މިފްކޯ ހަރުދަނާ ކުރުމަށް 20 މިލިއަން ޑޮލަރުގެ ފެސިލިޓީ އެއް ޤާއިމުކުރަނީ
12 ނޮވެމްބަރު 2019 | އަންގާރަ 04:39ފެސިލިޓީ ހުޅުވާލަނީ ޑިސެމްބަރ 1 ހިސާބުގައި ކަމަށް މިނިސްޓަރ ވިދާޅުވި
މިފްކޯ
އަންނަ އަހަރު ޖެނުއަރީ މަހުން ފެށިގެން ސަރުކާރުގެ ބަޖެޓުން މިފްކޯއަށް ލާރި ނުދޭން ނިންމާފައިވާކަމަށާއި އެގޮތުގެ މަތިން ސިޔާސަތުތައް ބައްޓަން ކުރަމުން އަންނަ ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.
ބަޖެޓް ދިރާސާކުރާ ކޮމިޓީގައި ވާހަކަފުޅު ދައްކަވަމުން މިނިސްޓަރ ވިދާޅުވީ އެސްޓީއޯގެ ސަބްސިޑަރީ ކުންފުނި މިފްކޯއަށް އެސްޓީއޯއިންވެސް ލާރި ޕަމްޕުކުރަމުން ދެން ނުދާނެކަމަށެވެ. މިނިސްޓަރ ވިދާޅުވީ މިފްކޯ ހަރުދަނާ ކުރުމަށްޓަކައި އިންޓަރނޭޝަނަލް ޓްރޭޑް ފައިނޭންސް ކޯޕަރޭޝަން ( އައި.ޑީ.އެފް.ސީ) އާއެކު ފެސިލިޓީއެއް ޤާއިމުކުރުމުގެ މަސައްކަތް ކުރަމުންދާކަމަށެވެ. އެގޮތުން ސަރުކާރާއި މިފްކޯ އާއި އެސްޓީއޯ އިން އައިޑީއެފްސީ އާއެކު މަސައްކަތްކުރަމުންދަނީ 20 މިލިއަން ޑޮލަރުގެ ފެސިލިޓީއެއް ޤާއިމުކުރުމަށްކަމަށް މިނިސްޓަރ ވިދާޅުވި އެވެ. އޭރުން ކޭޝް ފްލޯއަށް ދިމާވެގެން އުޅޭ މައްސަލަ ޙައްލުވެގެންދާނެ ކަމަށް މިނިސްޓަރ ވިދާޅުވި އެވެ.
މިނިސްޓަރ ވިދާޅުވީ ދަޅު މަސް ބަންދުކުރުމަށް ބޭނުންކުރާނީ ރާއްޖޭގައި ހުރި ވަޞީލަތްތައްކަމަށާއި ރާއްޖޭގައި ހުރި ފެކްޓްރީތަކުގެ ފެންވަރު ރަނގަޅުކޮށް ކެޕޭސިޓީ ބޮޑު ކުރަމުންދާނެ ކަމަށެވެ. މިނިސްޓަރ ވިދާޅުވީ އެމްއެމްޕީއާރުސީން ކުރަންޖެހޭނެ ހަމައެކަނި ކަމަކީ ފަތުރުވެރިކަން އިޝްތިހާރުކުރުން އެކަނި ކަމަށް ދެކެވަޑައިނުގަންނަވާ ކަމަށާއި އެމްއެމްޕީއާރުސީން މަސްވެރިކަން އިޝްތިހާރުކުރުމަށްވެސް މަސައްކަތް ކުރަންޖެހޭކަމުގަ އެވެ.
މިނިސްޓަރ ވިދާޅުވީ މިސިޔާސަތުގެ ދަށުން މިފްކޯ ހިންގުން ހަރުދަނާ ވެގެންދާނެ ކަމަށް އުންމީދު ކުރައްވާކަމުގަ އެވެ. މިއަހަރު މިފްކޯއަށް 90 މިލިއަން ރުފިޔާ ދިނުމަށް ބަޖެޓް ކޮށްފައިވާކަމަށާއި ނަމަވެސް 2020 އަހަރު މިފްކޯއަށް ބަޖެޓުން އެއްވެސް ވަރެއް ދިނުމަށް ބަޖެޓްކޮށްފައި ނުވާނެކަމަށް މިނިސްޓަރ ވިދާޅުވި އެވެ.
އެސްޓީއޯގެ ސަބްސިޑަރީ ކުންފުނި މިފްކޯ އަށް، މިދިޔަ ފަސް އަހަރު 839 މިލިއަން ރުފިޔާގެ ގެއްލުން ވެފައިވާ ކަމަށް އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވަނީ ވިދާޅުވެފައެެވެ. މިދިޔަ އަހަރު އެކަނި ވެސް 199 މިލިއަން ރުފިޔާގެ ގެއްލުންވިކަމަށް އަމްރު ވިދާޅުވި އެވެ.
