ހިއްސާ ގަތް ފަރާތްތަކަށް އެމްއެސްޑީ އެކައުންޓަށް ހިއްސާ ޖަމާކޮށްފިން: އެމްއައިބީ
އެމްއައިބީގެ ހިއްސާއެއް ވިއްކާފައިވަނީ 35 ރުފިޔާއަށް
މޯލްޑިވްސް އިސްލާމިކް ބޭންކުން ބޭއްވި ނޫސްވެރިންގެ ބައްދަލުވުމެއްގެ ތެރެއިން
މޯލްޑިވްސް އިސްލާމިކްގެ ބޭންކް (އެމްއައިބީ) ގެ އައިޕީއޯގައި ހިއްސާ ގަތް ހުރިހައި އިންވެސްޓަރުންގެ ހިއްސާ މޯލްޑިވްސް ސެކިއުރިޓީ ޑިޕޮސިޓަރީޒް (އެމްއެސްޑީ) ގައި ހުޅުވާފައިވާ އެކައުންޓުތަކަށް ހިއްސާ ޖަމާކޮށްފައިވާ ކަމަށް އެ ބޭންކުން ބުނެފިއެވެ.
އެމްއައިބީން ނެރުނު އިޢުލާނެއްގައި ބުނެފައިވަނީ ކޮންމެ އިންވެސްޓަރަކަށް ވެސް އެކަށައެޅިފައިވާ ހިއްސާއާ ބެހޭ މައުލޫމާތު އެމްއެސްޑީ އެކައުންޓް މެދުވެރިކޮށް މިހާރު ލިބެން ހުންނާނެ ކަމަށެވެ. އަދި އެ ބޭންކުގެ ހިއްސާ މޯލްޑިވްސް ސްޓޮކް އެކްސްޗޭންޖުން ގަނެ ވިއްކުމަށް ކަނޑައެޅިފައިވާ ތާރިހަކީ ނޮވެމްބަރު 17 ކަމަށްވެސް އެ ބޭންކުން ބުނެއެވެ.
އެމްއައިބީ އިން އިތުރަށް ބުނީ ހިއްސާ ވިއްކުން ބަންދު ކުރިއިރު ހިއްސާ ގަތުމަށް ޖުމްލަ 17،713 ފޯރމު 16،146 އިންވެސްޓަރުންގެ ފަރާތުން ލިބިފައިވާ ކަމަށާއި މިއީ ފައިސާގެ ޢަދަދުން ބަލާނަމަ 356،533،100.00 (ތިންސަތޭކަ ފަންސާސް ހަ މިލިއަން ފަސްލައްކަ ތިރީސް ތިން ހާސް އެއްސަތޭކަ) ރުފިޔާ ކަމަށެވެ. އެހެންކަމުން މިއީ ހިއްސާ ވިއްކައިގެން ހޯދަން ކަނޑައެޅި ފައިސާގެ ޢަދަދަށްވުރެން 112،408،100.00ރ (ސަތޭކަ ބާރަ މިލިއަން ހަތަރު ލައްކަ އަށް ހާސް އެއްސަތޭކަ) އިތުރު ޢަދަދެއް ކަމަށް ވެސް އެ ބޭންކުން ބުނެއެވެ.
އެމްއައިބީ ޕަބްލިކް ކުންފުންޏަކަށް ބަދަލުކޮށް މޯލްޑިވްސް ސްޓޮކް އެކްސްޗޭންޖުގައި ރަޖިސްޓްރީ ކުރުމަށް ފަހު 244 މިލިއަން ރުފިޔާގެ ހިއްސާ އާންމުންނަށް ވިއްކުމަށް ހުށަހެޅިއެވެ. މި ހިއްސާގެ ތެރޭގައި ހިމެނެނީ މޯލްޑިވްސް އިސްލާމިކް ބޭންކުގެ 4.5 މިލިއަން ހިއްސާ (157 މިލިއަން ރުފިޔާގެ ހިއްސާ)، އިސްލާމިކް ކޯޕަރޭޝަން އޮފް ދަ ޑިވެލޮޕްމެންޓް އޮފް ޕްރައިވެޓް ސެކްޓަރ ގެ 2.4 މިލިއަން ހިއްސާ (87 މިލިއަން ރުފިޔާގެ ހިއްސާ) އަދި ޖުމްލަ ޢާންމު ހިއްސާގެ ގޮތުން 6،975،000 (ހަ މިލިޔަން ނުވަލައްކަ ހަތްދިހަ ފަސް ހާސް) ހިއްސާއެވެ. މިއީ ބޭންކުގެ ޖުމްލަ ހިއްސާގެ 31 އިންސައްތައެވެ.
