ބްލޮކް ގްރާންޓްގެ އިތުރުން ކޮންމެ ކައުންސިލަކަށް 1 މިލިއަން ރުފިޔާ އިތުރަށް ދެނީ
7 ނޮވެމްބަރު 2019 | ބުރާސްފަތި 04:40ބްލޮކް ގްރާންޓެއްގެ ގޮތުގައި 1.6 ބިލިއަން ދިނުމަށް ވަނީ ކަނޑައަޅާފައި
ކުޑަހުވަދޫ ކައުންސިލްގެ އިދާރާ
އަންނަ އަހަރަށް ކަނޑައެޅި ބަޖެޓުގައި ބްލޮކް ގްރާންޓުގެ އިތުރުން ކޮންމެ ކައުންސިލަކަށް އިތުރު 1 މިލިއަން ރުފިޔާ ދޭނެކަމަށް ރައީސް އޮފީހުގެ އަންޑަރ ސެކްރެޓަރީ އަޙްމަދު ހަމްދާން ވިދާޅުވެއްޖެއެވެ.
ރާއްޖެ ޓީވީގެ ފަލަހަ ސުރުޚީ ޕްރޮގުރާމުގައި ވާހަކަ ދައްކަވަމުން ހަމްދާން ވިދާޅުވީ ބަޖެޓުންދޭ ގްރާންޓް ފޯމިއުލަރގައި މައިގަނޑުގޮތެއްގައި ރަށްރަށަށް ބަޖެޓުދިނުމުގައި ހިމަނާފައިވާނީ އާބާދީގެ ނިޞްބަތަށާއި ރަށާއި މާލެއާއި އަދި އަތޮޅުގެ ވެރިކަން ކުރާ ރަށުގެ ދުރުމިނަށާއި، ރަށުގެ ބިން ބޭނުންކުރެވޭ ނިޞްބަތާއި އަދި ކައުންސިލްތަކުގެ ޕަރފޯމެންސަށް ބެލުމަށްފަހުގައި ކަމަށެވެ.
އަދި މި ފޯމިއުލާގެ އިތުރުން ބްލޮކް ގްރާންޓުގައި އީކުއަލައިޒޭޝަން ގްރާންޓެއް ވެސް ކަނޑައަޅާފައިވާނެ ކަމަށާއި، އެންމެ މަދުވެގެން ހުރިހާ ކައުންސިލަކަށް ވެސް އެއްވަރަކަށް ބަހާލެވޭ ޢަދަދެއް ބަޖެޓުގެ ތެރެއިން ދެވޭނެކަމަށް ހަމްދާން ވިދާޅުވިއެވެ.
އޭނާ ވިދާޅުވީ އަންނަ އަހަރުގެ ބަޖެޓުގައި މީގެ ކުރިން ރާއްޖޭގެ ބަޖެޓެއްގައި ކައުންސިލްތަކަށް ކަނޑަނޭޅޭ މިންވަރުގެ ބޮޑު ޢަދަދެއް ކައުންސިލްތަކަށް ކަނޑައެޅުމަށް ހުށަހަޅާފައިވާނެ ކަމަށެވެ. އަދި މަޖިލީހަށް ހުށަހެޅި ބަޖެޓުގައި ޖުމްލަ 1.6 ބިލިއަން ރުފިޔާ އެއީ ކައުންސިލްތަކަށް ދެވޭ ހިލޭ އެހީގެ ގޮތުގައި ކަނޑައަޅާފައިވާނެކަމަށް ހަމްދާން ވިދާޅުވިއެވެ.
ހަމްދާން ވިދާޅުވީ ކައުންސިލްތަކަށް ބަޖެޓް ކަނޑައެޅުމުގައި މީގެ ކުރިން ބަޖެޓް ހަމަހަމަ ގޮތެއްގައި ދިނުމަށް ގްރާންޓް ފޯމިއުލާއެއް އެކުލަވާލުމުގެ މަސައްކަތް ކުރެވިފައި އޮތް ނަމަވެސް އެކަން މިހާތަނަށް ތަންފީޒުކުރެވިފައި ނެތް ކަމަށެވެ. ނަމަވެސް މިއަހަރު ބަޖެޓް ކަނޑައެޅުމުގައި ލާމަރުކަޒީ ޤާނޫނަށް ހުށަހެޅި އިޞްލާޙުގެ ތެރޭގައި ހިމެނޭނެ ކައުންސިލްތަކަށް ބަޖެޓް ކަނޑައެޅުމުގައި މިހާރު ވިސްނާފައި އޮތީ ބްލޮކް ގްރާންޓް ފޯމިއުލާއެއްގެ ތެރެއިން ހަމަހަމަ އުޞޫލަކުން ބަހަލާވޭނެ ގޮތަކަށް ކަމަށް އޭނާ ވިދާޅުވިއެވެ.
