން ހުރިހާ ތަނަކަށް " އަތް ބާނަމުންދާ" ކަމަށެވެ. ހުރިހާ ތަނެއްގައި " އަތް އަޅައިގެން" މަސައްކަތް ކުރެވިދާނެ ކަމަށާއި ނަމަވެސް ރިޕޯޓު ދޭ ދުވަހެއް އެބަ އަންނަ ކަމަށެވެ. އެ ދުވަހަށް ތައްޔާރު ވުމަށް ޖަލްސާގެ ބައިވެރިންނަށް ގޮވާލަމުން ރައީސް ޔާމީނު ވިދާޅުވީ ހިނިތުންވާނޭ ދުވަހެއް އަދި އަންނާނެ ކަމަށެވެ.
