މި ނޮވެމްބަރު މަހުގެ ފަހު ހަފުތާގައި މިއަހަރު ރާއްޖެއަށް އަންނަ 1.5 މިލިއަން ވަނަ ފަތުރުވެރިޔާ ރާއްޖެއަންނާނެ ކަމަށް މޯލްޑިވްސް މަރކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ބުނެފި އެވެ.

އެމްއެމްޕީއާރުސީން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި އެކުންފުނީގެ މެނޭޖިން ޑިރެކްޓަރ ޠައްޔިބު މުޙައްމަދު ވިދާޅުވީ، 1.5 މިލިއަން ވަނަ ފަތުރުވެރިޔާ މި ނޮވެމްބަރު މަހުގެ ފަހު ހަފުތާގައި ރާއްޖެއަންނާނެ ކަމަށާއި އެކަން ވަރަށް ކުލަގަދަކޮށް ފާހަގަ ކުރުމަށްޓަކައި ވާންޖެހޭ ތައްޔާރީތަކަށް އެކުންފުނިންނާއި ކަމާބެހޭ އިދާރާތަކާއި ގުޅިގެން ކުރިއަށްދާ ކަމަށެވެ.

މިއަހަރުގެ ރިޔާސީ ބަޔާން އިއްވަވާ ދެއްވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ މިއަހަރު ނިމޭއިރު 1.5 މިލިއަން ޓޫރިސްޓުން ރާއްޖެއަށް ޒިޔާރާތް ކުރުމަކީ ސަރުކާރުގެ ޓާގެޓެއް ކަމަށް ވިދާޅުވެފަ އެވެ.

އެހެންކަމުން ރައީސް ޞާލިޙްގެ ވިދާޅުވި ޓާގެޓަށް މި ނޮވެމްބަރު މަހުގެ ފަހު ހަފުތާގައި ވާޞިލު ވެވޭނެ ކަމަށް ޠައްޔިބު ވިދާޅުވި އެވެ. މިއީ މިހާތަނަށް އަހަރެއްގެ ތެރޭގައި ރާއްޖެއަށް އެންމެ ގިނަ ފަތުރުވެރިން ޒިޔާރާތްކުރި އަހަރުކަމަށް ވެއެވެ.

ޠައްޔިބު ވިދާޅުވީ، އެކުންފުނިން މިހާރު ކުރާ ހަމައެކަނި ކަމަކީ، ޓޫރިޒަމް ޕްރޮމޯޓް ކުރުމާއި އިޝްތިހާރު ކުރުމުގެ ޙަރަކާތް ހިންގުން ކަމަށެވެ. ކުރީގެ ރައީސް ޢަބްދުﷲ ޔާމީނުގެ ސަރުކާރުން އެމްއެމްޕީއާރުސީގެ މެންޑޭޓްތަކަށް ބަދަލުގެނެސް، ވިޔަފާރި ކުރިކަމަށްވިޔަސް، އެމްއެމްޕީއާރުސީ އަޞްލު އުފެއްދި ބޭނުން ނުވަތަ އެ ކުންފުނީގެ އަޞްލު މެންޑޭޓްގެ ތެރެއިން މަސައްކަތް ކުރަމުންދާ ކަމަށެވެ.

އެގޮތުން ރާއްޖޭން ބޭރުގެ އެކިއެކި ޤައުމުތަކާއި ސިޓީތަކުގައި ޓޫރިޒަމް ޕްރޮމޯޓް ކުރުމަށް މިއަހަރު 27 ފެއާރގައި ބައިވެރިވެ، 13 ރޯޑް ޝޯވްގެ އިތުރުން އެކިއެކި ޙަރަތާތްތައް ހިންގާފައިވާއިރު، ޖުމްލަކޮށް، ކޮންމެ ހަތަރު ދުވަހަކަށް ޕްރޮމޯޝަނަލް ޙަރަކާތް ހިންގާފައިވާ ކަމަށެވެ.

ފަޅުރަށްތަކަކާއި ފަޅުތަކެއް ހިމެނޭ ގޮތަށް 57 ތަނެއް ވިއްކައިގެން، މިހާތަނަށް ދިވެހި ދައުލަތުން ހިންގި އެންމެ ބޮޑު ޚިޔާނާތް ކަމަށްވާ އެމްއެމްޕީއާރުސީގެ ޚިޔާނާތާއި ގުޅިގެން ރާއްޖޭގެ ޓޫރިޒަމް ޕްރޮމޯޓް ކުރުމަށް ބޮޑު ގޮންޖެހުމަށްވި ނަމަވެސް، މިހާރު އެކަން މަޑުމަޑުން ބަދަލުވަމުން އަންނަ ކަމަށެވެ.

ޠައްޔިބު ވިދާޅުވީ މިހާރު ދިމާވެފައިވާ އެންމެ ބޮޑު އެއް ގޮންޖެހުމަކީ އެއަރޕޯޓް ތަރައްޤީ ކުރެވިފައިނުވާ މައްސަލަ ކަމަށެވެ. އެއަރޕޯޓް ޒަމާނީ ފެންވަރަށް ތަރައްޤީކޮށް، ދުނިޔޭގެ އެތަން މިތަނުން ޑައިރެކްޓް ފްލައިޓްތައް ޖައްސާ، އަދި ރާއްޖޭ އެކިއެކި ހިސާބުތަކުގައި ވެސް ފެންވަރު ރަނގަޅު އެއަރޕޯޓްތަކެއް ހެދުމަކިީ ވަރަށް ބޭނުންތެރި ކަމެއް ކަމަށެވެ.

ފަތުރުވެރިކަމުގެ ދާއިރާއަށް ފަސޭހައިން ދަތުރުފަތުރު ކުރެވޭނެ ނިޒާމެއް ޤާއިމުވާން ޖެހޭކަމަށާއި، ފެންވަރު ރަނގަޅު ޚިދްމަތް ލިބޭނެ، އެއަރޕޯޓްތަކެއް މިވީހާދުވަހު، ތަރައްޤީކުރެވިފައިނެތުމަކީ ރާއްޖެއަށް އޮތް އެންމެ ބޮޑު ގެންޖެހުން ކަމަށް ޠައްޔިބު ވިދާޅުވި އެވެ.