ފުވައްމުލަކު ސިޓީގައި ބިދޭސީންގެ ދަފްތަރެއް ތައްޔާރު ކުރުމުގެ ގޮތުން ސާވޭއެއް ފަށައިފިއެވެ.

ފުވައްމުލަކު ސިޓީ ކައުންސިލުން އެ ސާވޭ ފަށާފައިވަނީ ބުރާސްފަތި ދުވަހުއެވެ. ސާވޭ ފެއްޓުމުގެ ގޮތުން ސިޓީގެ މޭޔަރ އަބްދުﷲ ފަލާހު ޝަރީފް ވަނި އެކަމަށްޓަކައި ތައްޔާރު ކުރެވިފައިވާ މޯބައިލް އެޕްލިކޭޝަނަށް، ގޭގެއަށް ޒިޔާރަތްކުރައްވައި ބިދޭސީންގެ މައުލޫމާތު އަޅާފައެވެ.

ސިޓީ ކައުންސިލުން ބުނީ، ޖުމްލަ 18 އިނިއުމަރޭޓަރ އެކު ފެށި އެ ސާވޭގައި މުޅި ރަށް ކަވަރ ކުރަން ހަމަޖެހިފައިވާ ކަމަށެވެ.

އަދި މިނިސްޓްރީ އޮފް އިކޮނޮމިކް ޑިވޮލޮޕްމެންޓުން ބިދޭސީން ގާނޫނާއި ގަވާއިދަށް ފެއްތުމުގެ ގޮތުން ފަށާފައިވާ ''ރެގިއުރަލައިޒޭޝަން'' ޕްރޮގްރާމްގެ އެޕޮއިންޓްމެންްޓް ދޫކުރުމުގެ މަސައްކަތް އަންނަ ހަފްތާގައި ފަށާނެ ކަމަށްވެސް ސިޓީ ކައުންސިލުން ބުންޏެވެ.

އާބާދީގައި އަށްހާހަަށް ވުރެ ގިނަ މީހުން ދިރިއުޅޭ ފުވައްމުލަަކުގައި 1000 ހާ ބިދޭސީން މަސައްކަތް ކުރެއެެވެ. އޭގެ ތެރެއިން ގިނަ ބިދޭސީންނަކީ ގަވާއިދާ ހިލާފަށް މަސައްކަތް ކުރާ މީހުންނެވެ.

ފުވައްމުލަކުގައި ބިދޭސީންގެ ދަފްތަރު އެކުލަވައިލުމުގެ މަސައްކަތް ފަށާފައިވާއިރު، އިކޮނޮމިކް މިނިސްޓްރީން ކުރިޔަށް ގެންދާ ''ރެގިއުރަލައިޒޭޝަން'' ޕްރޮގްރާމްގެ ދަށުން 3938 ބީދޭސީއަކުގެ ޕްރޮގްރެސް ވަނީ ނިންމާލާފައެވެ. އޭގެ ތެރެއިން ބޮޑު އަދަދެއް ހިއްސާ ކުރަނީ އިމާރާތް ކުރުމުގެ ސިނާއަތުގައި ހަރަކާތްތެރިވާ ބިދޭސީންނެވެ.