ރާއްޖޭގެ ފަތުރުވެރިކަމުގެ ސިނާޢަތު އިތުރަށް ފުޅާކުރުމަށްޓަކައި އިންޑިއާގެ އެންމެ ވަރުގަދަ 3 ސިޓީއަށް ވައިގެދަތުރުތައް ފެށުމަށް ހަމަޖެހިފައިވާކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.

ސްޕެއިނަށް ކުރެއްވި ދަތުރުފުޅަށް ފަހު އެނބުރި ވަޑައިގެން އަންގާރަ ދުވަހު ނޫސްވެރިންނާ ބައްދަލުކުރައްވައި ޓޫރިޒަމް މިނިސްޓަރ ވިދާޅުވީ، އިންޑިއާގެ ވެރިރަށް ނިއު ދިއްލީއާއި ވިޔަފާރި މަރުކަޒީރަށް މުމްބާއީއާއި އައިޓީ ހަބް ބެންގަލޫރަށް ސީދާ ފްލައިޓްތައް ފެށުމުގެ ތައްޔާރީތައް ސަރުކާރުން ވަމުންދާ ކަމަށެވެ.

އިންޑިއާގެ އެންމެ ވަރުގަދަ 3 ސިޓީއަށް ވައިގެ ދަތުރުފަށަން ތައްޔާރުވަމުންދާކަން މިނިސްޓަރ ވިދާޅުވިނަމަވެސް ނަމަވެސް އެކަމުގެ ތަފުޞީލު މިނިސްޓަރ ހާމަކުރައްވާފައެއް ނުވެއެވެ.

މިނިސްޓަރ ވިދާޅުވީ، މިއީ ރާއްޖެއާއި އިންޑިއާއާއި ދެމެދުގައި އޮތް ޚާރިޖީ ގުޅުމުގެ ބަދަހި ކަމުގެ ނަތީޖާ ކަމަށެވެ.

އަންނަ އަހަރު ބާއްވަން ތައްޔާރުވަމުން އަންނަ "ޓޫރިޒަމް ވީކް" އާއި ގުޅޭގޮތުން މިނިސްޓަރ ވިދާޅުވީ، އަންނަ އަހަރުގެ ފަތުރުވެރިކަމުގެ ދުވަސް ފާހަގަ ކުރުމަށް ދުނިޔޭގެ ކުރީގެ މަޝްހޫރު ތަރިންގެ ފުޓްބޯޅަ ޓީމެއް ރާއްޖެއަށް ޒިޔާރަތްކޮށް ޚާއްޞަ މެޗެއް ކުޅުމަށް ހަމަޖެހިފައިވާކަމަށެވެ. މެޗުތަކުގެ ތަފްސީލުތައް 2020 ވަނަ އަހަރުގެ ޖެނުއަރީ މަހުގެ 20 ގައި އިއުލާނުކުރައްވާނެ ކަމަށް މިނިސްޓަރ ވިދާޅުވިއެވެ.

މިއަހަރު ފަތުރުވެރިކަމުގެ ދާއިރާއިން ކަނޑައަޅާފައިވާ ޢަމާޒުތައް ޙާޞިލު ކުރަމުންދާއިރު، މި އަހަރު 1.5 މިލިއަން ފަތުރުވެރިން ރާއްޖެއަށް ޒިޔާރަތްކުރުމަށް ކަނޑައަޅާފައިވާ ޢަމާޒު ނޮވެމްބަރު މަހުގެ 24 ގެ ކުރިން ޙާޞިލުވާނެ ކަމަށާއި، މި އަހަރު ނިމޭއިރު އެ ޢަދަދު އިތުރުވެގެންދާނެ ކަމަށް އަންދާޒާކުރެވޭކަމަށްވެސް މިނިސްޓަރ ވިދާޅުވިއެވެ.